Nopa carta tlen kintitlanilijkej hebreos 2:1-18
2 Yeka, moneki más kuali tijtlakakilisej nopa tlamantli tlen ya tijkaktokej, para amo kema timouejkatlalisej uan tichikokisasej tlen nopa ojtli.
2 Pampa tlaj nopa tlajtoli tlen kiijtojkej ángeles elki melauak, uan tlaj kintlatsakuiltijkej kej kinamikiyaya nochi katli kiixpanokej tlanauatili uan amo kichijkej tlen nopaya kiijtouayaya,
3 ¿kenijkatsa timomakixtisej* tlaj amo tijpatiitaj nopa tlamakixtili tlen más ueyi? Pampa toTeko elki katli achtoui tematiltik, uan katli kitlakakilijkej techiljuijkej para nelia,
4 uan nojkia Dios* tematiltik ika milagros* uan uejueyi tlamantli, uan nojkia kema kixexelok ichikaualis* kej ya kinejki.
5 Pampa Dios amo kintlalijtok ángeles para ma kinauatikaj nopa Tlaltipaktli tlen teipa ualas, tlen tikijtojtokej.
6 Pero se tonali, se tlakatl kiijtok: “¿Kipia ipati se maseuali para tikilnamiktos? ¿O kipia ipati katli eli ikone se maseuali para tijmokuitlauis?
7 Ta amo tijchijchijki más ueyi* que ángeles; ta tijmakak iueyitilis uan tijuejkapantlalik, uan tijkajki imako nochi tlen tijchijchijki ika momax.
8 Nochi tlamantli tijtlalik iikxitla para ma kinauati”. Kema Dios kikauilik ma kinauati nochi, amo kikajki yon se tlamantli para amo kinauatis. Uan maske ayamo tikitaj tlaj ya kinauatia nochi tlamantli,
9 ya tikitaj Jesús, katli amo kichijchijkej más ueyi que ángeles, kimakatokej iueyitilis uan kiuejkapantlalijtokej pampa tlaijiyouik hasta kimiktijkej. Ya mijki por nochi tojuantij pampa Dios kinextik ueyi iyolo.*
10 Nochi tlamantli onka para iueyitilis Dios uan nochi eltok por ya. Uajka para kinuejkapantlalis miakej ikoneuaj, kiitak kuali para kikauas ma tlaijiyoui nopa Tlayakanketl katli kinmakixtia* uan kiampa kuali kimatiskia kenijkatsa kinmakixtis.
11 Pampa Jesús uan nojkia katli ya kinchiua tlatsejtseloltikej, kipiaj sanse ininTata. Yeka amo pinaua kiniljuis elij iikniuaj
12 kema kiijtoua: “Nikiniljuis noikniuaj motoka; nimitsueyichiuas ika uikatl ipan tlanechikoli”.
13 Nojkia kiijtoua: “Nimotemachis ipan Dios”. Uan nojua kiijtoua: “¡Xikitakaj! Na uan nopa konemej tlen Jehová* nechmakak”.
14 Yeka, sanse kej nopa “konemej” kipiaj ininnakayo uan inineso, ya nojkia kipixki inakayo uan ieso, kiampa ika imikilis ueliskia kitsontlamiltis Diablo, katli kipia tlen ika uelis kichiuas ma timikikaj,
15 uan kinmajkauas* nochi katli nochipa itstoyaj kej tlatekipanouanij pampa kimakasiyayaj mikilistli.
16 Pampa ya amo ualajki kinpaleuiko ángeles, ualajki para kinpaleuis iteipaixuiuaj Abrahán.
17 Yeka, monejki mochiuas sanse kej “iikniuaj” ipan nochi tlamantli, para elis se sumo sacerdote katli tetlasojtla uan temachtli kema kitekipanoua Dios, kiampa ueliskia temakas inemilis por inintlajtlakoljuaj maseualmej para ma moyoltlalikaj iuaya Dios.*
18 Ya tlaijiyouik kema kiyejyekojkej, yeka kuali kimati kenijkatsa kinpaleuis katli nojkia kinyejyekouaj.
Tlen ijkuilijtok tlatsintla
^ O “timomanauisej”.
^ Kanajya kiijtouaj “toTeotsij”.
^ Ika griego “tlaneskayotl”.
^ O “iespíritu santo”.
^ O “Ta tikechkapanok se kentsi más”.
^ O “techmakak tlateochiualistli tlen amo kinamiki tijselisej”.
^ O “kinmanauia”.
^ Kanajya kiijtouaj “kinmalakanis”, “kinmajkaualtis”.
^ O “para techkixtilis totlajtlakoljuaj”, “para kiixtsakuas tlajtlakoli”. Xikita kema kiixtsakuayayaj tlajtlakoli.
