Hechos (Tlen apóstoles kichijkej) 27:1-44
27 Uajka, kiijtojkej tiasej Italia ipan barco, yeka Pablo uan sekinok katli tsaktoyaj kinmaktilijkej imako se tlayakankasoldado* katli motokaxtiyaya Julio, ya itstoya ipan nopa pamitl soldados tlen kiiljuiyayaj pamitl Augusto.
2 Titlejkokej ipan se barco tlen ualayaya altepetl Adramitio, tlen nechka kisaskia para panoti kampa moketsaj barcos ipan tlali Asia, uan tikistejkej. Nojkia ualayaya touaya se tlakatl katli motokaxtiyaya Aristarco uan euayaya altepetl Tesalónica tlen tlali Macedonia.
3 Ika ualmostla* titemokej tlen nopa barco ipan altepetl Sidón. Julio kipixki kuali iyolo ika Pablo uan kikajki ma kinpaxaloti iuampoyouaj* uan nojkia kinkajki inijuantij ma kimokuitlauikaj.
4 Tikistejkej nopaya uan tiajkej ipan barco inechka piltlaltsi Chipre pampa tikixnamikiyayaj nopa ajakatl.
5 Teipa tikixkotonkej mar kampa tlauel uejkatla tlen mokaua nechka tlali Cilicia uan Panfilia, uan timoketsatoj ipan altepetl Mira tlen tlali Licia.
6 Kema nopaya tiitstoyaj, nopa tlayakankasoldado kipantik se barco tlen ualayaya altepetl Alejandría uan yauiyaya Italia, uan technauatik ma titlejkokaj.
7 Nopa barco tlauel yolik yauiyaya, uan kema panok miak tonali ika ouij tiasitoj Cnido. Pero nopa ajakatl amo kikauayaya barco ma yaui chikauak, yeka tiajkej iteno tlali Creta uan tipanokej iixmelak Salmone.
8 Ika ouij tipanotiajkej iteno mar uan tiasitoj kampa kiiljuiaj Bellos Puertos, tlen eltoya nechka altepetl Lasea.
9 Ya panotoya miak tonali uan eliyaya mauilili kinemiltisej barco, pampa ya panotoya nopa tonali kema mosauayayaj.* Yeka Pablo kiniljuik:
10 “Totiyojuaj, nikita tlaj tiasej tlauel titlaijiyouisej uan tijpolosej miak tlamantli, amo san nopa tlamamali tlen tijuikaj uan tobarco, nojkia tonemilis”.
11 Pero nopa tlayakankasoldado kintlakakilik tlen kiijtojkej katli kinemiltiyaya nopa barco uan katli eliyaya iaxka, uan amo tlen Pablo kiijtok.
12 Nopaya kampa moketsaj barcos amo ueliskia timokauasej kema tlaseseyaskia,* yeka miakej katli yauiyayaj ipan nopa barco kiijtojkej ma tikisteuakaj para kiitasej tlaj ueliskia tiasitij altepetl Fenice, kampa moketsaj barcos, uan timokauasej nopaya kema tlaseseyas. Nopa altepetl eltok ipan tlali Creta uan ualtlachixtok ika kampa kisa Tonati.
13 Kema pejki kentsi tlaajaka ika sur, moiljuijkej ueliskiaj asitij kampa kinekiyayaj yasej. Yeka kitlanankej nopa tepostli tlen ika kiketsaj nopa barco uan kiuikakej nechka iteno tlali Creta.
14 Pero amo uejkajki, se chikauak ajakatl tlen kiiljuiaj euroaquilón pejki kitsouiteki.
15 Nopa ajakatl chikauak kikuatopeuayaya barco uan amo ueliyaya yaui xitlauak, yeka ayokmo tleno tijchijkej uan tijkajkej nopa ajakatl ma techuika.
16 Teipa tiajkej inechka se piltlaltsi tlen kiiljuiaj Cauda. Pero maske kiampa tijchijkej, tlauel techouijmakak tijtlejkoltisej nopa pilbarcojtsi* tlen eltoya iika nopa barco.
17 Kema tijtlejkoltijkej nopa pilbarcojtsi, kuali kiyaualilpijkej nopa barco para amo tleno ma kipano. Uan tlauel majmauiyayaj kuatakanisej kampa onka miak xali tlen kiiljuiaj Sirte, yeka kitemouijkej nopa ueyi yoyomitl tlen ika kinemiltiaj barco uan kikajkej ajakatl ma kinuika.
18 Ika ualmostla, pampa nopa ajakatl tlauel chikauak kioliniyaya tobarco, pejkej kimajkauaj ipan mar nopa tlamamali tlen tijuikayayaj para amo tlauel ma etia.
19 Ika ualuiptla kimajkajkej se keski lazos tlen kitekiuiaj ipan barco.
20 Kema ya tijpiayayaj miak tonali amo tikitstoyaj Tonati yon sitlalimej uan se chikauak ajakatl kitsouitekiyaya nopa barco, pejkej timoiljuiaj ayokmo timomanauiskiaj.
21 Katli yauiyayaj ipan barco ya kipiayayaj miak tonali amo tlakuajtoyaj. Uajka Pablo moketski tlatlajko kampa itstoyaj uan kiniljuik: “Totiyojuaj, innechtlakakilijtoskiaj kema niinmechiljuik amo ma tikisteuakaj Creta. Kiampa amo tleno techpanotoskia uan amo tleno tijpolojtoskiaj.
22 Pero nama niinmechtlajtlania amo ximajmauikaj, pampa yon se tlen inmojuantij mikis, san poliuis ni barco.
23 Tlayoua Dios* katli nijtekipanoua uan nijueyichiua kiualtitlanki se ángel katli monextik nonechka
24 uan nechiljuik: ‘Amo ximajmaui Pablo, ta moneki timonextiti kampa Tlanauatijketl tlen Roma.* Uan Dios kichiuas ximomanaui, uan nojkia nochi katli yauij mouaya ipan ni barco’.
25 Yeka, tlakamej, amo ximajmauikaj, pampa nijneltokilia Dios uan nijmati temachtli panos nochi tlen ya nechiljuijtok.
26 Pero ni barco atsonpoliuiti nechka se piltlaltsi”.
27 Ya panotoya 14 youali uan nopa ajakatl kampa ueli kiuikayaya tobarco ipan mar tlen kiiljuiaj Adria. Uan tlajkoyoual, nopa tlakamej katli kiuikayayaj nopa barco, pejkej moiljuiaj monechkauiyayaj iteno mar.
28 Yeka kitlamachijkej* keski iuejkatlanka nopa mar kampa yauiyayaj uan kiitakej kipiayaya 36 metros* iuejkatlanka. Yajkej seyok kentsi uan sampa kitlamachijkej: nama eliyaya kipano 27 metros.*
29 Tlauel kimauiliyayaj* nopa barco ma kuatakani kampa onka tetl, yeka ika iika kimajkajkej naui tepostli tlen ika kiketsaskiaj, uan tlauel kinekiyayaj ma tlanesi.
30 Pero katli kiuikayayaj nopa barco kinekiyayaj cholosej, uan pejkej kitemouiaj ipan mar nopa pilbarcojtsi pampa kiijtouayayaj kimajkauaskiaj ika iixpa nopa barco sekinok tepostli tlen ika kiketsaskiaj, pero san istlakatiyayaj.
31 Uajka Pablo kiniljuik nopa soldados uan inintlayakanka: “Tlaj nopa tlakamej amo mokauaj ipan barco, inmojuantij amo uelis inmomanauisej”.
32 Yeka nopa soldados kikotonkej nopa lazos tlen ika kiilpitoyaj nopa pilbarcojtsi uan kikajkej ma uetsi ipan mar.
33 Kema nechka tlanesiskia, Pablo pejki kiniljuia ma tlakuakaj. Kiniljuik: “Ya inkipiaj 14 tonali inmokuesojtokej uan amo tleno inkikuajtokej.
34 Yeka niinmechiljuia xitlakuakaj para ma inmechpaleui, pampa yon se tlen inmojuantij amo kipolos yon se itsonkal”.
35 Kema tlanki kiijtoua nopa, kikuik se pantsi, kitlaskamatilik Dios ininixpa nochi, kitlajkoitak uan pejki tlakua.
36 Uajka nochi moyolchikajkej uan pejkej tlakuaj.
37 Nochi katli tiitstoyaj ipan barco tieliyayaj 276 maseualmej.
38 Kema kuali ixuikej, kimajkajkej ipan mar nopa trigo tlen kiuikayayaj para amo ma etia nopa barco.
39 Kema tlaneski, amo kimatkej kanke itstoyaj, pero kiitakej nechka eltoya se piltlaltsi kampa kentsi kalakiyaya mar uan atenteno onkayaya miak xali uan moiljuijkej tlaj ueliskia kiuikasej barco hasta nopaya.
40 Uajka kikotonkej nopa lazos tlen ika ilpitoya nopa tepostli tlen ika kiketsaj barco uan kikajkej ma uetsi ipan mar. Nojkia kikaxanijkej tlen ika ilpitoya nopa uapalmej tlen ika kiyakanaj uan kema kitlejkoltijkej nopa yoyomitl tlen eltok iixpa nopa barco para ma kikuatopeua ajakatl, kiuikakej nopa barco hasta atenteno.
41 Kema nopa barco motakanito kampa onkayaya miak xali, kuatakanki. Motentojki uan ayokmo uelki molinia pero ika iika pejki xoleui* pampa nopa atl chikauak kitejtsonayaya.
42 Uajka nopa soldados moiljuijkej kinmiktisej nopa tlakamej katli tsaktoyaj para amo ma ajkikaj uan mochololtisej.
43 Pero katli kinyakanayaya soldados kinekiyaya kimanauis Pablo, yeka amo kinkajki soldados ma kichiuakaj tlen moiljuijtoyaj. Kinnauatik katli yajatiyayaj ajkij ma momajkauakaj ipan mar uan ma asikaj achtoui ipan tlali
44 uan nopa sekinok ma yakaj inintepotsko* uan ma kitekiuikaj uapali o tlen kopeuiyaya ipan barco. Uan kiampa nochi kuali asitoj ipan tlali.
Tlen ijkuilijtok tlatsintla
^ O “centurión”. Katli kinyakanayaya 100 soldados tlen Roma.
^ Kanajya kiijtouaj “Mostlaijki”, “Kema tonilik”.
^ O “iamigos”.
^ Kanajya kiijtouaj “amo tlakuayayaj”. Ni tonali eliyaya ipan metstli Tisri, tlen nama uetsi ipan septiembre o octubre ipan tocalendario.
^ Kanajya kiijtouaj “seseuaskia”.
^ Ni eliyaya se barco pilsiltsi tlen kitekiuiyayaj para momanauisej kema nopa barco kipanoyaya se tlamantli tlen amo kuali.
^ Kanajya kiijtouaj “toTeotsij”.
^ Ika griego “César”.
^ Kanajya kiijtouaj “kiyejyekojkej”.
^ Ika griego “20 mapeli”.
^ Ika griego “15 mapeli”.
^ Kanajya kiijtouaj “kimakasiyayaj”.
^ Kanajya kiijtouaj “tlatlapaka”.
^ Kanajya kiijtouaj “ininika”.
