Nopa carta tlen kintitlanilijkej hebreos 6:1-20
-
“Ma tijchiuakaj kampeka nojua más kuali titlaneltokasej” (1-3)
-
Katli ayokmo tlaneltokaj sampa kilavosminaj iKone Dios ipan se kuauitl (4-8)
-
Moneki senkistok inmotemachisej ipan tlen inkiselisej (9-12)
-
Dios kichiuas tlen kitenkajtok (13-20)
-
Tlen Dios kitenkajki uan tlen kitestigojketski amo mopatla (17, 18)
-
6 Yeka, pampa nama ya titlaneltokatokej ipan tlen achtoui timomachtijkej tlen Cristo, ma tijchiuakaj kampeka nojua más kuali titlaneltokasej* uan ayokmo kejuak sampa ma tijtsinpeualtikaj totlaneltokilis, nopa kiijtosneki ayokmo moneki sampa ma techmachtikaj para timoyolkuepasej uan ayokmo tijchiuasej tlamantli tlen eli san tlapik, titlaneltokasej ipan Dios,*
2 timoatsonpoliuiltisej, kema toikniuaj kitlaliaj ininmax ipani se akajya, kema moyolkuisej katli miktokej uan kema Dios tetlajtolsenkauas para nochipa.
3 Ya nopa tijchiuasej, tlaj Dios techkauas.
4 Pampa itstokej se keskij katli achtouia Dios kinmakatoya tlauili, kiselijkej nopa regalo tlen uala iluikak uan nojkia ichikaualis Dios,*
5 kiselijkej itlajtol tlen tlauel kuali uan kiitakej nopa tlateochiualistli tlen onkas ipan nopa tonali* tlen ualas teipa
6 pero ayokmo tlaneltokakej, inijuantij ayokmo uelis sampa kinyolkuisej para ma moyolkuepakaj, pampa sampa kilavosminaj iKone Dios ipan se kuauitl uan kichiuaj ma kipinajtikaj ininixpa nochi maseualmej.
7 Pampa kema miakpa uetsi atl eli se tlateochiualistli tlen Dios kimaka nopa tlali, kichichina nopa atl uan teipa kichiua ma ixua pilxiuitsitsij tlen kinpaleuia katli kitojkej.
8 Pero tlaj nopa tlali san kiixualtia uitstli uan xiuitl tlen amo kuali, ayokmo kipatiitaj uan nechka Dios kitelchiuas, uan teipa kitlatisej.
9 Pero noikniuaj katli niinmechiknelia, maske kiampa tikijtouaj, timotemachiaj inmojuantij inkichiuaj tlen más kuali, tlamantli tlen kichiua ximomakixtikaj.*
10 Pampa Dios amo kichiua tlen amo xitlauak uan amo kiilkaua tlen inkichijtokej yon kenijkatsa inkinextijkej inkiikneliaj itoka kema inkinpaleuijkej katli yaya kiniyokatlalijtok* uan nojua inkinpaleuiaj.
11 Pero tijnekij sejse tlen inmojuantij nojkia kiampa ma tekitito ika nochi iyolo, para senkistok inmotemachisej ipan tlen inkichiaj inkiselisej hasta kema moaxitis,
12 uan kiampa amo intlatsiuisej, más kuali, inkichiuasej sanse kej katli tlaneltokakej uan kipixkej ininyolo uan yeka kiselijkej tlen kintenkauilijtoyaj.
13 Pampa kema Dios kitenkauilik Abrahán para kiteochiuaskia, ya iselti motestigojketski, pampa amo ueliyaya kitestigojketsas seyok katli más ueyi que ya.
14 Kiiljuik: “Nelnelia nimitsteochiuas uan nelnelia nijchiuas tlauel ma momiakilikaj moteipaixuiuaj”.
15 Kiampa Abrahán kiselik tlen kitenkauilijkej kema ya kinextijtoya kipia iyolo.
16 Pampa maseualmej kitestigojketsaj se katli más ueyi que inijuantij, uan tlen kitenkauaj kichiua ma tlami tlen ueli kualantli, pampa kinpaleuia ma kinextikaj temachtli kichiuasej tlen kitenkajtokej.
17 Nojkia kiampa panok kema Dios kinejki xitlauak kinnextilis katli kiseliskiaj tlen kitenkajtoya para ya amo kipatla tlen mosentlalijtok kichiuas, uan kinextik temachtli kiaxitis kema tlatestigojketski.
18 Kichijki nopa uan kiampa ika nopa ome tlamantli tlen amo mopatla uan tlen ika Dios amo kema istlakatiskia, katli tiajtokej kampa Dios para timomanauisej uelis tlauel timoyolchikauasej para timotlatskilisej ipan tlen tijchiaj tijselisej tlen eltok toixpa.
19 Tlen tijchiaj tijselisej eli temachtli uan amo kema mopatla, uan techpaleuia ipan tonemilis* kej se tepostli tlen ika kinketsaj barcos, uan kalaki kampa kiixkotonaj nopa cortina,
20 kampa Jesús kalajki más achtoui que tojuantij para kitlapos uan kikualchijchiuas se ojtli para tojuantij. Uan nama eli sumo sacerdote para nochipa sanse kej eliyaya Melquisedec.
Tlen ijkuilijtok tlatsintla
^ O “más tijtetilisej totlaneltokilis”.
^ Kanajya kiijtouaj “toTeotsij”.
^ O “espíritu santo”.
^ O “ximomanauikaj”.
^ O “tlatsejtseloltikej”.
