Tlen kiijkuilok Juan 19:1-42
19 Uajka Pilato tlanauatik ma kiuikakaj Jesús uan ma kiuijuitekikaj.
2 Uan nopa soldados kixinepalojkej se uitscorona uan kitlalilijkej ipan itsonteko, uan kitlalilijkej se yoyomitl moradojtik.
3 Kinechkauiyayaj uan kiiljuiyayaj: “¡Timitstlajpalouaj, tiinintlanauatijka judíos!”. Uan nojkia kiixtlatsiniyayaj.
4 Pilato sampa kiski uan kiniljuik nochi maseualmej: “¡Xitlakakikaj! Nijualika nikaj kalteno para xijmatikaj amo nijpantilia yon se tlajtlakoli”.
5 Uajka Jesús kiski ika nopa uitscorona ipan itsonteko uan ika nopa yoyomitl moradojtik. Uan Pilato kiniljuik: “¡Xikitakaj, nikaj itstok ni tlakatl!”.
6 Pero kema nopa sacerdotes katli kipiayayaj tlanauatili uan nopa tlamokuitlauianij kiitakej, chikauak kiijtojkej: “¡Xijkuapilo ipan kuauitl! ¡Xijkuapilo ipan kuauitl!”. Pilato kiniljuik: “Xijuikakaj uan inmojuantij xijmiktikaj, pampa na amo nijpantilia yon se tlajtlakoli”.
7 Nopa judíos kinankilijkej: “Tojuantij tijpiaj se tlanauatili kampa kiijtoua moneki mikis, pampa kiijtok eli ikone Dios”.*
8 Kema Pilato kikajki tlen kiijtouayayaj, nojua más majmajki
9 uan sampa kalajki ipan ueyi ichaj gobernador uan kitlatsintokik Jesús: “¿Kanke tieua?”. Pero Jesús amo tleno kinankilik.
10 Uajka Pilato kiiljuik: “¿Amo tijneki tinechnankilis? ¿Amo tijmati nijpia tlanauatili para nimitskauas xia uan tlanauatili para nimitsmiktis?”.*
11 Jesús kinankilik: “Amo tijpiaskia yon kentsi tlanauatili ipan na tlaj katli itstok iluikak amo mitsmakatoskia. Yeka nopa tlakatl katli nechtemaktilik momako kipia más tlajtlakoli”.
12 Ika tlen kiijtok, Pilato nojua kitemolik kenijkatsa ueliskia kikauas Jesús ma yaui. Pero nopa judíos kuatsajtsikej: “¡Tlaj tijkauas ma yaui amo tieli iuampox* Tlanauatijketl tlen Roma!* ¡Katli kiijtoua eli tlanauatijketl kiijixnamiki Tlanauatijketl tlen Roma!”.
13 Uajka, kema Pilato kikajki nopa, kikixtik Jesús kalixpa uan moseuik kampa tetlajtolsenkauayaya, kampa kiiljuiaj Tepejpechtli,* uan ika hebreo kiiljuiaj Gábbatha.
14 Eliyaya nopa tonali kema tlachijchiuayayaj para Pascua, nechka tlajkotona.* Uan kiniljuik judíos: “¡Xikitakaj! ¡Inmotlanauatijka!”.
15 Pero inijuantij kuatsajtsikej: “¡Xijmikti! ¡Xijmikti! ¡Xijkuapilo ipan se kuauitl!”. Pilato kintlatsintokik: “Uajka, ¿nijmikti inmotlanauatijka?”. Nopa sacerdotes katli kipiayayaj tlanauatili, kiijtojkej: “Amo tijpiaj seyok tlanauatijketl, san Tlanauatijketl tlen Roma”.*
16 Uajka kinmaktilik Jesús para ma kikuapilokaj ipan se kuauitl.
Uan inijuantij kiuikakej.
17 Jesús kikechpanok nopa kuauitl kampa kimiktiskiaj* uan yajki kampa kitokaxtiaj Mijkatsontekomitl, tlen ika hebreo kiiljuiaj Gólgota.
18 Nopaya kilavosminkej ipan kuauitl ininnechka omej tlakamej, se ika imanejmak uan se ika imaarraves* uan ya mokajki tlatlajko.
19 Nojkia, Pilato kichijki se tlajkuiloli uan kitlalik ipan nopa kuauitl. Nopaya kiijtouayaya: “Jesús katli eua Nazaret, inintlanauatijka judíos”.
20 Miakej judíos kipojkej ni tlajkuiloli, pampa kampa kikuapilojkej Jesús ipan kuauitl eltoya nechka nopa altepetl. Nojkia, nopa tlajkuiloli ijkuilijtoya ika tlajtoli hebreo, latín uan griego.
21 Pero nopa sacerdotes katli kipiayayaj tlanauatili uan kinyakanayayaj judíos kiiljuijkej Pilato: “Amo xikijkuilo ‘Inintlanauatijka judíos’, más kuali xikijkuilo tlen ya kiijtok ‘Nieli inintlanauatijka judíos’”.
22 Uan Pilato tlanankilik: “Tlen nikijkuilok, ya ijkuilijtok”.
23 Kema nopa soldados ya kilavosmintoyaj Jesús ipan kuauitl, kikuikej iyoyo uan kixelojkej ika naui, uan sejse soldado kikuik se, uan kikuikej iyoyo tlen ueueyak.* Pero iyoyo amo kiijtsontoyaj, pampa nejmaxtik* kichijchijtoyaj tlen uejkapa hasta tlatsintla.
24 Yeka moiljuijkej: “Amo ma tijtsayanakaj. Ma timauiltikaj ika piltetsitsij* para tikitasej ajkia mokauilis”. Ni panok para ma moaxiti tlen kiijtoua iTlajkuilol Dios: “Moxexeljuilijkej noyoyo, uan mauiltijkej ika piltetsitsij para mokauilisej noyoyo”. Uan ya nopa tlen kichijkej soldados.
25 Nechka nopa kuauitl kampa kimiktijkej* Jesús, itstoya inana uan se iaui;* nojkia María isiua Clopas uan María Magdalena.
26 Kema kiitak inana itstoya inechka uan nojkia itokilijka katli kiikneliyaya, kiiljuik inana: “¡Ma, nopona itstok mokone!”.
27 Teipa kiiljuik itokilijka: “¡Nopaya itstok monana!”. Uan desde nopa tonali itokilijka kiuikak ichaj.
28 Teipa, kema Jesús kimatki ya mochijtoya nochi tlamantli, kiijtok: “Niamiki”.* Kiampa moaxitik iTlajkuilol Dios.
29 Uan nopaya eltoya se xarro temitok ika vino tlen xokok, kiapachojkej se tlamantli tlen tsotsoltik ipan vino tlen xokok, kitlalijkej ipan se akatl uan kinechkauiltijkej ipan ikamak.
30 Kema Jesús kiyekok* nopa vino tlen xokok, kiijtok: “¡Motlamichijtok!”. Teipa mouijtsonki uan mijki.*
31 Eliyaya nopa tonali kema tlachijchiuayayaj, yeka nopa judíos kitlajtlanijkej Pilato ma kinmetspostekikaj nopa tlakamej uan ma kiijkuinikaj inintlakayo, para amo ma kuapilojtokaj ipan kuauitl kema eliskia sábado* (pampa nopa tonali eliskia se ueyi sábado).
32 Yeka nopa soldados yajkej uan kimetspostejkej nopa achtoui tlakatl uan nojkia nopa seyok katli kuapilojtoya inechka.
33 Pero kema asitoj kampa Jesús, kiitakej ya miktoya; yeka ayokmo kimetspostejkej.
34 Pero se soldado kikalakilik se kuatlamintli* ielchikitipa, uan nimantsi kiski estli uan atl.
35 Uan katli kiitstok, tematiltijtok, uan tematiltia tlen melauak, uan kimati tlen kiijtoua eli melauak, kiampa inmojuantij nojkia inkineltokasej.
36 Nochi ni tlamantli panok para ma moaxiti tlen kiijtoua iTlajkuilol Dios: “Amo kipostekilisej yon se iomiyo”.
37 Nojkia, iTlajkuilol Dios sejkanok* kiijtoua: “Kiitasej katli kikoyonijkej”.
38 Teipa, José katli euayaya Arimatea (katli eliyaya se itokilijka Jesús, maske ichtakatsi pampa kinmakasiyaya judíos) kitlatsintokik Pilato tlaj ueliskia kiuikas itlakayo Jesús, uan Pilato kikauilik ma kiuika. Uajka ualajki uan kiuikak.
39 Nojkia asito Nicodemo, nopa tlakatl katli achtoui yajtoya kiita Jesús ika tlayoua, kiuikayaya se kentsi* mirra* maneltik ika sekinok xiuitl tlen kikuechtilijtoyaj uan ajuiyak mijyotiyaya, tlen ietika eliyaya se 100 libras.*
40 Kiuikakej itlakayo Jesús uan kiuijkonkej ika yoyomitl tlen lino uan ika nopa tlamantli tlen ajuiyak mijyotia, sanse kej judíos momajtokej kichiuaj kema kitlalpachouaj* se mijkatsi.
41 Nechka kampa kikuapilojtoyaj Jesús ipan kuauitl, eltoya kampa tlatojtokayayaj, uan nopaya eltoya se yankuik mijkaostotl kampa amo aka kitlalijtoyaj.
42 Yeka, nopaya kitlalijkej Jesús pampa eliyaya nopa tonali kema judíos tlachijchiuayayaj uan nopa mijkaostotl nechka eltoya.
Tlen ijkuilijtok tlatsintla
^ Kanajya kiijtouaj “toTeotsij”.
^ O “nimitskuapilos ipan kuauitl”.
^ O “iamigo”.
^ Ika griego “César”.
^ Kineki kiijtos se piso tlen kichijchijtoyaj ika tetl.
^ Ika griego “chikuasempa hora”.
^ Ika griego “César”.
^ Xikita kuauitl kampa tetlaijiyouiltiaj.
^ Kanajya kiijtouaj “imaopoch”.
^ Kanajya kiijtouaj “senkistok”.
^ Xikita mauiltisej ika piltetsitsij.
^ Xikita kuauitl kampa tetlaijiyouiltiaj.
^ O “iikni inana”.
^ Kanajya kiijtouaj “niateuaki”.
^ Kanajya kiijtouaj “kimachilik”.
^ O “ijiyotlanki”.
^ O “lanza”.
^ Kanajya kiijtouaj “oksejko”, “sejkoyok”.
^ O uelis “se rollo”.
^ Kineki kiijtos se libra tlen ika tlatlamachiuayayaj o tlayejyekouayayaj romaeuanij. 100 libras eliyaya nechka 33 kilos.
^ Kanajya kiijtouaj “kitokaj”.
