Tlen kiijkuilok Marcos 2:1-28
2 Kema panok se keski tonali, Jesús sampa kalajki Capernaúm uan maseualmej kimatkej mokauayaya ipan se kali.
2 Yeka, miakej mosentilijkej nopaya, hasta ayokmo aka ueliyaya kalaki yon ueliyayaj monechkauiaj kampa puerta. Uan ya pejki kiniljuia nopa kuali tlamachtili.
3 Uajka, kiuikilijkej se katli amo ueliyaya kiojolinia itlakayo, uan nauij tlakamej kitlanantiauiyayaj.
4 Amo uelkej asij kampa Jesús pampa itstoyaj tlauel miakej maseualmej, yeka tlakoyonijkej kalkuitlapa* imelak Jesús uan kitemouijkej nopa tlapechtli kampa uilantoya* nopa tlakatl.
5 Kema Jesús kiitak tlauel kuali tlaneltokayayaj, kiiljuik katli mokokouayaya:* “Nokone, nimitstlapojpoljuia motlajtlakoljuaj”.
6 Nopaya nojkia moseuijtoyaj se keskij escribas* katli ipan ininyolo moiljuiyayaj:
7 “¿Kenke kiampa kamanalti ni tlakatl? Kiixpano Dios* ika tlen kiijtoua. Amo aka ueli kintlapojpoljuia sekinok inintlajtlakoljuaj, san Dios ueli kichiua”.
8 Jesús nimantsi kimatki tlen moiljuiyayaj, yeka kiniljuik: “¿Kenke kiampa inmoiljuiaj ipan inmoyolo?
9 Amo ouij nikijtos ‘nimitstlapojpoljuia motlajtlakoljuaj’, ¿pero uelis se akajya kiiljuis ni tlakatl ‘ximoketsa, xijtlanana motlapech uan xinejnemi’?
10 Uan para inkiitasej katli eli iKone se Maseuali* kipia tlanauatili para kintlapojpoljuis inintlajtlakoljuaj katli itstokej ipan Tlaltipaktli...”. Uajka, kiiljuik katli mokokouayaya:
11 “Na nimitsiljuia: ximoketsa, xijtlanana motlapech uan xia mochaj”.
12 Nimantsi nopa tlakatl moketski ininixpa sekinok, kitlananki itlapech uan nejnentiajki. Nochi mosentlachilijkej uan kiueyichijkej Dios, uan kiijtouayayaj: “Amo kema tikitstoyaj se tlamantli kej ni”.
13 Jesús sampa yajki iteno mar. Nochi maseualmej yauiyayaj kiitaj uan ya kinmachtiyaya.
14 Kema nejnentiauiyaya kiitak Leví,* katli eliyaya ikone Alfeo, moseuijtoya kampa tlainamayayaj impuestos, uan kiiljuik: “Ximochiua notokilijka”. Leví nimantsi moketski uan kitokilik.
15 Teipa, Jesús uan itokilijkauaj tlakuatoj ichaj Leví. Nojkia tlakuajkej ininuaya miakej katli tlainamayayaj impuestos uan katli tlajtlakolchiuayayaj. Miakej tlen inijuantij kitokiliyayaj Jesús.
16 Kema escribas, katli nojkia eliyayaj fariseos,* kiitakej Jesús tlakuayaya ininuaya katli tlainamayayaj impuestos uan katli tlajtlakolchiuayayaj, pejkej kiniljuiaj itokilijkauaj: “¿Ya tlakua ininuaya katli tlainamaj impuestos uan katli tlajtlakolchiuaj?”.
17 Kema Jesús kikajki tlen kiijtojkej, kiniljuik: “Katli amo mokokouaj amo moneki kiitatij se tepajtijketl, pero katli mokokouaj kena. Pampa amo niualajtok para nikinnotsas katli kichiuaj tlen kuali, niualajki para nikinnotsas katli tlajtlakolejkej”.
18 Itokilijkauaj Juan uan fariseos momajtoyaj mosauaj.* Yeka yajkej uan kitlatsintokitoj Jesús: “¿Kenke itokilijkauaj Juan uan inintokilijkauaj fariseos momajtokej mosauaj uan motokilijkauaj amo?”.
19 Jesús kinnankilik: “Iuampoyouaj* se katli mosiuajtis amo kinamiki mosauasej, ¿axke? Amo kinamiki mosauasej kema katli mosiuajtis nojua itstok ininuaya.
20 Pero asis se tonali kema katli mosiuajtis ayokmo itstos ininuaya,* uajka kena mosauasej.
21 Amo aka kitlatlamania* se yoyomitl tlen sosoltik ika se yoyomitl tlen yankuik. Pampa tlaj se akajya kiampa kichiuaskia, nopa yoyomitl tlen yankuik motsokoyolos, kitilanas* tlen sosoltik uan achi más tsayanis.
22 Nojkia, amo aka kiteka vino tlen yankuik ipan se kuetlaxbolsa tlen ya sosoltik. Tlaj se akajya kiampa kichiuaskia, nopa kuetlaxtli tsayaniskia uan toyauiskia vino, uan nopa kuetlaxbolsa ayokmo ueliskia kitekiuisej. Yeka vino tlen yankuik kitekaj ipan kuetlaxbolsa tlen yankuik”.
23 Ipan se tonali sábado* Jesús panotiauiyaya kampa tlatojtoktoyaj. Uan kema itokilijkauaj nejnentiauiyayaj pejkej kimatekij tlen nopaya toktoya.*
24 Yeka fariseos kiiljuijkej: “¡Xikita! ¿Kenke motokilijkauaj kichiuaj tlen amo kinamiki mochiuas ipan sábado?”.
25 Ya kinnankilik: “¿Amo kema inkipojtokej tlen kichijki David kema amo tleno kipixtoya, uan ya uan nopa tlakamej katli kipaleuiyayaj mayankej?
26 ¿Amo inkipojtokej tlen kichijki David kema kalajki ichaj Dios ipan nopa tlapoualistli kampa kamanalti tlen Abiatar, nopa sacerdote katli kipiayaya más tlanauatili? Ya uan nopa tlakamej kikuajkej nopa pantsi tlen kimaktiliaj Dios. Uan amo aka kinamikiyaya kichiuas nopa, san ueliskiaj kikuasej sacerdotes”.
27 Uajka Jesús kiniljuik: “Dios kichijki nopa sábado* para ma kinpaleui maseualmej, uan amo kinchijchijki maseualmej para ma kitekipanokaj sábado.
28 Yeka, katli eli iKone se Maseuali kipia tlanauatili hasta ipan sábado”.
Tlen ijkuilijtok tlatsintla
^ Kanajya kiijtouaj “kalpani”.
^ Kanajya kiijtouaj “uetstoya”, “motektoya”.
^ Kanajya kiijtouaj “kokoya”.
^ Kanajya kiijtouaj “toTeotsij”.
^ Xikita katli eli iKone se Maseuali.
^ Nojkia kitokaxtiyayaj Mateo.
^ Kanajya kiijtouaj “amo tlakuaj”.
^ O “Iamigos”.
^ O “se akajya kiuikas”.
^ O “kitlalilia se pilyoyontsi kampa tsayantok”.
^ O “kixolochos”.
^ Ni eli se xiuitl tlen kitokayayaj kampa moijkuilok Biblia, tlen ika kichijchiuayayaj pantsi.
