Tlen kiijkuilok Mateo 22:1-46
22 Jesús sampa kinkamanaljuik ika neskayotl. Kiniljuik:
2 “Nopa Tlanauatijkayotl tlen eltok iluikak eli kej se tlanauatijketl katli kichijki se iljuitl pampa ikone mosiuajtiskia.*
3 Kintitlanki itlatekipanojkauaj ma kinnotsatij katli kintlanejtoyaj ipan nopa iljuitl, pero inijuantij amo kinejkej ualasej.
4 Teipa kintitlanki sekinok itlatekipanojkauaj, uan kinnauatik: ‘Xikiniljuikaj katli nikintlanejtok: “Xikitakaj, ya nijsenkajki tlakualistli. Ya kinmiktijtokej notorojuaj uan notlapialjuaj katli tojtomauakej. Nochi ya eltok. Xiualakaj ipan ni iljuitl” ’.
5 Pero inijuantij yajtejkej uan amo kintlakakilijkej. Se yajki imilaj, seyok yajki kampa tlanamakayaya;
6 uan sekinok kinitskijkej itlatekipanojkauaj nopa tlanauatijketl, kinkokojkej uan kinmiktijkej.
7 ”Uajka nopa tlanauatijketl tlauel kualanki uan kintitlanki isoldados; kintsontlamiltik nopa temiktianij uan kitlatik ininaltepe.
8 Teipa kiniljuik itlatekipanojkauaj: ‘Ya eltok nochi para ni iljuitl, pero katli nikintlanejki amo kinamikiyaya itstosej nikaj.
9 Yeka, xiakaj ipan ojojtli* tlen kisa ipan ni altepetl uan xikintlaneuikaj ma ualakaj ipan ni iljuitl nochi katli inkinpantisej’.
10 Uajka itlatekipanojkauaj yajkej ojojtli uan kinsentilijkej nochi katli kinpantijkej, katli kualmej uan katli amo kualmej. Uan kampa iljuichiuayayaj temitoya ika maseualmej katli kintlanejtoyaj.
11 ”Kema nopa tlanauatijketl yajki kinitato katli kintlanejtoya, kiitak se tlakatl amo mokentijtoya iyoyo tlen mokentiyayaj kema mosenkauaj.
12 Yeka kiiljuik: ‘Nouampox,* ¿kenke tiualajtok uan amo timokentijtok moyoyo tlen mokentiaj kema mosenkauaj?’. Nopa tlakatl amo tleno kiijtok.
13 Uajka nopa tlanauatijketl kiniljuik itlatekipanojkauaj: ‘Xijmetsilpikaj,* xijmailpikaj uan xijmajkauakaj kalixpa kampa tsintlayoua. Nopaya mochokilis uan tlankochueuechokas’.*
14 ”Pampa miakej kintlaneuij, pero san se keskij kintlapejpeniaj”.
15 Uajka, nopa fariseos* yajkej uan kitemolijkej kenijkatsa kichiuaskiaj ma motenkuapolo Jesús.
16 Yeka, kintitlankej se keskij inintokilijkauaj ininuaya se keskij katli kipaleuiyayaj Herodes ma kiiljuitij: “Tlamachtijketl, tijmatij ta nochipa tikijtoua tlen melauak, uan nelnelia titlamachtia iojui Dios* uan amo tijtemoua sekinok kuali ma mitsitakaj pampa amo titechikoita.
17 Uajka xitechiljui, ¿tlake timoiljuia? ¿Kinamiki tijmakasej impuesto* Tlanauatijketl tlen Roma,* o amo?”.
18 Pero Jesús kimatiyaya amo kuali inintlalnamikilis, yeka kiniljuik: “Amo xijpiakaj ome inmoxayak, ¿kenke inkitemoliaj ma nimotenkuapolo?
19 Xinechnextilikaj se tomij tlen ika moixtlaua impuesto”. Uan inijuantij kiualikilijkej se denario.*
20 Ya kintlatsintokik: “¿Ajkia ixayak tlen nikaj nesi uan ajkia itoka tlen nikaj ijkuilijtok?”.
21 Inijuantij kinankilijkej: “Tlanauatijketl tlen Roma”.* Ya nimantsi kiniljuik: “Uajka, xijmakakaj Tlanauatijketl tlen iaxka Tlanauatijketl, pero xijmakakaj Dios tlen iaxka Dios”.
22 Kema kikajkej nopa, mosentlachilijkej. Ayokmo tleno kiiljuijkej uan yajkej.
23 Ipan nopa tonali ualajkej nopa saduceos,* katli kiijtouaj amo moyolkuisej mijkatsitsij, uan kitlatsintokijkej:
24 “Tlamachtijketl, Moisés kiijtok: ‘Tlaj se tlakatl miki uan amo kinkajki ikoneuaj, uajka iikni moneki mosiuajtis iuaya iuejpol,* kiampa nopa konemej tlen kinpiasej elisej kej ikoneuaj katli mijki’.
25 Ipan toaltepe itstoyaj chikomej iknimej. Katli achtouiejketl mosiuajtik, pero teipa mijki uan katli eliyaya isiua monamiktik ika se iuejpol* pampa amo kinkajki ikoneuaj.
26 Nojkia kiampa panok ika ompa, ika expa, hasta asito ika chikompa.
27 Kema nochi iknimej mijkej, nojkia mijki nopa siuatl.
28 Xitechiljui, kema moyolkuisej katli miktokej, ¿ajkia tlen nopa chikomej iknimej elis isiua? Pampa nochi mosiuajtijkej iuaya”.
29 Jesús kinnankilik: “Inmojuantij inmokuapolojtokej, pampa amo inkimatij tlen kiijtoua iTlajkuilol Dios yon kenijkatsa eli iueyichikaualis.
30 Pampa kema moyolkuisej katli miktokej, tlakamej amo mosiuajtisej yon siuamej monamiktisej, pampa elisej kej ángeles katli itstokej iluikak.
31 Uan Dios inmechiljuik para moyolkuisej katli miktokej, ¿amo inkipojkej ipan iTlajkuilol Dios kampa inmechiljuik
32 ‘Na nieli iDios Abrahán, iDios Isaac uan iDios Jacob’? Ya amo eli ininDios katli miktokej, eli ininDios katli yoltokej”.
33 Kema kikajkej kenijkatsa tlamachtiyaya, nopa miakej maseualmej tlauel mosentlachilijkej.
34 Kema fariseos kimatkej saduceos ayokmo uelkej tlanankiliaj, mosentilijkej uan sansejko mopaleuijkej.
35 Uan se tlen inijuantij, katli kuali momachtijtoya Tlanauatili, kichiuilik ni tlajtlanili pampa kinekiyaya kiitas tlaj kena nelia kimatiyaya:
36 “Tlamachtijketl, ¿tlake tlanauatili más ipati ipan nopa Tlanauatili tlen kimakakej Moisés?”.
37 Ya kinankilik: “ ‘Xikikneli Jehová* moDios ika nochi moyolo, ika nochi monemilis* uan ika nochi motlalnamikilis’.
38 Ya ni eli nopa achtoui tlanauatili uan tlen más ipati.
39 Nopa ompa tlanauatili achi sanse elisneki: ‘Xikinikneli sekinok kej ta timoiknelia’.
40 Ipan ni ome tlanauatili motlatskilia nopa Tlanauatili uan tlen kiijkuilojkej Teokamanalouanij”.*
41 Teipa, kema fariseos monechikojtoyaj nopaya, Jesús kintlatsintokik:
42 “¿Tlake inmoiljuiaj tlen Cristo? ¿Ajkia eli itata?”. Inijuantij kinankilijkej: “David”.
43 Ya kintlatsintokik: “Uajka, ¿kenke David, kema ichikaualis Dios* kiyakanki, kiiljuik Cristo ‘noTeko’? Pampa ya kiijtok:
44 ‘Jehová* kiiljuik noTeko: “Ximoseui nomanejmak hasta kema nikintlalis moikxitla katli mitskualankaitaj” ’.
45 Tlaj David kiiljuia Cristo ‘noTeko’, ¿kenijkatsa Cristo ueliskia elis ikone David?”.
46 Amo aka uelki kinankilia. Uan desde nopa tonali, ayokmo kinejkej kichiuilisej sekinok tlajtlanili.*
Tlen ijkuilijtok tlatsintla
^ Kanajya kiijtouaj “monamiktiskia”.
^ Kanajya kiijtouaj “ojtinij”.
^ O “Amigo”.
^ Kanajya kiijtouaj “xikilpilikaj iikxi”.
^ Kiampa kichiuas pampa tlauel kualantos uan amo kimatis tlake kichiuas.
^ Kanajya kiijtouaj “toTeotsij”.
^ Kiijtosneki nopa impuesto tlen kiixtlauayaya sejse maseuali.
^ Ika griego “César”.
^ Ika griego “César”.
^ Kanajya kiijtouaj “icuñada”.
^ Kanajya kiijtouaj “icuñado”.
^ Kiijtosneki nochi tlen eltok ipan iTlajkuilol Dios ika Hebreo.
^ O “espíritu santo”.
^ Kanajya kiijtouaj “tlatsintokili”.
