Nopa carta tlen kintitlanilijkej hebreos 4:1-16
4 Yeka, pampa Dios* nojua kitenkajtok para uelis kalakisej kampa yaya mosiajkaua, ma timomokuitlauikaj, para amo ma kiita yon se tlen inmojuantij amo kinamiki kalakis nopaya.
2 Pampa tojuantij nojkia techmatiltijkej nopa kuali tlamachtili sanse kej inijuantij; pero inijuantij amo kichijkej tlen kikajkej, yeka amo kinpaleuik pampa amo tlaneltokakej sanse kej katli kena kichijkej tlen kikajkej.
3 Pero tojuantij katli titlaneltokatokej kena tikalajkej kampa Dios mosiajkaua, tlen ya kiijtok: “Yeka tlauel nikualanki uan nijtenkajki:* ‘Amo kalakisej kampa na nimosiajkaua’”, maske iteki ya tlantoya desde kema pejki Tlaltipaktli.*
4 Pampa ipan iTlajkuilol Dios, ya kiijtoua tlen nopa chikompa tonali: “Uan Dios mosiajkajki tlen nochi tlamantli tlen kichijchijki ipan nopa chikompa tonali”.
5 Uan nojkia kiijtoua: “Amo kalakisej kampa na nimosiajkaua”.
6 Yeka, pampa nojua poliuij se keskij ma kalakikaj kampa Dios mosiajkaua, uan katli achtoui kinmatiltijkej nopa kuali tlamachtili amo kalajkej pampa amo tlaneltokakej,
7 yaya sampa kiixtlalia se tonali ipan nopa salmo tlen kiijkuilok David kampa kiijtoua “nama” kema ya panotoya miak tonali. Sanse kej ya moijtok ipan ni carta: “Tlaj nama inmojuantij inkikakij itoskak, amo ximochiuakaj intochontikej”.*
8 Pampa tlaj Josué kinuikatoskia kampa ueliskia mosiajkauasej, teipa Dios ayokmo kiijtojtoskia onka seyok tonali.
9 Uajka nojua onka se tonali sábado para ma mosiajkauakaj katli itstokej ipan ialtepe Dios.
10 Pampa nopa maseuali katli kalaktok kampa Dios mosiajkaua, nojkia mosiajkajtok tlen iteki sanse kej Dios kichijtok.
11 Yeka, ma tijchiuakaj nochi tlen tiuelij para tikalakisej kampa Dios mosiajkaua, para yon se ma kichiua kej katli amo tlaneltokakej.
12 Pampa itlajtol Dios yoltok uan tekiti ika miak chikaualistli. Más tlateki que tlen ueli espada tlen onkak tlatentili uan kalaki ipan se maseuali para kinextis tlen kipia iyolijtik* uan kej nesi,* kixeloua tosasalijya ika tlen eltok iijtik toomiyo, uan ueli kinextia tlen timoyoliljuiaj uan tlen kineki toyolo.
13 Uan yon se tlamantli tlen kichijchijtok motlatijtok iixpa, nochi tlamantli eltok tlanemijya uan nochi ualnestok iixpa Dios, katli tijmakasej cuenta.
14 Uajka, pampa tijpiaj se ueyi sumo sacerdote katli kalaktok iluikak, Jesús, katli eli iKone Dios, ma tijsentokilikaj titematiltisej tlen ya ininixpa sekinok.
15 Pampa amo tijpiaj se sumo sacerdote katli amo ueli techteikneltiitas* pampa tielij titlajtlakolejkej, tijpixtokej se sumo sacerdote katli kiijiyouijtok miak tlamantli sanse kej tojuantij, pero ya amo kipixki tlajtlakoli.
16 Yeka, ma timotemachikaj uelis timonechkauisej ipan iueyi silla Dios katli kinextia ueyi iyolo ika nochi maseualmej,* para ma techtlasojtla uan ma kinexti ueyi iyolo ika tojuantij ipan nopa tlalochtli* kema más moneki ma techpaleui.
Tlen ijkuilijtok tlatsintla
^ Kanajya kiijtouaj “toTeotsij”.
^ O “nimotestigojketski”.
^ Ni kiijtosneki kema pejkej tlakatij ininkoneuaj Adán uan Eva.
^ Ika griego “amo xijchiuakaj tetik inmoyolo”.
^ O “para kixelos espíritu”. Xikita chikaualistli; espíritu.
^ Kanajya kiijtouaj “techtlayokolis”.
^ O “temaka tlateochiualistli tlen amo kinamiki tijselisej”.
^ Kanajya kiijtouaj “tlatoktsi”.
