Tlen kiijkuilok Lucas 1:1-80
1 Miakej kichijtokej kampeka kitemosej uan kiijkuilosej nochi tlen panotok, tlen tojuantij nojkia tijneltokaj para eli melauak,
2 sanse kej techiljuijkej sekinok katli kiitakej nochi nopa tlamantli uan katli kimoyajkej itlajtol Dios.
3 Yeka, Teófilo katli tlauel mitstlepanitaj, na nojkia nimosemakak nimitstlajkuiljuilis nochi kej panotiajki, pampa nijtemojtok nochi tlen melauak desde kema pejki,
4 kiampa uelis timotemachis nochi tlen mitsmachtijtokej nelia melauak.
5 Ipan nopa tonali kema Herodes* tlanauatiyaya Judea, itstoya se sacerdote katli motokaxtiyaya Zacarías uan itstoya ipan nopa pamitl tlen sacerdotes tlen kiiljuiyayaj “Abías”. Isiua eliyaya iteipaixui Aarón uan motokaxtiyaya Elisabet.
6 Zacarías uan Elisabet kichiuayayaj tlen kuali iixpa Dios,* nochipa kineltokayayaj nochi itlanauatiljuaj Jehová* uan nochi tlen ya kiijtojtoya moneki mochiuas.
7 Pero amo kipixtoyaj yon se ininkone pampa Elisabet amo ueliyaya konepia, uan nochi omej ya ueuejtixtoyaj.
8 Zacarías tlatekipanouayaya kej sacerdote iixpa Dios kema kimelauayaya nopa pamitl kampa itstoya,
9 uan kej momajtoyaj kichiuaj sacerdotes, kimelajki kalakis ichaj Jehová* para kitlatis incienso.*
10 Uan kema asik hora para kitlatisej incienso, nochi maseualmej momaijtouayayaj* kalixpa.
11 Uajka iángel Jehová* monextik nopaya. Uan ijkatoya ika inejmak nopa tlaixpamitl kampa kitlatiaj incienso.
12 Kema Zacarías kiitak, mosentlachilik uan tlauel momajmatik.
13 Pero nopa ángel kiiljuik: “Amo ximomajmati Zacarías, pampa Dios kikajki tlen titlajtlanki. Mosiua Elisabet kipias se pilkonetsi uan monekis tijtokaxtis Juan.
14 Nelia tlauel tiyolpakis, uan miakej nojkia pakisej kema tlakatis;
15 pampa iixpa Jehová* elis ueyi. Pero amo kema kiis* vino yon seyok tlaili. Uan maske ayamo tlakajtos, Dios kimakas ichikaualis.*
16 Ya kinpaleuis miakej israeleuanij ma moyolkuepakaj uan sampa ma kineltokakaj Jehová* ininDios.
17 Nojkia, yas iixpa Dios ika nopa chikaualistli tlen Elías kipixtoya para kichiuas ininyolo tetajmej ma mochiua kej ininyolo ininkoneuaj, uan para kichiuas katli amo tlaneltokaj sampa ma tlalnamikikaj uan ma kichiuakaj tlen kuali, kiampa kikualtlalis se altepetl para kitekipanos Jehová”.*
18 Zacarías kiiljuik nopa ángel: “¿Kenijkatsa nijmatis nelia panos nopa? Pampa na ya niueuentsi uan nosiua nojkia ya nanatsi”.*
19 Uan nopa ángel kinankilik: “Na niGabriel, katli nochipa niitstok iixpa Dios, uan nechtitlankej ma nikamanaltiki mouaya uan ma nimitsmatiltiki nopa kuali tlajtoli.
20 Pero xikita, amo uelis tikamanaltis uan amo tleno tikijtos hasta nopa tonali kema panos ni tlamantli, pampa amo tijneltokak notlajtol tlen moaxitis ipan nopa tonali tlen kiixtlalijtokej”.
21 Uan nochi maseualmej kichiayayaj Zacarías uan moiljuiyayaj kenke tlauel uejkauayaya ipan teokali.
22 Kema kiski amo ueliyaya kamanalti, uan kimatkej kiitstoya se tlanextilili ipan teokali. San tlamajmanextiyaya pero amo ueliyaya kamanalti.
23 Uajka, kema tlanki iteki ipan teokali, yajki ichaj.
24 Teipa, Elisabet tlanemiltik,* uan makuili metstli amo kisayaya ichaj. Kiijtouayaya:
25 “Ya ni tlen nama Jehová* nechchiuilijtok. Nechilnamijki para ayokmo nechpinajtisej”.
26 Kema kipiayaya chikuasej metstli, Dios kititlanki ángel Gabriel ipan se altepetl tlen tlali Galilea tlen motokaxtiyaya Nazaret
27 ma kipaxaloti se ichpokatl katli kiijtlantoya se tlakatl, katli motokaxtiyaya José, tlen eliyaya iteipaixui David. Nopa ichpokatl motokaxtiyaya María.
28 Kema nopa ángel kalajki, kiiljuik: “Nimitstlajpaloua María, Jehová* tlauel mitsteochiua; ya itstok mouaya”.
29 Pero María amo kikuamachilik tlen kiiljuik uan moiljuiyaya tlake kiijtosnekiyaya nopa tlajtoli.*
30 Uajka nopa ángel kiiljuik: “Amo ximajmaui María, pampa Dios kuali mitsita.
31 Xikita, titlanemiltis uan tijtlakatiltis se pilkonetsi, uan monekis tijtokaxtis Jesús.
32 Ya elis ueyi uan kitokaxtisej iKone Dios katli Más Ueyi. Uan Jehová* Dios kichiuas ma eli tlanauatijketl kej itata David,
33 uan ya nochipa tlanauatis ipan ichaj Jacob. ITlanauatijkayo amo kema tlamis”.
34 Pero María kitlatsintokik nopa ángel: “¿Kenijkatsa uelis panos nopa tlaj na amo kema nimotektok ika yon se tlakatl?”.
35 Nopa ángel kinankilik: “Ichikaualis Dios ualas kampa ta, uan ichikaualis katli Más Ueyi mitstsakuas. Yeka nopa pilokichpiltsi katli tlakatis amo kipias tlajtlakoli uan kitokaxtisej iKone Dios.
36 Uan xikita, mouikal* Elisabet, katli ya nanatsi, nojkia tlanemiltia. Ya, katli kiiljuiyayaj amo ueli konepia, nama kipia chikuasej metstli,
37 pampa nochi tlen Dios kiijtoua, nelia mochiua”.
38 Uajka María kiijtok: “¡Nikaj niitstok, niitlatekipanojka Jehová!* Ma nechpano nochi tlen tikijtojtok”. Uajka nopa ángel kikajtejki uan yajki.
39 Kema panok se keski tonali, María kistejki uan nimantsi yajki ipan se altepetl tlen Judá, kampa onka miak tepemej,
40 uan kalajki ichaj Zacarías uan kitlajpalok Elisabet.
41 Kema Elisabet kikajki María kitlajpalok, ipilkone nimantsi uitonki iijtiko. Uajka, Elisabet kiselik ichikaualis Dios
42 uan chikauak kiijtok: “¡Más mitsteochijtokej que nochi siuamej, uan Dios ma kiteochiua nopa pilkonetsi tlen tijpias!
43 ¿Ajkia nieli na para inana noTeko ma uala nechpaxaloki?
44 Pampa xikita, kema tinechontlajpalok, nopilkone tlen nijpia noijtiko uitonki pampa yolpajki.
45 Nojkia yolpaki katli kineltokak tlen kiiljuijkej, pampa temachtli moaxitis nochi tlen Jehová* kiiljuik”.
46 Uan María kiijtok: “Nijueyichiua Jehová* ika nochi nonemilis,
47 uan tlauel niyolpaki ika tlen nechchiuilijtok Dios, noTlamanauijka,
48 pampa ya nechitstok na niitlatekipanojka maske nieli san tlen ueltsi maseualtsi. ¡Uan desde nama nochi katli tlakajtiasej kiijtosej niyolpaki!
49 Pampa Dios katli kipia Chikaualistli nechchiuilijtok uejueyi tlamantli uan itoka eli tlatsejtseloltik.*
50 Nochipa kintlasojtla katli kimakasij kiixpanosej.
51 Kichijtok uejueyi tlamantli ika imax; kinsemantok* katli moueyimatiyayaj ipan ininyolo.
52 Katli kipiayayaj tlanauatili kinkixtilijtok inintekiuijkayo uan kinuejkapantlalijtok katli amo tlauel pankisaj;
53 katli mayanayayaj kinixuitijtok ika miak tlamantli tlen kuali, uan katli tlatominpiaj kinkuapejtok san ika ininmax.*
54 Kipaleuiko itlatekipanojka Israel, pampa kiilnamijki kiijtojtoya kintlasojtlaskia
55 Abrahán uan ikoneuaj para nochipa, kej kintenkauilik totatauaj katli uejkajkia itstoyaj”.
56 María mokajki iuaya Elisabet se eyi metstli uan teipa tlakuepilik ichaj.
57 Uajka asik hora para Elisabet konepias uan kitlakatiltik se pilokichpiltsi.
58 Kema ikalnechkauaj uan iuikaljuaj kimatkej kenijkatsa Jehová* tlauel kitlasojtlatoya, yolpajkej iuaya.
59 Kema chikueyitik yajkej kichiuilitoj circuncisión* nopa pilokichpiltsi, uan kitokaxtiskiaj kej itata: Zacarías.
60 Pero inana kiijtok: “¡Amo! Motokaxtis Juan”.
61 Inijuantij kinankilijkej: “Yon se tlen mochampoyouaj* kiampa motokaxtia”.
62 Uajka kitlamajmanextilijkej itata para kitlatsintokisej kenijkatsa kinekiyaya ma motokaxti nopa pilokichpiltsi.
63 Zacarías tlajtlanki se piluapaltsi, uan kiijkuilok: “Motokaxtis Juan”. Nochi mosentlachilijkej.
64 Nimantsi uelki kamanalti uan kiojolinia inenepil, uan pejki kiueyichiua Dios.
65 Nochi ikalnechkauaj tlauel mosentlachilijkej;* uan ipan nochi nopa tlali tlen Judea kampa onka tepemej, pejkej kamanaltij tlen nopa tlamantli.
66 Katli kikakiyayaj tlen panotoya, moyoliljuiyayaj uan kiijtouayayaj: “¿Tlake kichiuas ni pilokichpiltsi kema moskaltis?”. Pampa temachtli Jehová* itstoya iuaya.
67 Uajka, Zacarías, itata nopa pilokichpiltsi kiselik ichikaualis Dios uan kiijtok tlen Dios kimatiltik:
68 “Ma tijueyichiuakaj Jehová,* iDios Israel, pampa kitlasojtlatok ialtepe uan kimakixtijtok.
69 Techmakatok se temakixtijketl katli kipia chikaualistli uan eli tlen ichampoyouaj David, itlatekipanojka Dios,
70 kej kiniljuik ma kiijtokaj iteokamanalojkauaj* katli uejkajkia itstoyaj,
71 para techmanauis tlen tokualankaitakauaj uan ininmako nochi katli amo kinekij techitasej.
72 Ya techtlasojtlas kej kiniljuik totatauaj katli uejkajkia itstoyaj uan kiilnamikis nopa tlajtoli tlatsejtseloltik tlen kitenkajki,
73 tlen kitenkauilik totata Abrahán katli uejkajkia itstoya.
74 Kema ya techmakixtijtos ininmako tokualankaitakauaj, techkauas ma tijtekipanokaj uan amo timajmauisej
75 yon tijtlauelkauasej, uan tijchiuasej tlen kuali iixpa nochi tonali tlen tiitstosej.
76 Uan ta, tipilkonetsi, mitstokaxtisej iteokamanalojka katli Más Ueyi, pampa Jehová* mitstitlanis xitlayakana para tijkualtlalis iojui,
77 para titematiltis ipan ialtepe ya kinmakixtis kema kintlapojpoljuis inintlajtlakoljuaj
78 pampa toDios tlauel tetlasojtla. Uan pampa kiampa kichiua, tikitasej se tlauili tlen ne uejkapa tlen tlauia kej kema tlanestiuala
79 para kintlauilis katli itstokej kampa tsintlayoua uan katli itstokej ipan iekauil* mikilistli, uan para techyakanas ipan ojtli kampa onka tlaseuilistli”.
80 Nopa pilokichpiltsi moskaltik uan kuali tlaneltokatiajki,* uan mokajki ipan uaktok tlali hasta nopa tonali kema monextik ininixpa israeleuanij.
Tlen ijkuilijtok tlatsintla
^ Kanajya kiijtouaj “toTeotsij”.
^ Kanajya kiijtouaj “motlatlajtiyayaj”.
^ O “espíritu santo”.
^ Kanajya kiijtouaj “kiijis”.
^ O “ya ueyi”.
^ Kanajya kiijtouaj “konekuik”.
^ O “tetlajpaloli”.
^ Kanajya kiijtouaj “moteixmatka”.
^ O “tlapajpaktik”.
^ O “kinmoyajtok”.
^ O “uan amo tleno kinmakak”.
^ Xikita circuncisión.
^ O “mofamilia”.
^ O “momajmatijkej”.
^ O “iprofetas”.
^ Kanajya kiijtouaj “iakauilo”.
^ Ika griego “mochijki tetik ika espirítu”.
