Hechos (Tlen apóstoles kichijkej) 4:1-37
4 Kema Pedro uan Juan kinkamanaljuiyayaj maseualmej, ualajkej kinnechkauikoj sacerdotes, inintlayakanka tlamokuitlauianij tlen teokali uan saduceos.*
2 Kualantoyaj pampa apóstoles kinmachtiyayaj maseualmej uan xitlauak kiijtouayayaj Jesús moyolkuitoya.
3 Uajka kinitskijkej uan kintsajkej hasta ika ualmostla,* pampa ya tlayouixtoya.
4 Pero miakej katli kikajkej nopa tlamachtili pejkej tlaneltokaj; mochijkej se 5 mil tlaneltokanij.
5 Ika ualmostla, mosentilijkej ipan Jerusalén nopa tekiuejmej,* katli kinyakanayayaj judíos uan escribas,*
6 ininuaya Anás, nopa sacerdote katli kipiayaya más tlanauatili, uan nojkia Caifás, Juan, Alejandro uan nochi iuikaljuaj* nopa sacerdote katli kipiayaya más tlanauatili.
7 Kinketskej Pedro uan Juan tlatlajko uan pejkej kintlatsintokiaj: “¿Ajkia inmechmakak tlanauatili o ika ajkia itoka inkichijkej ni tlamantli?”.
8 Uajka ichikaualis Dios* ualajki ipan Pedro uan kinnankilik:
“Intlayakananij tlen ni altepetl uan katli inkinyakanaj judíos,
9 tlaj nama intechtlatsintokiaj pampa tijchijkej se kuali tlamantli kema tijpaleuijkej se tlakatl katli eliyaya metskuachotik uan inkinekij inkimatisej ajkia kichikajki,
10 xijmatikaj nochi inmojuantij uan nochi katli euaj Israel para mochikajki ipan itoka Jesucristo tlen Nazaret, katli inmojuantij inkimiktijkej ipan se kuauitl pero Dios* kiyolkuik.* Ni tlakatl katli nikaj itstok inmoixpa, mochikajtok ika Jesús.
11 Ya eli ‘nopa tetl tlen inmojuantij, inkalchiuanij, inkichijkej kejuak amo kipia ipati uan ya nopa mochijtok nopa ueyi tetl kampa motetonia ome tepamitl’.*
12 Nojkia, amo aka uelis techmanauis, san ya uelis kichiuas, pampa amo onka seyok tokajyotl ipan Tlaltipaktli tlen Dios kinmakatok maseualmej para techmakixtis”.*
13 Inijuantij mosentlachilijkej kema kiitakej Pedro uan Juan amo majmauiyayaj kamanaltisej uan kema kiitakej eliyayaj tlen ueli tlakamej uan amo tlauel momachtijtoyaj.* Uan kiitakej para itstoyaj iuaya Jesús.
14 Nojkia kiitayayaj ininuaya itstoya nopa tlakatl katli mochikajtoya, yeka amo ueliyayaj kintlateljuiaj.
15 Uajka kinnauatijkej ma kisakaj kampa mosentiliaj Tekichiuanij katli kipiaj más Tlanauatili* uan pejkej mokamanaljuiaj.
16 Kiijtouayayaj: “¿Tlake tijchiuasej ika ni tlakamej? Pampa nochi katli itstokej Jerusalén kuali kimatij kichijtokej se ueyi milagro,* uan tojuantij amo ueli tikijtouaj para amo nelia.
17 Uajka, para ayokmo ma momoyaua ni tlamantli kampa maseualmej, tikintemajmatisej uan tikiniljuisej ayokmo aka ma kikamanaljuikaj ipan itoka nopa tlakatl”.*
18 Uajka kinnotskej uan kinnauatijkej ayokmo ma kamanaltikaj yon ma tlamachtikaj ipan itoka Jesús.
19 Pedro uan Juan kinnankilijkej: “Tlaj Dios kuali kiita ma tiinmechneltokakaj inmojuantij uan amo ya, inmojuantij xikijtokaj.
20 Pero tojuantij amo tijkauasej titepouilisej tlen tikitstokej uan tlen tijkaktokej”.
21 Uajka kema sampa kintemajmatijkej, kinkajkej ma yakaj pampa amo kipantijkej ika tlake ueliskia kintlatsakuiltisej uan nojkia pampa kinmakasiyayaj maseualmej, pampa nochi kiueyichiuayayaj Dios ika tlen panotoya.
22 Pampa nopa tlakatl katli mochikajtoya ika nopa milagro, kipiayaya kipano 40 xiuitl.
23 Kema kiskej, kinitatoj nopa sekinok Jesús itokilijkauaj uan kinpouilijkej tlen kiniljuijtoyaj sacerdotes katli kipiayayaj tlanauatili uan katli kinyakanayayaj judíos.
24 Kema kikajkej nopa, sansejko momaijtojkej* ika Dios uan kiijtojkej:
“ToUeyiTeko, ta katli tijchijchijki iluikaktli, Tlaltipaktli, mar uan nochi tlen nopaya onka,
25 ta tieli katli ika mochikaualis* tikijtok ika ikamak motlatekipanojka David, totata katli uejkajkia itstoya: ‘¿Kenke moajkomankej* katli itstokej ipan altepemej uan kenke nochi maseualmej moiljuijkej ipan tlamantli tlen san tlapik?
26 Tlanauatianij tlen ni Tlaltipaktli mokualchijchijkej uan tekichiuanij mosentilijkej kejuak eliskiaj san setsi para kiijixnamikisej Jehová* uan katli ya kitlapejpenik’.*
27 Uan kiampa panok, pampa Herodes uan Poncio Pilato mosentilijkej ipan ni altepetl ininuaya katli sejkanok* euanij uan katli euaj ipan Israel para kiijixnamikisej motlatekipanojka Jesús, katli eli tlatsejtseloltik uan katli ta tijtlapejpenik,
28 para kichiuasej tlen ipa tikijtojtoya, nopa tlamantli panok pampa tijpia chikaualistli uan pampa kiampa tijnekiyaya ma pano.
29 Uan nama Jehová,* xikita kenijkatsa techtemajmatijkej uan xijchiua para motlatekipanojkauaj nojua ma kamanaltitokaj tlen motlajtol uan amo ma majmauikaj,
30 uan ta nojua ximomaxitlajto para titechikauas uan nojua ma mochiua milagros uan uejueyi tlamantli ika itoka motlatekipanojka Jesús, katli tlatsejtseloltik”.
31 Kema tlankej momaijtouaj ika nochi ininyolo, mojmolinik nopa kali kampa mosentilijtoyaj, uan nochi kiselijkej ichikaualis Dios uan pejkej tematiltiaj itlajtol Dios uan amo majmauiyayaj.
32 Nojkia, nopa miakej tlaneltokanij kipiayayaj sanse ininyolo uan sanse inintlalnamikilis, uan amo aka kiijtouayaya tlen kipixtoya eliyaya iaxka, pampa nochi tlen kipixtoyaj momajmakayayaj.
33 Uan ika miak chikaualistli nopa apóstoles nojua tematiltijkej para toTeko Jesús moyolkuitoya. Dios nochi tlauel kinteochijki.
34 Uan amo aka kipolouayaya se tlenijki tlen ika mopanoltis, pampa nochi katli kipixtoyaj inintlal o ininchaj, kinamakayayaj uan nopa tomij kiuikayayaj
35 uan kitlaliyayaj ininixpa apóstoles. Uajka kinxexeljuiliyayaj kej kiitayayaj kinpoloua.
36 Yeka José, se iteipaixui Leví, katli euayaya Chipre, uan katli apóstoles nojkia kiiljuiyayaj Bernabé (tlen kineki kiijtos “katli teyoltlalia”),
37 kinamakak se tlali tlen kipixtoya uan nopa tomij kiuikak uan kitlalik ininixpa apóstoles.
Tlen ijkuilijtok tlatsintla
^ Kanajya kiijtouaj “mostlaijki”, “kema toniliskia”.
^ Kanajya kiijtouaj “tekitinij”.
^ Kanajya kiijtouaj “iteixmatkauaj”.
^ O “espíritu santo”.
^ Kanajya kiijtouaj “toTeotsij”.
^ Ika griego “kitlananki”.
^ O “kalnakastla”.
^ O “techmanauis”.
^ Kiijtosneki amo momachtijtoyaj kampa tlamachtiyayaj rabinos. Amo kiijtosneki amo ixtlamatiyayaj o amo ueliyayaj tlapouaj.
^ Ika griego “tlaneskayotl”, nikaj uan nochi kampa nesi ipan ni capítulo.
^ Kineki kiijtos Jesús.
^ Kanajya kiijtouaj “motlatlajtijkej”.
^ O “moespíritu santo”.
^ O “kualankej”.
^ O “iCristo”.
^ Kanajya kiijtouaj “oksejko”, “sejkoyok”.
