Nopa carta tlen kintitlanilijkej Cristo itokilijkauaj tlen Filipos 4:1-23
4 Uajka, noikniuaj katli niinmechiknelia uan katli nijnektok niinmechitas, katli inkichiuaj ma niyolpaki uan inelij kej se nocorona, xiitstokaj intemachmej ipan toTeko kej ya niinmechiljuijtok, inmojuantij katli tlauel niinmechiknelia.
2 Nikintlajtlania Evodia uan Síntique ma kipiakaj sanse inintlalnamikilis pampa kitekipanouaj toTeko.
3 Uan ta, katli nelnelia titekiti nouaya, nojkia nimitstlajtlania nojua xikinpaleuijto ni siuamej katli kichijtokej kampeka kimoyauasej nopa kuali tlamachtili nouaya, uan nojkia iuaya Clemente uan nopa sekinok katli sansejko titlatekipanouaj, katli ijkuilijtok inintoka ipan nopa libro kampa nesi ajkia inijuantij kiselisej nemilistli.
4 Nochipa xiyolpakikaj pampa inkitekipanouaj toTeko. Sampa niinmechiljuia: ¡xiyolpakikaj!
5 Nochi ma kimatikaj para amo inkitemoliaj nochipa ma mochiua san tlen inmojuantij inkinekij. ToTeko itstok nechka.
6 Amo ximotekipachokaj ika yon se tlamantli. Más kuali, kema inmechpano tlen ueli tlamantli, ximomaijtokaj,* chikauak xijtlajtlanikaj Dios* uan xijtlaskamatilikaj, uan kiampa uelis inkiiljuisej nochi tlen inkinekij ma inmechmaka,
7 uan nopa tlaseuilistli tlen Dios temaka, tlen yon se maseuali amo kema kikuamachilis, kiyaualtsakuas* inmoyolo uan inmotlalnamikilis ika Cristo Jesús.
8 Noikniuaj, para nijtlamiltis niinmechiljuia ajachika* ximoiljuikaj ipan nochi nopa tlamantli tlen eli melauak, nochi tlen tlauel kitlepanitaj,* nochi tlen eli xitlauak, nochi tlen eli tlapajpaktik, nochi tlen kichiua xiteiknelikaj, nochi tlen sekinok kuali kiitaj, nochi tlen eli kuali uan nochi tlen maseualmej kinamiki kiuejkapantlalisej.*
9 Xijchiuakaj nochi tlen inkiyekojkej uan inkiselijkej tlen na, uan nojkia tlen inkikajkej nikijtok uan tlen inkiitakej nijchijki, uan Dios tlen temaka tlaseuilistli itstos inmouaya.
10 ToTeko kichijtok tlauel ma niyolpaki pampa sampa pejtok inmotekipachouaj ika na. Maske kena inmotekipachojtoyaj ika na, amo ueltoya inkinextiaj.
11 Amo kiampa nikijtoua pampa nechpoloua se tlenijki, pampa nijyekojtok kenijkatsa niyolpakis maske tlen ueli nechpanotiuala.
12 Nijmati kenijkatsa niitstos kema nijpixtok kentsi uan kema nijpixtok miak. Ipan nochi uan ipan tlen ueli tlamantli tlen nechpanotok, nijyekojtok tlen amo miakej kimatij: kenijkatsa niyolpakis kema niixuitok uan kema nimayantok, kema nijpia miak uan kema amo tleno nijpia.
13 Nijpia fuerzas para nikixnamikis nochi, pampa Dios nechmaka chikaualistli.
14 Pero inmojuantij inkichijkej tlen kuali pampa innechpaleuijkej kema nikixnamijki tlaouijkayotl.
15 Kena, noikniuaj tlen Filipos, inmojuantij nojkia inkimatij kema achtoui inkikajkej nopa kuali tlamachtili uan nikistejki Macedonia, yon se tlanechikoli nechpaleuik yon kinejki ma nijpaleui, san inmojuantij;
16 pampa kema niitstoya Tesalónica inmojuantij innechtitlanilijkej tlen ika ueliskia nimopanoltis, uan amo san sempatsi, innechtitlanilijkej ome ueltas.
17 Amo nikijtoua nopa pampa nijneki ma nechtlamajmakakaj, san nijneki ma momiakili nopa kuali tlamantli tlen inkichiuaj iixpa Dios.
18 Pero nijpia nochi tlen nechpoloua, uan hasta nijpia más. Nijpia nochi tlen moneki, pampa Epafrodito nechmakak tlen inmojuantij innechtitlanilijkej: se ofrenda* tlen ajuiyak mijyotia tlen Dios kiselia ika pakilistli.
19 Uan pampa kiampa inkichijkej, noDios ika Cristo Jesús inmechmakas nochi tlen inmechpoloua, pampa ya temaka tlauel miak tlateochiualistli.
20 ToDios uan toTata kinamiki ma kiuejkapantlalikaj para nochipa uan amo kema ma tlami. Amén.*
21 Xikintlajpalokaj nochi katli Dios kiniyokatlalijtok* katli itstokej sansejko iuaya Cristo Jesús. Nojkia inmechontlajpalouaj toikniuaj katli itstokej nouaya.
22 Nochi katli Dios kiniyokatlalijtok inmechontlajpalouaj, pero más katli itstokej ichaj Tlanauatijketl tlen Roma.*
23 ToTeko Jesucristo ma kinexti ueyi iyolo ika inmojuantij* pampa inkipiaj kuali inmotlalnamikilis.
Tlen ijkuilijtok tlatsintla
^ Kanajya kiijtouaj “ximotlatlajtikaj”.
^ Kanajya kiijtouaj “toTeotsij”.
^ O “kimokuitlauis”.
^ Kanajya kiijtouaj “ijiksa”.
^ O “tlen amo san kiajauilmatij”.
^ O “nochi tlen kichiuas Dios ma yolpaki”.
^ Kanajya kiijtouaj “tlakajkaualistli”.
^ O “kiampa ma eli”.
^ O “tlatsejtseloltikej”.
^ Ika griego “César”.
^ O “ma inmechmaka tlateochiualistli tlen amo kinamiki tijselisej”.
