Tlen kiijkuilok Lucas 23:1-56
23 Uajka nochi maseualmej moketskej uan kiuikakej Jesús kampa Pilato.
2 Uan pejkej kitlateljuiaj. Kiijtouayayaj: “Tijpantijkej ni tlakatl kinajkomanayaya* maseualmej tlen toaltepe, kiniljuiyaya amo ma kitlaxtlauikaj impuesto Tlanauatijketl tlen Roma* uan kiijtouayaya ya eli Cristo, se tlanauatijketl”.
3 Uan Pilato kitlatsintokik: “¿Ta tiinintlanauatijka judíos?”. Jesús kinankilik: “Kena, ta tikijtoua”.
4 Uajka Pilato kiniljuik sacerdotes katli kipiayayaj tlanauatili uan nochi maseualmej: “Na amo nijpantilia ni tlakatl yon se tlajtlakoli”.
5 Pero inijuantij nojua kiijtouayayaj: “Tlamachtijtinemi ipan nochi tlali Judea uan kinajkomana maseualmej; pejki Galilea uan asiko nikaj”.
6 Kema Pilato kikajki nopa, tlatsintokak tlaj nopa tlakatl euayaya Galilea.
7 Kema kimatki euayaya kampa Herodes tlanauatiyaya, kititlanki kampa Herodes, katli nojkia yajtoya ipan Jerusalén ipan nopa tonali.
8 Kema Herodes kiitak Jesús, tlauel yolpajki. Ya kipiayaya miak tonali kinekiyaya kiitas Jesús pampa kikaktoya miak tlamantli tlen ya, uan kinekiyaya kiitas ma kichiua se milagro.
9 Uajka pejki kichiuilia miak tlajtlanili,* pero ya amo tleno kinankilik.
10 Pero nopa sacerdotes katli kipiayayaj tlanauatili uan escribas* moketsayayaj uan kitlateljuiyayaj ika kualantli.
11 Uajka Herodes uan isoldados yon kentsi kitlepanitakej Jesús, uan para kipinajtisej kitlalilijkej se kuali yoyomitl. Teipa sampa kititlanki kampa Pilato.
12 Nopa tonali, Herodes uan Pilato mouampojchijkej,* maske achtouia mokualankaitayayaj.
13 Teipa Pilato kinsentilik sacerdotes katli kipiayayaj tlanauatili, tekichiuanij uan maseualmej,
14 uan kiniljuik: “Inmojuantij innechualikilijkej ni tlakatl pampa inkiijtouaj kichiua maseualmej ma tlaijixnamikikaj. Pero xikitakaj, nijtlatsintokik inmoixpa uan amo nijpantik yon se tlamantli tlen ika uelis inkitlateljuisej.
15 Uan yon Herodes kipantilik se tlenijki pampa sampa kiualtitlanki kampa tojuantij. Amo kinamiki ma kimiktikaj ni tlakatl pampa amo tleno kichijtok.
16 Yeka, san nijtlatsakuiltis uan nijkauas ma yaui”.
17 *
18 Pero nochi maseualmej kuatsajtsikej: “¡Xijmikti nopa tlakatl uan xijkaua ma yaui Barrabás!”.
19 (Nopa tlakatl kitsaktoyaj pampa kinijixnamiktoya tekichiuanij ipan nopa altepetl uan pampa temiktijtoya).
20 Pilato sampa kinnotski pampa kinekiyaya kikauas Jesús ma yaui.
21 Uajka inijuantij pejkej chikauak kuatsajtsij: “¡Xijkuapilo ipan kuauitl! ¡Xijkuapilo ipan kuauitl!”.
22 Ika expa kiniljuik: “Pero, ¿kenke? ¿Tlake tlamantli tlen amo kuali kichijtok? Na amo nijpantilijtok yon se tlamantli para tijmiktisej. Yeka, san nijtlatsakuiltis uan nijkauas ma yaui”.
23 Inijuantij miakpa tlajtlaniyayaj para ma kikuapilokaj ipan kuauitl, uan tlauel chikauak kuatsajtsiyayaj.
24 Yeka Pilato kichijki tlen inijuantij tlajtlaniyayaj.
25 Kikajki ma yaui katli inijuantij tlajtlankej, katli kitsaktoyaj pampa tlaijixnamiktoya uan temiktijtoya. Uan kinmaktilik Jesús para ma kichiuilikaj tlen inijuantij kinekiskiaj.
26 Kema kiskej kampa itstoyaj, kitsakuilijkej se tlakatl katli motokaxtiyaya Simón, katli euayaya Cirene uan yajtoya milaj, uan kikechpanoltilijkej nopa kuauitl* para ma kiuika itepotsko* Jesús.
27 Kitokiliyayaj miakej maseualmej, nojkia yauiyayaj siuamej katli moyolixtejtetsontiauiyayaj* pampa mokuesouayayaj uan chikauak kichokiliyayaj pampa kiteikneltiitayayaj.*
28 Jesús moikankuepki* kampa itstoyaj nopa siuamej, uan kiniljuik: “Siuamej katli initstokej ipan Jerusalén, ayokmo xinechchokilikaj. Más kuali, inmojuantij ximochokilikaj uan xikinchokilikaj inmokoneuaj;
29 pampa xikitakaj, monechkauia nopa tonali kema kiijtosej: ‘¡Yolpakij katli amo uelij konepiaj, katli amo tlatlakatiltijkej uan katli amo tlachichitijkej!’.
30 Uajka peuas kiniljuisej tepemej ‘¡Xiuetsikaj toixko!’ uan kiiljuisej tlachikili ‘¡Xitechtlati!’.
31 Tlaj kichiuaj ni tlamantli kema nopa kuauitl nojua xoxouik, ¿tlake panos kema ya uaktos?”.
32 Nojkia kinuikayayaj omej tlachtekinij katli kinkuapiloskiaj iuaya.
33 Uan kema asitoj kampa kitokaxtiaj Mijkatsontekomitl, kilavosminkej ipan kuauitl ininuaya nopa omej tlachtekinij: se ika imanejmak uan se ika imaarraves.*
34 Uan Jesús kiijtouayaya: “Papá, xikintlapojpoljui pampa amo kimatij tlake kichiuaj”. Nojkia mauiltijkej ika piltetsitsij* para kiitasej ajkia mokauiliskia sejse iyoyo.
35 Nochi maseualmej nopaya tlachixtoyaj. Uan inintlayakankauaj ixkuijkuilichiuiyayaj uan kiijtouayayaj: “Kinmakixtik* sekinok; uajka iselti ma momakixti tlaj eli nopa Cristo, katli Dios* Kitlapejpenik”.
36 Hasta soldados kipinajtiyayaj, kinechkauiyayaj para kimakasej vino tlen ya xokoxtoya
37 uan kiiljuiyayaj: “Tlaj ta tieli inintlanauatijka judíos, moselti ximomanaui”.*
38 Nojkia, itsonpak kiijkuilojtoyaj: “Ni eli inintlanauatijka judíos”.
39 Uajka se tlen nopa tlachtekinij katli nopaya kikuapilojtoyaj pejki kipinajtia. Kiiljuiyaya: “Ta tiCristo, ¿axke? ¡Uajka ximomanaui, uan nojkia xitechmanaui!”.
40 Kema nopa seyok kikajki, kitlakaualtik: “¿Yon kentsi tijmakasi Dios maske nojkia mitstlatsakuiltijtokej?
41 Tojuantij kinamiki ma techtlatsakuiltikaj pampa timotlanilijtokej; pero ni tlakatl amo tleno kichijtok”.
42 Uajka kiijtok: “Jesús, xinechilnamiki kema titlanauatis ipan moTlanauatijkayo”.
43 Uan ya kinankilik: “Nama temachtli nimitsiljuia: tiitstos nouaya Kampa tlauel Tlayejyektsi”.*
44 Maske ya eliskia tlajkotona,* tlatlayouixki ipan nopa tlali uan kiampa mokajki hasta nechka las tres* ika tiotlak
45 pampa Tonati ayokmo tlauik. Uajka nopa cortina tlen eltoya ipan teokali tlajkotsayanki.
46 Uan Jesús chikauak kuatsajtsik: “¡Papá, ipan momako nijkaua nonemilis!”. Kema kiijtok nopa, mijki.
47 Kema katli kinyakanayaya soldados* kiitak tlen panok, pejki kiueyichiua Dios uan kiijtouayaya: “Nelia ni tlakatl kichiuayaya tlen kuali”.
48 Uan kema nochi maseualmej katli nopaya mosentilijtoyaj kiitakej tlen panotoya, tlakuepilijkej ininchaj uan moyolixtejtejtsontiajkej.
49 Nochi katli kiixmatiyayaj ijkatoyaj ika uejka. Nojkia kitlachilijtoyaj ni tlamantli nopa siuamej katli yajtoyaj iuaya desde Galilea.
50 Uan itstoya se tlakatl katli kipiayaya kuali iyolo uan kichiuayaya tlen kuali, motokaxtiyaya José, uan eliyaya se tlen nopa Tekichiuanij katli kipiayayaj más Tlanauatili.*
51 (Ya amo tlapaleuijtoya para ma kimiktikaj Jesús uan amo kipaktik tlen kichijkej). Euayaya Arimatea, se altepetl tlen tlali Judea, uan kichiayaya iTlanauatijkayo Dios.
52 Yajki kiitato Pilato uan kitlajtlanik itlakayo Jesús.
53 Kitemouik itlakayo uan kipijki ika se linoyoyomitl tlen kuali tlachijchiuali. Teipa kitlalik ipan se mijkaostotl tlen kikoyonijtoyaj ipan tetl, kampa amo aka kitlalijtoyaj.
54 Eliyaya nopa tonali kema tlachijchiuayayaj uan nechka peuaskia sábado.*
55 Nopa siuamej katli ualajtoyaj iuaya desde Galilea, nojkia yajkej nopaya. Kitlachilijkej nopa mijkaostotl uan kiitakej kenijkatsa kitlalijtoyaj itlakayo Jesús.
56 Teipa tlakuepilijkej para kikualchijchiuasej pilxiuitsitsij uan aceites tlen ajuiyak mijyotia. Pero mosiajketskej ipan sábado kej kiijtouayaya nopa tlanauatili.
Tlen ijkuilijtok tlatsintla
^ O “kichiuayaya ma tlaijixnamikikaj”.
^ Ika griego “César”.
^ Kanajya kiijtouaj “tlatsintokili”.
^ O “mochijkej amigos”.
^ Ni texto san eltok ipan se keski biblias, pero amo eltok ipan amatlajkuiloli tlen uejkajkia moijkuilok ika griego.
^ Xikita kuauitl kampa tetlaijiyouiltiaj.
^ Kanajya kiijtouaj “iika”.
^ Kanajya kiijtouaj “moyolixkapanijtiauiyayaj”.
^ Kanajya kiijtouaj “kintlayokoltiyaya”.
^ O “ikantlachixki”.
^ Kanajya kiijtouaj “imaopoch”.
^ Xikita mauiltisej ika piltetsitsij.
^ O “kinmanauik”.
^ Kanajya kiijtouaj “toTeotsij”.
^ O “ximomakixti”.
^ O “Paraíso”.
^ Ika griego “chikuasempa hora”.
^ Ika griego “chiknajpa hora”.
^ O “centurión”. Katli kinyakanayaya 100 soldados tlen Roma.
