Hechos (Tlen apóstoles kichijkej) 14:1-28
14 Ipan Iconio kalajkej sansejko kampa tlaueyichiuaj judíos, uan kej kamanaltikej, kichijki miakej judíos uan griegos ma tlaneltokakaj.
2 Pero judíos katli amo tlaneltokakej kinajkomankej* katli amo elij judíos para ma kinkualankaitakaj toikniuaj.
3 Uajka inijuantij mokajkej se keski tonali nopaya, uan Jehová* kinmakak tlanauatili para amo ma majmauikaj tematiltisej ya kinextia ueyi iyolo.* Uan kinextiyaya nelnelia kintitlantoya pampa kinkauayaya ma kichiuakaj milagros* uan uejueyi tlamantli.
4 Pero maseualmej tlen nopa altepetl moxelojkej, sekij kinpaleuiyayaj judíos uan sekinok apóstoles.
5 Katli amo eliyayaj judíos mosentilijkej ininuaya judíos uan inintlayakankauaj uan moiljuijkej kenijkatsa kintlaijiyouiltiskiaj uan kintepachoskiaj* Pablo uan Bernabé.
6 Pero kema inijuantij kimatkej, mochololtijkej para Listra uan Derbe, altepemej tlen tlali Licaonia, uan pilaltepetsitsij tlen nechka mokaua.
7 Uan nopaya nojua kimoyajkej nopa kuali tlamachtili.
8 Ipan Listra itstoya se tlakatl katli amo ueliyaya kiolinia iikxi uan san moseuijtoya. Kiampa tlakatki uan amo kema nejnentoya.
9 Ni tlakatl kitlakakilijtoya tlen Pablo kiijtouayaya. Uajka Pablo kiixtlachilik uan kiitak tlaneltokayaya para ueliskia mochikauas,
10 yeka chikauak kiiljuik: “Ximoketsa”. Uan nopa tlakatl moketstiuetski uan pejki nejnemi.
11 Kema maseualmej kiitakej tlen Pablo kichijtoya, kuatsajtsikej ika tlajtoli licaónica: “¡Todioses mokueptokej tlakamej uan temotokej kampa tojuantij!”.
12 Yeka, Bernabé pejkej kiiljuiaj Zeus, pero Pablo kiiljuiyayaj Hermes, pampa ya nochipa kamanaltiyaya.
13 Uan nopa sacerdote katli itstoya ipan Zeus itemplo, tlen eltoya kampa kalakij ipan nopa altepetl, kinualikak kampa puerta torojmej uan xochicoronas, uan ya uan nopa maseualmej kinekiyayaj kinmiktilisej tlapialmej.
14 Kema nopa apóstoles Bernabé uan Pablo kimatkej, kitsayankej ininyoyo uan motlalojtejkej uan kalakitoj tlatlajko kampa maseualmej uan kuatsajtsikej:
15 “Tlakamej, ¿kenke inkichiuaj ni tlamantli? Tojuantij nojkia timaseualmej uan titlaijiyouiaj sanse kej inmojuantij. Tiinmechmatiltiaj nopa kuali tlamachtili para xijkauakaj ni tlamantli tlen san tlapik uan amo tepaleuia, uan xijueyichiuakaj* Dios* katli yoltok, katli kichijchijki iluikaktli, Tlaltipaktli, mar uan nochi tlen nopaya onka.
16 Uejkajkia, kinkauilik katli amo eliyayaj judíos ma kichiuakaj tlen kinekiyayaj,
17 pero ya nochipa kinextiyaya ajkia eli, pampa nochipa kichiuayaya tlen kuali. Kichijki ma uetsi atl, tlauel ma tlaeli, kinmakak miak tlakualistli uan kichijki tlauel ma yolpakikaj”.
18 Pero maske kiampa kiniljuijkej, ika ouij kichijkej maseualmej ayokmo ma kinekikaj kinmiktilisej tlapialmej.
19 Uajka asitoj se keskij judíos katli euayayaj Antioquía uan Iconio uan kichijkej maseualmej ma kikualankaitakaj Pablo. Yeka kitepachojkej uan kiuauatatskej hasta altepeteno pampa moiljuijkej ya kimiktijtoyaj.
20 Pero kema Jesús itokilijkauaj kiyaualojkej, ya moketski uan kalajki ipan nopa altepetl. Ika ualmostla* Pablo uan Bernabé yajkej Derbe.
21 Kema ya tematiltijtoyaj nopa kuali tlamachtili ipan nopa altepetl uan ya kinpaleuijtoyaj miakej ma mochiuakaj Jesús itokilijkauaj, tlakuepilijkej Listra, Iconio uan Antioquía.
22 Nopaya kinyolchikajkej Jesús itokilijkauaj uan kinyololinijkej nojua kuali ma tlaneltokatokaj uan kiniljuijkej: “Moneki tikixnamikisej miak tlaouijkayotl para tikalakisej ipan iTlanauatijkayo Dios”.
23 Nojkia, ipan sejse tlanechikoli kintlalijkej ueuejtlakamej, momaijtojkej* uan mosajkej,* uan kinkajkej imako Jehová,* katli ipan tlaneltokakej.
24 Teipa kiixkotonkej tlali Pisidia uan kalajkej ipan tlali Panfilia
25 uan kema ya kimoyajtoyaj itlajtol Dios ipan altepetl Perga, temokej altepetl Atalia.
26 Nopaya tlejkokej ipan barco uan yajkej Antioquía, kampa achtouia toikniuaj kitlajtlanijtoyaj Dios ma kinteochiua* Bernabé uan Pablo para ma kichiuakaj nopa tekitl tlen sanok kitlamiltijtoyaj.
27 Kema asitoj uan kinsentilijkej toikniuaj tlen tlanechikoli, kinpouilijkej kenijkatsa Dios kintekiuik para kichiuasej miak tlamantli. Nojkia kinpouilijkej kenijkatsa Dios kinpaleuijtoya katli amo elij judíos para nojkia ma tlaneltokakaj ipan ya.
28 Uan mokajkej miak tonali ininuaya Jesús itokilijkauaj.
Tlen ijkuilijtok tlatsintla
^ O “kichijkej ma kualanikaj”.
^ O “temaka tlateochiualistli tlen amo kinamiki tijselisej”.
^ Ika griego “tlaneskayotl”.
^ Kanajya kiijtouaj “kinmotlaskiaj ika tetl”.
^ O “ximokuepakaj ika”.
^ Kanajya kiijtouaj “toTeotsij”.
^ Kanajya kiijtouaj “Mostlaijki”, “Kema tonilik”.
^ Kanajya kiijtouaj “motlatlajtijkej”.
^ Kanajya kiijtouaj “amo tlakuajkej”.
^ Ika griego “ma kinexti ueyi iyolo ika”.
