Tlen kiijkuilok Juan 14:1-31
14 “Amo ximoyolkuesokaj. Xitlaneltokakaj ipan Dios,* uan nojkia xitlaneltokakaj ipan na.
2 Ichaj noTata onka miak kampa uelis initstosej. Tlaj amo onkaskia, na niinmechiljuijtoskia, pampa ya nia niinmechchijchiuiliti kampa initstotij.
3 Nojkia, kema ya niajtos uan ya niinmechchijchiuilijtos kampa initstotij, nitlakuepilis uan niinmechselis ipan nochaj, nonechka, kiampa kampa na niitstos inmojuantij nojkia initstosej.
4 Uan inmojuantij inkimatij nopa ojtli para inyasej kampa na nia”.
5 Tomás kiiljuik: “ToTeko, amo tijmatij kanke tia. ¿Kenijkatsa tikixmatisej nopa ojtli?”.
6 Jesús kinankilik: “Na nieli nopa ojtli, nieli tlen melauak uan nijchiua miakej ma kipiakaj nemilistli. Amo aka uelis asiti kampa noTata tlaj amo eli ika na.
7 Tlaj innechixmatij, nojkia inkiixmatisej noTata. Desde nama inkiixmatij uan inkiitstokej”.
8 Felipe kiiljuik: “NoTeko, xitechnextili moTata uan san ya nopa tijnekij”.
9 Jesús kinankilik: “Felipe, ya miak tonali niitstok inmouaya, ¿uan ayamo tinechixmati? Katli nechitstok nojkia kiitstok noTata. ¿Kenke tinechiljuia ‘Xitechnextili moTata’?
10 ¿Timoiljuia amo niitstok iuaya noTata uan noTata amo itstok nouaya? Tlen niinmechiljuia amo eli tlen na nimoiljuia, eli tlen noTata, katli itstok nouaya uan kichijtok iteki.
11 Xinechneltokilikaj kema niinmechiljuia niitstok iuaya noTata uan noTata itstok nouaya. Uan tlaj amo, xitlaneltokakaj ika tlen nijchiua.
12 Nelnelia niinmechiljuia, katli tlaneltoka ipan na nojkia kichiuas tlen na nijchiua. Uan kichiuas más uejueyi tlamantli, pampa na nia kampa noTata.
13 Nojkia, tlen ueli tlamantli tlen intlajtlanisej ipan notoka, na nijchiuas, kiampa noTata kiueyichiuasej ika tlen iKone kichiuas.
14 Tlaj intlajtlanij se tlamantli ipan notoka, na nijchiuas.
15 ”Tlaj innechikneliaj, inkineltokasej notlanauatiljuaj.
16 Uan na nijtlajtlanis noTata uan ya inmechmakas seyok tlapaleuijketl* tlen nochipa itstos inmouaya:
17 ichikaualis Dios* tlen tematiltia tlen melauak, tlen maseualmej amo uelis kiselisej pampa amo kiitaj yon kiixmatij. Inmojuantij inkiixmatij pampa eltok ipan inmojuantij uan mokaua ika inmojuantij.
18 Amo niinmechtlauelkauas.* Nitlakuepilis kampa inmojuantij.
19 Nechka, katli itstokej ipan Tlaltipaktli ayokmo kema sampa nechitasej, pero inmojuantij kena innechitasej pampa na niyoltok uan inmojuantij inyoltosej.
20 Ipan nopa tonali inkimatisej na niitstok iuaya noTata, inmojuantij initstokej nouaya uan na niitstok inmouaya.
21 Katli kiselia notlanauatil uan kineltoka, yaya katli nechiknelia. Uan katli nechiknelia, noTata kiiknelis, uan na nikiknelis uan senkistok nimonextis iixpa”.
22 Judas, katli amo eliyaya Iscariote, kitlatsintokik: “NoTeko, ¿tlake panotok? ¿Kenke senkistok timonextis toixpa uan amo timonextis ininixpa maseualmej?”.
23 Jesús kinankilik: “Tlaj se akajya nechiknelia, kineltokas notlajtol. Uan noTata kiiknelis, uan tiomej tiualasej kampa ya uan tiitstosej* iuaya.
24 Katli amo nechiknelia amo kineltoka notlajtol. Tlen inkikakij nikijtoua amo eli noaxka, iaxka noTata, katli nechualtitlanki.
25 ”Niinmechiljuia ni tlamantli kema nojua niitstok inmouaya.
26 Pero nopa tlapaleuijketl, ichikaualis Dios, tlen noTata kititlanis ipan notoka, inmechmachtis nochi tlamantli uan kichiuas xikilnamikikaj nochi tlen niinmechiljuijtok.
27 Niinmechkauilijteua tlaseuilistli; niinmechmaka notlaseuilis, uan amo niinmechmaka kej temakaj maseualmej. Amo ximoyolkuesokaj yon ximajmauikaj.
28 Inkikajkej niinmechiljuik: ‘Nias uan nitlakuepilis kampa inmojuantij’. Tlaj innechikneliaj, inpakisej pampa nia kampa noTata, pampa noTata eli más ueyi que na.
29 Niinmechiljuijtok ni tlamantli kema ayamo pano, kiampa kema panos, intlaneltokasej.
30 Ayokmo más nikamanaltis inmouaya pampa uala katli tlanauatia ipan ni Tlaltipaktli, maske ya amo kipia yon kentsi tlanauatili ipan na.
31 Pero nijchiua nochi sanse kej noTata nechnauatijtok, kiampa katli itstokej ipan Tlaltipaktli kimatisej na nikiknelia noTata. Ximoketsakaj, ma tiakaj.
Tlen ijkuilijtok tlatsintla
^ Kanajya kiijtouaj “toTeotsij”.
^ O “tlayoltlalijketl”.
^ O “espíritu santo”.
^ O “niinmechkauas kej iniknotsitsij”.
^ O “timochantisej”.
