Tlen kiijkuilok Lucas 8:1-56
-
Siuamej katli yauiyayaj iuaya Jesús (1-3)
-
Neskayotl tlen nopa tlatojketl (4-8)
-
Kenke Jesús tlamachtiyaya ika neskayotl (9, 10)
-
Kiixtoma nopa neskayotl tlen tlatojketl (11-15)
-
Amo aka kitsakua se tlauili (16-18)
-
Inana uan iikniuaj Jesús (19-21)
-
Jesús kichiua ma moketsa se chikauak ajakatl (22-25)
-
Kinnauatia se keskij amo kuali ajakamej ma kalakikaj ipan pitsomej (26-39)
-
Isiuapil Jairo; se siuatl kiitskilia iyoyo Jesús (40-56)
8 Teipa, Jesús yajki ipan altepemej uan pilaltepetsitsij, tlajtolmoyajtinenki uan teiljuijtinenki tlen nopa kuali tlamachtili tlen iTlanauatijkayo Dios. Iuaya yauiyayaj nopa 12 apóstoles,
2 nojkia yauiyayaj ininuaya se keskij siuamej katli kinkixtilijtoya amo kuali ajakamej* uan kinchikajtoya tlen ininkokolis: María, katli kitokaxtiyayaj Magdalena uan kikixtilijtoya chikomej amo kuali ajakamej,
3 Juana isiua Cuza, katli kimokuitlauiyaya tlen eltoya ichaj Herodes, Susana uan sekinok siuamej katli kitekiuiyayaj tlen kipixtoyaj para kinpaleuisej.
4 Uajka, miakej maseualmej mosentilijtoyaj ininuaya katli ipa kitokiliyayaj ipan sejse altepetl, uan Jesús kinkamanaljuik ika ni neskayotl:
5 “Se tlatojketl kitokato ixinach. Kema toktiajki, se keski xinachtli tepejki ojteno uan ipan mokejketskej, uan totomej kikuajkej.
6 Sekinok tepejki kampa tetl uan kema ixuak nima uajki pampa nopa tlali amo xolontoya.
7 Sekij uetski uitstsala, uan nopa uitstli tlen moskaltik iuaya, kiijiyomiktik.
8 Uan sekij tepejki kampa kuali tlali uan kema ixuak temakak itlajka: 100 imiakpa más que tlen kitoktoyaj”. Kema tlanki kiniljuia ni, chikauak kiijtok: “¡Katli kipia inakas para tlakakis, kuali ma tlakaki!”.
9 Pero itokilijkauaj kitlatsintokijkej tlake kiijtosnekiyaya nopa neskayotl.
10 Ya kinnankilik: “Inmojuantij inmechkauiliaj xijkuamachilikaj tlen Dios* ayamo tematiltia* tlen iTlanauatijkayo. Pero ne sekinok nikinmachtia ika neskayotl, kiampa maske tlachiaj, amo nelia tlachiasej, uan maske tlakakij, amo tleno kikuamachilisej.
11 Ya ni tlen kiijtosneki nopa neskayotl. Nopa xinachtli eli itlajtol Dios.
12 Tlen tepejki ojteno elij katli kikakij itlajtol Dios, pero teipa uala Diablo uan kinkixtilia itlajtol Dios tlen eltok ipan ininyolo, kiampa amo tlaneltokasej uan amo momanauisej.*
13 Tlen uetski kampa tetl elij katli kikakij nopa tlajtoli uan kiseliaj ika pakilistli; pero amo uejkatla moneljuayotijtokej. Kineltokaj se keski tonali, pero kema kipiaj kuesoli, moiyokatlaliaj.
14 Tlen uetski uitstsala elij katli kitlakakiliaj nopa tlajtoli pero kikauaj ma kinkuatotoni tlen kintekipachoua, kinekij tlatominpiasej uan kipiasej nochi tlen kinyolpaktia, yeka nopa tlajtoli ijiyomiki uan amo kema chikauia inintlajka.
15 Nopa xinachtli tlen uetski kampa kuali tlali, elij katli kikakij nopa tlajtoli ika nochi ininyolo, kiajokuij uan maske kiixnamikij kuesoli, kiijiyouiaj uan temakaj inintlajka.
16 ”Amo aka kitlatia* se tlauili uan teipa kitsakua ika se komitl o kitlalia camajtantitla,* kitlalia ipan se tlauilketsali, kiampa nochi katli kalakij kiitaj nopa tlauili.
17 Pampa nochi tlen motlatijtok,* teipa monextis, uan tlen eltok ichtakatsi, se tonali nesis uan nochi kimatisej.
18 Uajka, kuali xikitakaj kenijkatsa intlakakij, pampa katli kipia nojua más kimakasej, pero katli amo tleno kipia kikuilisej hasta tlen moiljuia kipixtok”.
19 Uajka, inana uan iikniuaj Jesús ualajkej kiitakoj, pero amo ueliyayaj monechkauiaj kampa ya pampa itstoyaj miakej maseualmej.
20 Yeka kimatiltijkej: “Monana uan moikniuaj ijkatokej kalteno uan kinekij mitsitasej”.
21 Ya kinnankilik: “Nonana uan noikniuaj elij ni katli kikakij itlajtol Dios uan kichiuaj”.
22 Se tonali, ya uan itokilijkauaj tlejkokej ipan se barco* uan kiniljuik: “Ma tikixkotonakaj hasta ne seyok nali mar”. Uan kistejkej.
23 Uan kema yauiyayaj ipan mar, ya kochki. Uajka pejki chikauak tlaajaka uan nopa barco pejki temi ika atl. Nechka misauiskiaj.
24 Uajka yajkej kiixititoj uan kiiljuijkej: “¡Tlamachtijketl! ¡Tlamachtijketl! ¡Timikisej!”. Ya mejki uan kitlakaualtik nopa ajakatl uan atl tlen chikauak mokojkoxoniyaya; nochi moketski uan ayokmo tleno molinik.
25 Uajka kintlatsintokik: “¿Kenke amo inmotemachiaj ipan Dios?”. Pero inijuantij tlauel momajmatijtoyaj uan mosentlachilijtoyaj, uan moiljuiyayaj se ika seyok: “¿Ajkia nelnelia ni tlakatl? Hasta ajakatl uan atl kinnauatia, uan kineltokaj”.
26 Uan asitoj iteno mar, ipan inintlal gerasenos, tlen mokaua iixmelak tlali Galilea.
27 Kema Jesús temok ipan barco, nimantsi kinamikito se tlakatl katli euayaya ipan nopa altepetl uan kipixtoya se amo kuali ajakatl. Ya uejkajtoya amo mokentiyaya iyoyo uan amo itstoya ichaj, itstoya kampa cementerio.
28 Kema kiitak Jesús, kuatsajtsitejki uan motlankuaketski iixpa, uan chikauak kiijtok: “¿Tlake tijchiua nikaj Jesús, tiiKone Dios katli Más Ueyi? Nimitstlajtlania, amo xinechtlaijiyouilti”.
29 (Pampa Jesús ipa kinauatijtoya nopa amo kuali ajakatl ma kisa tlen nopa tlakatl. Nopa amo kuali ajakatl miakpa kalaktoya ipan nopa tlakatl,* uan miakpa kimailpitoyaj uan kimetsilpitoyaj* ika cadenas uan kimokuitlauiyayaj, pero ya nochipa kikokototsayaya nopa cadenas, uan nopa amo kuali ajakatl kichiuayaya ma yaui uejka).
30 Jesús kitlatsintokik: “¿Kenijkatsa motoka?”. Ya kinankilik: “Legión”.* Pampa eliyayaj miakej nopa amo kuali ajakamej katli kalaktoyaj ipan nopa tlakatl.
31 Uan chikauak kitlajtlaniyayaj amo ma kintitlani ipan nopa ostotl tlen tlauel uejkatla.*
32 Ipan nopa tepetl tlakuayayaj miakej pitsomej, uajka nopa amo kuali ajakamej kitlajtlanijkej Jesús ma kinkaua kalakisej ipan nopa pitsomej. Uan ya kinkauilik ma kalakikaj.
33 Uajka nopa amo kuali ajakamej kiskej tlen nopa tlakatl uan kalajkej ipan nopa pitsomej, uan nochi pitsomej momajkajkej ipan tepexitl, uetsitoj ipan mar uan misauijkej.
34 Kema katli kinmokuitlauiyayaj nopa pitsomej kiitakej tlen panotoya, cholojtejkej uan tepouilitoj ipan altepetl uan pilaltepetsitsij.
35 Uajka maseualmej yajkej kiitatoj tlake panotoya. Kema asitoj kampa itstoya Jesús, kiitakej nopa tlakatl katli kinpixtoya miakej amo kuali ajakamej moyoyontijtoya, ya tlalnamikiyaya uan moseuijtoya iikxitla Jesús, uan tlauel momajmatijkej.
36 Katli kiitakej tlen panotoya kinpouilijkej kenijkatsa nopa tlakatl katli kinpixtoya amo kuali ajakamej, mochikajtoya.
37 Uan miakej maseualmej katli euayayaj nechka inintlal gerasenos, kitlajtlanijkej Jesús ma yaui sejkanok,* pampa tlauel momajmatijtoyaj. Uajka ya tlejkok ipan barco pampa ya yaskia.
38 Nopa tlakatl katli kinpixtoya nopa amo kuali ajakamej kitlajtlaniyaya ma kikauili yas iuaya, pero Jesús amo kikauilik, kiiljuik:
39 “Xitlakuepili mochaj uan nochi xikiniljui tlen Dios mitschiuilik”. Nopa tlakatl yajki uan pejki tematiltia ipan nochi nopa altepetl tlen Jesús kichiuilijtoya.
40 Kema Jesús tlakuepilik, nopa miakej maseualmej tlauel kuali kiselijkej pampa nochi kichixtoyaj.
41 Uajka ualajki se tlakatl katli motokaxtiyaya Jairo, ya tlayakanayaya kampa tlaueyichiuayayaj judíos. Motlankuaketski iixpa Jesús, uan pejki kitlajtlania ma yaui ichaj,
42 pampa isiuapil katli iyojtsi, katli kipiayaya se 12 xiuitl, nechka mikiskia.
Kema Jesús yauiyaya ipan ojtli, nopa miakej maseualmej kikuatetsopayayaj.
43 Nojkia, nopaya itstoya se siuatl katli kipiayaya 12 xiuitl esotemoyaya uan amo aka ueltoya kichikaua.
44 Ya kinechkauik Jesús ika iika uan kiitskilik itenuaxo iyoyo uan nimantsi moketski nopa estli.
45 Jesús tlatsintokak: “¿Ajkia kiitskik noyoyo?”. Nochi kiijtouayayaj para amo kiitskitoyaj, uan Pedro kiiljuik: “Tlamachtijketl, miakej maseualmej mitsyaualojtokej uan mitskuatetsoptokej”.
46 Pero Jesús kiijtok: “Se akajya nechitskik, pampa nijmati kiski chikaualistli ipan na”.
47 Kema nopa siuatl kiitak para momatki tlen kichijtoya, monechkauik uan uiuipikatiauiyaya, motlankuaketski iixpa uan kiijtok ininixpa nochi katli nopaya itstoyaj kenke kiitskitoya uan kenijkatsa nima mochikajtoya.
48 Pero Jesús kiiljuik: “Nosiuapil, timochikajki pampa kuali titlaneltoka. Xia ika kuali”.
49 Kema nojua kamanaltitoya, ualajki se akajya katli tekitiyaya ichaj Jairo uan kiiljuik: “Mosiuapil ya mijki. Ayokmo xijkuatotoni Tlamachtijketl”.
50 Kema Jesús kikajki nopa, kiiljuik Jairo: “Amo ximomajmati, san xitlaneltoka uan mosiuapil itstos”.*
51 Kema asitoj ichaj Jairo, Jesús san kinkajki ma kalakikaj Pedro, Juan, Santiago, itata uan inana nopa siuapil, san inijuantij kalajkej.
52 Nochi maseualmej chokayayaj uan moyolixtejtejtsonayayaj* pampa tlauel mokuesojtoyaj pampa miktoya nopa siuapil. Yeka Jesús kiijtok: “Ayokmo xichokakaj, pampa amo miktok, san kochtok”.
53 Kema kikajkej nopa, pejkej kiuetskiliaj uan kipinajtiaj pampa kimatiyayaj ya miktoya.
54 Uajka kimaitskik uan kiiljuik: “Siuapil, ¡ximeua!”.
55 Ya moyolkuik uan nimantsi mejki. Uajka Jesús tlanauatik ma kitlamakakaj nopa siuapil.
56 Itatauaj tlauel yolpakiyayaj, pero Jesús kinnauatik amo aka ma kipouilikaj tlen panotoya.
Tlen ijkuilijtok tlatsintla
^ O “demonios”.
^ Kanajya kiijtouaj “toTeotsij”.
^ Xikita tlen Dios ayamo tematiltia.
^ O “momakixtisej”.
^ Kanajya kiijtouaj “kitlikuiltia”.
^ Kanajya kiijtouaj “camajtsintla”.
^ Kanajya kiijtouaj “miyantok”.
^ Ni eliyaya se barco pilsiltsi tlen kitekiuiyayaj kema michtlajtlamayayaj.
^ O uelis “miak tonali chikauak kiitskitoya”.
^ Kanajya kiijtouaj “kiikxiilpitoyaj”.
^ Soldados tlen Roma moxexelouayayaj ika legiones tlen kipiayaya se 4 o 6 mil soldados. “Legión” nikaj kiijtosneki tlauel miakej.
^ Xikita ostotl tlen tlauel uejkatla.
^ Kanajya kiijtouaj “oksejko”, “sejkoyok”.
^ Ika griego “momakixtis”.
^ Kanajya kiijtouaj “moyolixkapaniyayaj”.
