Hechos (Tlen apóstoles kichijkej) 11:1-30
11 Uajka, nopa apóstoles uan toikniuaj katli itstoyaj ipan Judea kikajkej maseualmej katli amo elij judíos nojkia kiselijtoyaj itlajtol Dios.*
2 Yeka, kema Pedro ixtlejkok para Jerusalén, nopa tlakamej katli tlauel kinekiyayaj ma mochiuilikaj circuncisión* pejkej kitlaijiljuiaj.
3 Kiiljuiyayaj: “Tikalajki ininchaj nopa tlakamej katli amo mochiuilijtokej circuncisión uan titlakuajki ininuaya”.
4 Uajka Pedro pejki kinixtomilia nochi tlen panotoya. Kiniljuik:
5 “Kema niitstoya ipan altepetl Jope uan nimomaijtouayaya,* nikitak se tlanextilili kej se temiktli. Nikitak se tlamantli tlen nesiyaya kej se ueyi yoyomitl tlen lino tlen najkak kiitskitoyaj* uan ualtemoyaya tlen iluikak uan asiko kampa na niitstoya.
6 Kuali nijtlachilik uan ipani nikinitak tlapialmej katli nemij ika naui ininikxi, kuatitlantlapialmej, tlapialmej katli mouauatatsaj uan totomej.
7 Nojkia nijkajki itoskak se akajya katli kiijtok: ‘¡Ximoketsa Pedro, xikinmikti uan xikinkua!’.
8 Pero na nitlanankilik: ‘Amo noTeko. Ipan nokamak amo kema kalaktok se tlamantli tlen sokiyo o amo tlapajpaktik’.
9 Uajka katli kamanaltik tlen iluikak, sampa kiijtok: ‘Ayokmo xikijto para sokiyo nopa tlamantli tlen Dios ya kichijki tlapajpaktik’.
10 Kiampa panok ika expa, uan nochi nopa tlamantli sampa kiuikakej iluikak.
11 Ipan nopa tlalochtli,* eyij tlakamej katli ualayayaj tlen Cesarea uan kintitlantoyaj ma nechtemotij, asitoj ipan nopa kali kampa timokauayayaj.
12 Dios nechiljuik ika ichikaualis* ma nia ininuaya uan amo ma nimoiljuijto tlaj kena nias o amo. Nojkia yajkej nouaya ni chikuasej toikniuaj, uan tikalajkej ichaj nopa tlakatl.
13 ”Ya techpouilik ipan ichaj kiitstoya se ángel katli kiiljuik: ‘Xikintitlani se keskij tlakamej ma yakaj Jope para kiualikasej se tlakatl katli motokaxtia Simón, katli nojkia kiiljuiaj Pedro,
14 uan ya mitsiljuis kenijkatsa uelis inmomakixtisej* ta uan katli itstokej mochaj’.
15 Pero kema pejtoya nikamanalti, ichikaualis Dios* temok kampa inijuantij, sanse kej achtouia temok ipan tojuantij.
16 Ipan nopa tlalochtli nikilnamijki tlen toTeko kiijtouayaya: ‘Juan teatsonpoliuiltik ika atl, pero inmojuantij inmechatsonpoliuiltisej ika ichikaualis Dios’.
17 Yeka, tlaj Dios kinmakak nopa regalo sanse kej techmakak tojuantij, katli titlaneltokaj ipan toTeko Jesucristo, ¿ajkia nieli na para nijtsakuilis Dios?”.
18 Kema kikajkej nopa, inijuantij ayokmo tleno kiijtojkej uan kiueyichijkej Dios. Kiijtojkej: “¡Uajka Dios nojkia kinkauilijtok maseualmej katli amo elij judíos ma moyolkuepakaj para kipiasej nemilistli!”.
19 Nopa tlaneltokanij katli mosemantoyaj* pampa pejkej kintlaijiyouiltiaj kema Esteban kimiktijkej, asitoj hasta Fenicia, Chipre uan Antioquía, pero inijuantij san kinmatiltiyayaj nopa tlamachtili katli eliyayaj judíos.
20 Pero itstoyaj se keskij tlen inijuantij katli euayayaj Chipre uan Cirene katli yajkej Antioquía, uan pejkej kinkamanaljuiaj maseualmej katli kamanaltiyayaj griego uan kinmatiltijkej nopa kuali tlamachtili tlen toTeko Jesús.
21 Uan Jehová* itstoya ininuaya, uan miakej maseualmej pejkej tlaneltokaj uan kitokilijkej toTeko.
22 Ni tlamantli kimatkej toikniuaj ipan tlanechikoli tlen Jerusalén, uan inijuantij kititlankej Bernabé ma yaui Antioquía.
23 Kema asito uan kiitak Dios kinextijtoya ueyi iyolo ika inijuantij,* tlauel yolpajki uan kinyolchikajki para ma moneltlalikaj kitokilisej toTeko ika nochi ininyolo uan amo ma kitlauelkauakaj,
24 pampa Bernabé eliyaya se kuali tlakatl katli kipiayaya miak ichikaualis Dios uan kuali tlaneltokayaya. Uan tlauel miakej pejkej tlaneltokaj ipan toTeko.
25 Uajka Bernabé yajki Tarso para kitemoti Saulo hasta kipantis.
26 Kema kipantik, kiuikak Antioquía. Uan se xiuitl mosentilijkej ininuaya toikniuaj tlen tlanechikoli uan kinmachtijkej tlauel miakej maseualmej. Nopaya ipan Antioquía nopa tlaneltokanij pejkej kintokaxtiaj Cristo itokilijkauaj ika achtoui uelta, pampa Dios kiampa kichijki.
27 Ipan nopa tonali, ixtemokej para Antioquía se keskij teokamanalouanij* katli ualayayaj tlen Jerusalén.
28 Se tlen inijuantij, katli motokaxtiyaya Ágabo, moketski uan ichikaualis Dios kichijki ma kiijto ipan nochi Tlaltipaktli nechka onkaskia se ueyi mayantli, tlen nelia panok kema Claudio tlanauatiyaya.
29 Yeka Jesús itokilijkauaj kiijtojkej sejse tlen inijuantij kititlaniskia tlen ueliskia para kinpaleuisej toikniuaj katli itstoyaj ipan Judea.
30 Uan ya nopa kichijkej. Kintitlankej Bernabé uan Saulo para ma kinuikilikaj ueuejtlakamej nochi tlen kisentilijtoyaj.
Tlen ijkuilijtok tlatsintla
^ Kanajya kiijtouaj “toTeotsij”.
^ Xikita circuncisión.
^ Kanajya kiijtouaj “nimotlatlajtiyaya”.
^ O “kiitskitoyaj ika naui lados”.
^ Kanajya kiijtouaj “tlatoktsi”.
^ O “iespíritu”.
^ O “inmomanauisej”.
^ O “espíritu santo”.
^ Kanajya kiijtouaj “kampa ueli yajkej”.
^ O “kinmakatoya tlateochiualistli tlen amo kinamikiyaya kiselisej”.
^ O “profetas”.
