Hechos (Tlen apóstoles kichijkej) 25:1-27
25 Kema ya kipixtoya eyi tonali ika asitoya ipan nopa altepetl uan pejtoya tlanauatia, Festo kistejki Cesarea uan tlejkok para Jerusalén.
2 Uajka nopa sacerdotes katli kipiaj tlanauatili uan judíos katli más kintlepanitayayaj pejkej kitlateljuiaj Pablo. Uan pejkej kitlajtlaniaj Festo
3 tlaj ueliskia tlanauatis ma kiualikakaj Pablo para Jerusalén. Pero inijuantij moiljuijtoyaj kichiatij* Pablo para kimiktisej ipan ojtli.
4 Uajka Festo kiniljuik Pablo monekiyaya mokauas tsaktok ipan Cesarea uan ya nojkia amo uejkauaskia tlakuepilis nopaya.
5 Uan nojkia kiijtok: “Xitemokaj nouaya katli inkipiaj tlanauatili, uan tlaj nopa tlakatl nelia kichijtok se tlamantli tlen amo kuali, xikijtokaj ika tlake inkitlateljuiaj”.
6 Kema ya panotoya se chikueyi o matlaktli tonali itstoya ininuaya, ixtemok Cesarea. Ika ualmostla* moseuik kampa tetlajtolsenkaua uan tlanauatik ma kiualikakaj Pablo kampa ya.
7 Kema Pablo kalajki, nopa judíos katli ixtemotoyaj tlen Jerusalén kiyaualojkej uan pejkej kitlateljuiaj, kiijtouayayaj kichijtoya miak tlamantli tlen tlauel amo kuali pero amo ueliyayaj kinextiaj tlaj nelia tlen kiijtouayayaj.
8 Uajka Pablo pejki motenpaleuia* uan kiijtok: “Na amo nijchijtok yon se tlajtlakoli tlen ika nikixpanotok ininTlanauatil judíos yon nikixpanotok teokali yon Tlanauatijketl tlen Roma”.*
9 Festo kinekiyaya judíos kuali ma kiitakaj, yeka kiiljuik Pablo: “¿Tijneki tias Jerusalén para ma nimitstlajtolsenkaua nopaya ika ni tlamantli?”.
10 Uan Pablo kiiljuik: “Niitstok iixpa kampa tetlajtolsenkaua Tlanauatijketl tlen Roma* uan nikaj moneki ma nechtlajtolsenkauakaj. Kej tikitstok, amo nijchijtok yon se tlamantli tlen amo kuali tlen ika nikinixpanotok judíos.
11 Tlaj nelnelia nieli se tlaixpanoketl uan nijchijtok se tlamantli tlen ika kinamiki ma nechmiktikaj, amo nitlajtlani ma nechmakixtikaj* para amo nimikis. Pero tlaj ni tlakamej amo uelis kinextisej tlaj nelia melauak tlen ika nechtlateljuiaj, amo aka uelis nechtemaktilis ininmako san para kinyolpakiltis. ¡Nitlajtlani ma nechtlajtolsenkaua Tlanauatijketl tlen Roma!”.*
12 Uajka Festo mokamanaljuik ininuaya katli kitlajtolmakayayaj, uan teipa kinankilik: “Titlajtlantok ma mitstlajtolsenkaua Tlanauatijketl tlen Roma,* uajka yaya mitstlajtolsenkauas”.
13 Kema panok se keski tonali, tlanauatijketl Agripa uan Berenice asitoj Cesarea pampa kipaxalotoj Festo.
14 Inijuantij mokauaskiaj se keski tonali nopaya, yeka Festo kipouilik nopa tlanauatijketl tlen panoyaya ika Pablo. Kiiljuik:
“Nikaj itstok se tlakatl katli Félix kikajtejki tsaktok,
15 uan kema niitstoya Jerusalén, nopa sacerdotes katli kipiaj tlanauatili uan katli kinyakanaj judíos nechpouilijkej tlen kichijtoya Pablo uan nechtlajtlanijkej ma nijtlatsakuilti.
16 Pero na nikinnankilik para nopa tlanauatili tlen Roma kiijtoua amo uelis kitemaktilisej se katli kitlateljuijtokej san para kiyolpakiltisej se akajya. Moneki achtoui kikauasej ma motenpaleui ininixpa katli kitlateljuiaj.
17 Yeka, kema asikoj nikaj amo nimotonalpolok, uan ika ualmostla nimoseuik kampa nitetlajtolsenkaua uan nitlatitlanki ma kiualikakaj noixpa nopa tlakatl.
18 Uajka moketskej katli kitlateljuiyayaj, pero amo kitlateljuijkej ika yon se tlamantli tlen amo kuali tlen na nimoiljuiyaya kichijtoya.
19 Nikitak san mokualanijtoyaj iuaya pampa amo sanse kiueyichiuaj inindios* uan nojkia pampa kamanaltij tlen se tlakatl katli itoka Jesús, katli mijki, pero Pablo kiijtoua temachtli yoltok.
20 Na yon kentsi nijmatiyaya kenijkatsa nijsenkauaskia ni kuesoli, yeka nijtlatsintokik tlaj kinekiyaya yas Jerusalén para ma kitlajtolsenkauakaj nopaya ika tlen kitlateljuijtoyaj.
21 Pero Pablo tlajtlanki ma kitlajtolsenkaua Tlanauatijketl tlen Roma* uan nojkia tlajtlanki mokauas tsaktok hasta kema kimatiskia tlake kichiuaskia Augusto,* yeka nitlanauatik ma kitsaktokaj hasta kema nijtitlaniskia kampa Tlanauatijketl tlen Roma”.*
22 Uajka Agripa kiiljuik Festo: “Na nojkia nechpaktiskia nijkakis tlen kiijtos nopa tlakatl”. Ya kinankilik: “Mostla tijkakis tlen kiijtos”.
23 Ika ualmostla asitoj Agripa uan Berenice uan moueyimatiyayaj pampa kinchiuilijtoyaj miak tlamantli para kinselisej ika miak tlatlepanitakayotl, uan kalajkej kampa tetlajtolsenkauayayaj, ininuaya ualayayaj uejueyij tlayakananij tlen soldados* uan tlakamej katli más kintlepanitayayaj ipan nopa altepetl. Uajka Festo tlanauatik ma kiualikakaj Pablo kampa ya itstoya.
24 Uan Festo kiijtok: “Tlanauatijketl Agripa uan nochi katli nikaj initstokej touaya, xikitakaj ni tlakatl. Nikaj uan ipan Jerusalén nochi judíos chikauak nechkuatsajtsilijtokej uan tlajtlantokej ma miki.
25 Pero na nikitak para amo kichijtok yon se tlamantli tlen ika kinamiki ma kimiktikaj. Yeka, kema ni tlakatl kiijtok kinekiyaya Augusto ma kitlajtolsenkaua, nikijtok nijtitlaniskia kampa ya.
26 Pero amo nijmati tlake tlamantli nijtlajkuiljuilis noTlanauatijka.* Yeka, nijnextia inmoixpa, pero más moixpa ta, tlanauatijketl Agripa, kiampa kema tlamis tijtlatsintokis, nijmatis tlake nikijkuilos.
27 Pampa nimoiljuia amo kinamiki nijtitlanis se katli tsaktok uan amo nikijtos ika tlake kitlateljuijtokej”.
Tlen ijkuilijtok tlatsintla
^ Kanajya kiijtouaj “kiichtakauisej”.
^ Kanajya kiijtouaj “Mostlaijki”, “Kema tonilik”.
^ Kanajya kiijtouaj “momanauia”.
^ Ika griego “César”.
^ Ika griego “César”.
^ O “ma nechmanauikaj”.
^ Ika griego “César”.
^ Ika griego “César”.
^ O “amo sanse ininreligión”.
^ Ika griego “César”.
^ Nojkia kiampa kiiljuiaj Tlanauatijketl tlen Roma.
^ Ika griego “César”.
^ Katli kinyakanayayaj mil soldados tlen Roma.
^ Ika griego “noTeko”.
