Nopa carta tlen kintitlanilijkej hebreos 9:1-28
9 Pero nopa tlajtolsenkaualistli* tlen achtouia eltoya kipiayaya piltlanauatiltsitsij tlen kiijtouayaya kenijkatsa kichiuaskiaj nopa tekitl tlen ika kiueyichiuaskiaj Dios* uan nojkia kipiayaya se lugar tlatsejtseloltik ipan Tlaltipaktli.
2 Kichijchijkej nopa achtoui cuarto tlen nopa yoyonkali,* kampa eltoya nopa tlauilketsali, nopa mesa uan nopa pantsi tlen kimaktiliaj Dios; kiiljuiyayaj Kampa Tlatsejtseloltik.
3 Pero ika iika nopa seyok cortina eltoya nopa ompa cuarto tlen nopa yoyonkali, tlen kiiljuiyayaj Kampa Más Tlatsejtseloltik.
4 Nopaya eltoya se tlikomitl* tlachijchiuali ika oro uan eltoya nopa kuakajo kampa eltoya tlajtolsenkaualistli* tlen kitlamipolojtoyaj* ika oro. Uan iijtiko nopa kuakajo eltoya nopa xarro tlachijchiuali ika oro tlen kipixtoya maná, ikuatopil Aarón tlen chamanki uan nopa tepatlaktli kampa ijkuilijtoya nopa tlajtolsenkaualistli,
5 uan iixko* nopa kuakajo kintlalijtoyaj nopa yejyektsitsij querubines tlen kitsakuayayaj ika ininekauil* nopa lugar kampa moyoltlaliyayaj iuaya Dios.* Pero namantsi amo kinamiki kuali ma niinmechixtomili sejse tlen nopa tlamantli.
6 Kema ya kikualtlalijtoyaj nochi nopa tlamantli, nopa sacerdotes ajachika* kalakiyayaj ipan nopa achtoui cuarto tlen nopa yoyonkali* para kichiuasej nopa tekitl tlen ika kiueyichiuaj Dios,
7 pero ipan nopa ompa cuarto nopa sumo sacerdote san sempatsi kalakiyaya ipan se xiuitl. Ya iselti kalakiyaya, uan nochipa kiuikayaya nopa estli tlen temaktiliyaya por ya uan por nopa tlajtlakoli tlen maseualmej kichiuayayaj pampa amo kimatiyayaj tlake kuali uan tlake amo.
8 Kiampa, ichikaualis Dios* kichiua ma tijkuamachilikaj nopa ojtli tlen teuika kampa tlatsejtseloltik, ayamo tlapojtoya* kema nojua eltoya nopa achtoui yoyonkali.
9 Ni yoyonkali san kiixnextia se keski tlamantli ipan ni tonali, uan hasta nama nojua kisentokiliaj temaktiliaj ofrendas* uan tlapialmej. Pero nopa tlamantli amo kichiua ma eli senkistok tlapajpaktik itlalnamikilis nopa tlakatl katli kichiua nopa tekitl tlen ika kiueyichiua Dios.
10 Tlen temaktiliyayaj san eliyaya tlakualistli, tlen kiiyayaj* uan kenijkatsa kipajpakayayaj tlamantli uan nojkia inintlakayo, kej kiijtoua nopa tlanauatili. Nopa piltlanauatiltsitsij kitlalijtokej para se keski tlamantli tlen eltok ipan Tlaltipaktli, uan monekiyaya kineltokasej hasta nopa tonali tlen kiixtlalijtokej para kixitlauasej nochi tlamantli.
11 Pero kema Cristo ualajki kej sumo sacerdote tlen nopa kuali tlamantli tlen ya moaxitijtok, kalajki ipan nopa yoyonkali* tlen más ipati uan tlen más kuali, tlen maseualmej amo kichijchijtokej ika ininmax, nopa kiijtosneki amo eltok ipan ni Tlaltipaktli.
12 Ya kalajki san sempatsi uan para nochipa kampa tlatsejtseloltik, pero amo kalajki ika inineso chivojmej uan piltorojtsitsij, kalajki ika ya ieso uan kiampa kichijki ma techmakixtikaj* para nochipa.
13 Pampa tlaj inineso chivojmej uan torojmej uan ikuajnexo se piluakaxtsi* tlen kintsejtseljuiliaj katli mochijtokej sokiyokej kichiua ma eli tlapajpaktik inintlakayo,
14 uajka achi más ieso Cristo kipajpakchiuas totlalnamikilis tlen nochi tlamantli tlen eli san tlapik para uelis tijtekipanosej Dios katli yoltok. Pampa Cristo kikajki ma kiyakana ichikaualis Dios* tlen amo kema tlami, uan yeka motemaktilik kej se tlamantli tlen amo kipia yon kentsi tlajtlakoli.
15 Yeka ya motlajkoketsa* para ma mochiua se yankuik tlajtolsenkaualistli uan kiampa katli kinnotstokej, nama Dios uelis kintenkauilis kiselisej tlateochiualistli tlen uejkauas para nochipa, pampa se akajya mijki para tlaxtlauas uan kiampa kinmakixtik katli tlaixpanokej kema nojua moyakanayayaj ika nopa achtoui tlajtolsenkaualistli.
16 Kema mochiua se tlajtolsenkauali, moneki mikis katli kitenkaua,
17 pampa nopa tlajtolsenkauali san kipia ipati ika mikilistli* uan amo tlapaleuia tlaj nojua yoltok katli kichijki nopa tlajtolsenkauali.
18 Uajka, nopa achtoui tlajtolsenkaualistli nojkia amo tlapaleuijtoskia tlaj amo onkatoskia estli.
19 Pampa kema Moisés ya kiniljuijtoya nochi israeleuanij nochi nopa piltlanauatiltsitsij tlen eltok ipan nopa Tlanauatili, kikuik inineso piltorojtsitsij uan chivojmej uan kimanelok ika atl. Uan kitekiuik borregojmej ininpochkiyo* tlen nelchichiltik uan pilxiuitsitsij tlen kiiljuiaj hisopo uan kiatseljuik nopa amamimili uan nochi israeleuanij,
20 uan kiijtok: “Ya ni nopa estli tlen ika mochiuas nopa tlajtolsenkaualistli tlen Dios inmechnauatijtok xijneltokakaj”.
21 Nojkia, ika nopa estli kiatseljuik nopa yoyonkali* uan nochi tlamantli tlen kitekiuiskiaj para kiueyichiuasej Dios.
22 Kena, kej kiijtoua nopa Tlanauatili, miak tlamantli mochiua tlapajpaktik ika estli, uan tlaj amo kitoyauaj estli, amo kintlapojpoljuiaj.
23 Yeka, monejki kitlapajpakchiuasej tlen kiixnextia tlen onka ipan iluikaktli ika inineso tlapialmej tlen temaktiliaj, pero tlen onka ipan iluikak san motlapajpakchiua kema temaktiliaj tlen achi más kuali.
24 Pampa Cristo amo kalajki ipan se lugar tlatsejtseloltik tlen maseualmej kichijchijtokej, tlen san kiixnextia tlen eltok iluikak, ya kalajki iluikak yeka nama monextia iixpa Dios para techtenpaleuis.*
25 Ni amo mochijki para miakpa ma motemaktili, kej kema nopa sacerdote kalaki kampa tlatsejtseloltik sejse xiuitl ika estli tlen amo eli ieso.
26 Tlaj amo kiampa eliskia, monektoskia miakpa tlaijiyouis desde kema pejki Tlaltipaktli.* Pero nama monextijtok san sempatsi uan para nochipa ipan itlamia* ni tonali* para kitlamiixpolos tlajtlakoli pampa temaktilik inemilis.
27 Uan sanse kej maseualmej mikij san se uelta, pero teipa kintlajtolsenkauaj,
28 nojkia kiampa pano ika Cristo, ya motemaktilik san sempatsi para kiuikas inintlajtlakoljuaj miakej maseualmej, uan kema ika ompa monextis ayokmo monekis kiixpolos nopa tlajtlakoli, uan kiitasej katli kichixtokej ika nochi ininyolo para ma kinmakixti.
Tlen ijkuilijtok tlatsintla
^ O “nopa kamanali”.
^ Kanajya kiijtouaj “toTeotsij”.
^ O “tabernáculo”.
^ Kanajya kiijtouaj “popochkomitl”.
^ O “arca del pacto”.
^ Kanajya kiijtouaj “kitlamitlalilijtoyaj”.
^ Kanajya kiijtouaj “ipani”.
^ Kanajya kiijtouaj “ininakauilo”.
^ O “itsajka nopa kuakajo”, “kampa kiixtsakuayayaj tlajtlakoli”.
^ Kanajya kiijtouaj “ijiksa”.
^ O “tabernáculo”.
^ O “espíritu santo”.
^ O “monextijtoya”.
^ Kanajya kiijtouaj “tlakajkaualistli”.
^ Kanajya kiijtouaj “kiijiyayaj”.
^ O “tabernáculo”.
^ O “ma techmanauikaj”.
^ O “novillona”.
^ O “espíritu santo”.
^ O “moketsa tlatlajko”.
^ Ni kiijtosneki imikilis se maseuali o se tlapiali.
^ Kanajya kiijtouaj “ininichkayo”.
^ O “tabernáculo”.
^ Kanajya kiijtouaj “techtemanauis”.
^ Ni kiijtosneki kema pejkej tlakatij ininkoneuaj Adán uan Eva.
