Tlen kiijkuilok Mateo 2:1-23
2 Kema Jesús ya tlakajtoya Belén, tlen mokaua Judea, ipan nopa tonali kema Herodes* tlanauatiyaya, ualajkej Jerusalén se keskij tlakamej katli kintlachiliyayaj sitlalimej uan kiampa kiijtouayayaj tlake panoskia teipa.
2 Uan tlatsintokakej: “¿Kanke itstok katli elis inintlanauatijka judíos? Pampa kema tiitstoyaj kampa kisa Tonati tikitakej isitlal, uan tiualajtokej tijselikij”.*
3 Kema tlanauatijketl Herodes kikajki nopa, ya uan nochi katli itstoyaj Jerusalén, tlauel mokuesojkej.
4 Nopa tlanauatijketl kinsentilik nochi sacerdotes katli kipiayayaj tlanauatili uan escribas,* uan kintlajtlanik kanke tlakatiskia nopa Cristo.*
5 Inijuantij kinankilijkej: “Ipan Belén tlen mokaua Judea, pampa Dios* kiampa kiijtok ika iteokamanalojka:*
6 ‘Uan ta Belén, tlen mokaua Judá, tlauel mopati maske tlanauatianij tlen Judá amo kiampa mitsitaj, pampa nopaya kisas se tlanauatijketl katli kiyakanas noaltepe Israel’”.
7 Uajka Herodes ichtakatsi tlanauatik ma kinnotsatij nopa tlakamej katli kintlachiliyayaj sitlalimej uan tlatsintokak kema nelnelia monextik nopa sitlali.
8 Teipa kintitlanki Belén uan kiniljuik: “Xiakaj uan ejeliuis* xijtemotij nopa pilokichpiltsi. Kema inkimatisej kanke itstok, xinechiljuikij, kiampa nojkia nias nijseliti”.
9 Kema nopa tlanauatijketl kiampa kiniljuik, inijuantij kistejkej. Uan nopa sitlali tlen kiitakej kema itstoyaj kampa kisa Tonati, kinyakantiauiyaya, uan moketsato kampa itstoya nopa pilokichpiltsi.
10 Kema kiitakej nopa sitlali, tlauel yolpajkej.
11 Kalajkej ipan nopa kali uan kiitakej nopa pilokichpiltsi iuaya inana María. Uajka motlankuaketskej uan mouijtsonkej* iixpa. Nojkia kitlapojkej ininpilkajontsitsij uan kimakakej oro, olíbano uan mirra.*
12 Pero kema kochtoyaj, Dios kiniljuik ayokmo ma yakaj kampa Herodes, yeka kema tlakuepilijkej ininaltepe, yajkej ipan seyok ojtli.
13 Kema nopa tlakamej ya kistejtoyaj, iángel Jehová* monextik kema José tlatemikiyaya uan kiiljuik: “Ximoisiuilti, xia Egipto, xijuika nopa pilokichpiltsi iuaya inana, uan ximokaua nopaya, uan na nimitsiljuis kema titlakuepilis pampa Herodes kitemos nopa pilokichpiltsi para kimiktis”.
14 Uajka José isak* uan ipan nopa youali kiuikak Egipto nopa pilokichpiltsi iuaya inana,
15 uan nopaya mokajki hasta kema Herodes mijki. Kiampa moaxitik tlen Jehová* kiijtok ika iteokamanalojka: “Nikiljuik nokone ma kisa tlen Egipto”.
16 Herodes tlauel kualanki kema kiitak nopa tlakamej katli kintlachiliaj sitlalimej, kikajkayajtoyaj. Uan ika tlen kiiljuijkej kiitak nopa pilokichpiltsi ayamo kiaxitiyaya ome xiuitl, yeka tlanauatik ma kinmiktikaj nochi pilokichpiltsitsij katli ayamo kiaxitiyayaj ome xiuitl, katli itstoyaj Belén uan ipan pilaltepetsitsij tlen nechka mokauayaya.
17 Kiampa moaxitik tlen Dios kiijtojtoya ika teokamanalojketl Jeremías:
18 “Ipan Ramá kakistik se akajya itoskak, chikauak chokayaya. Eliyaya Raquel katli kinchokiliyaya ikoneuaj; uan amo kinekiyaya ma kiyolchikauakaj pampa kimiktilijkej ikoneuaj”.
19 Kema Herodes mijki uan José nojua itstoya Egipto, se iángel Jehová* monextik kema tlatemikiyaya.
20 Uan kiiljuik: “Xia tlali Israel uan xijuika nopa pilokichpiltsi iuaya inana pampa ya mijkej katli kinekiyayaj kimiktisej”.
21 Uajka José tlakuepilik tlali Israel iuaya nopa pilokichpiltsi uan inana.
22 Pero kema kimatki Arquelao tlanauatiyaya uan amo itata Herodes, majmajki tlakuepilis Judea. Nojkia, ipan se temiktli Dios kiiljuik amo ma yaui nopaya, yeka yajki ipan tlali Galilea.
23 Uan mochantik ipan se altepetl tlen itoka Nazaret. Kiampa moaxitik tlen Dios kiijtojtoya ika teokamanalouanij: “Kiiljuisej eua Nazaret”.*
Tlen ijkuilijtok tlatsintla
^ O “timotlankuaketsakij iixpa”. Uejkajkia kema kiampa kichiuayayaj, kinextiyayaj kitlepanitaj se akajya.
^ O “Mesías”, “katli kitlapejpenijtokej”.
^ Kanajya kiijtouaj “toTeotsij”.
^ O “iprofeta”.
^ Kanajya kiijtouaj “kampa ueli”.
^ Kanajya kiijtouaj “mopachojkej”.
^ Kanajya kiijtouaj “ijitak”, “tlachixki”.
^ Nopa tlajtoli ika griego eua Nazaret, uelis mokixtijtok ipan se tlajtoli ika hebreo tlen kiijtosneki chamani o moseliltia se kuauitl o se xiuitl.
