Tlen kiijkuilok Mateo 24:1-51
-
TLEN KINEXTIA YA TLAKUEPILIK CRISTO (1-51)
-
Guerras, mayantli uan mojmolinia tlali (7)
-
Momoyauas nopa kuali tlamachtili (14)
-
Nopa ueyi tlaijiyouilistli (21, 22)
-
Tlen kinextia ya uala katli eli iKone se Maseuali (30)
-
Nopa higokuauitl (32-34)
-
“Sanse kej kema Noé itstoya” (37-39)
-
“Nochipa kuali xitlachixtokaj” (42-44)
-
Tlatekipanojketl katli temachtli uan tlatekipanojketl katli amo kuali (45-51)
-
24 Kema Jesús kistiauiyaya ipan nopa teokali, itokilijkauaj kinechkauijkej uan kimanextijkej nopa uejueyi kali tlen kipixtoya nopa teokali.
2 Uajka ya kiniljuik: “¿Inkiitaj nochi ni tlamantli? Temachtli niinmechiljuia, nikaj amo mokauas yon se tetl tekpichijtok. Nochi kiuelonisej”.*
3 Kema moseuijtoya ipan tepetl tlen Olivos, itokilijkauaj iyoka kinechkauijkej uan kitlatsintokijkej: “Xitechiljui, ¿kema panos nopa tlamantli uan tlake kinextis ya titlakuepilik* uan tlake kinextis nechka tlamis tlen mochijtok ipan Tlaltipaktli?”.*
4 Jesús kinnankilik: “Ximomokuitlauikaj. Amo aka ma inmechkajkayaua,*
5 pampa ualasej miakej katli kitekiuisej notoka uan kiijtosej ‘Na niCristo’, uan kinkajkayauasej miakej maseualmej.
6 Inmojuantij inkikakisej guerras uan inkimatisej kanajya onka guerras. Pero amo ximomajmatikaj, pampa moneki panos ni tlamantli, pero ayamo eli itlamia.
7 ”Pampa se pilaltepetsi moteuis ika seyok pilaltepetsi, uan se ueyi altepetl* ika seyok ueyi altepetl, onkas mayantli uan ejeliuis* mojmolinis* tlali.
8 Nochi ni tlamantli kinextia sanok pejtok* uejueyi tlaijiyouilistli.*
9 ”Uajka inmechtlaijiyouiltisej uan inmechmiktisej, uan ipan nochi altepemej inmechkualankaitasej pampa inelij notokilijkauaj.
10 Uan miakej ayokmo tlaneltokasej, motlateljuisej* uan mokualankaitasej.
11 Motlananasej miakej katli amo nelnelia elisej teokamanalouanij* uan kinkajkayauasej miakej maseualmej
12 uan kema momiakilis tlen amo kuali,* miakej ayokmo teiknelisej.
13 Pero katli kiijiyouijtos hasta itlamia, momanauis.*
14 Uan nopa kuali tlamachtili tlen iTlanauatijkayo Dios momoyauas ipan nochi Tlaltipaktli para nochi altepemej uelis kikakisej, uan teipa ualas itlamia ni tonali.
15 ”Yeka, kema inkiitasej nopa tlamantli tlen kiijiaj* uan tlaxoleua,* tlen kiijtok teokamanalojketl* Daniel, ijkatok kampa iaxka Dios (katli kipoua* ma kitekiui itlalnamilikis),
16 uajka katli itstokej ipan Judea ma cholokaj ipan tepemej.
17 Katli itstos kalkuitlapa* amo ma temo para kikixtis tlen kipixtok,
18 uan katli itstos mila amo ma tlakuepili para kitemoti tlen ika moajkoluijkoma.*
19 ¡Teikneltikej nopa siuamej katli tlanemiltisej* o tlachichitisej ipan nopa tonali!
20 Miakpa ximomaijtokaj* para amo incholosej kema tlauel tlaseseyas* o ipan tonali sábado.*
21 Pampa onkas se ueyi tlaijiyouilistli.* Desde kema pejki Tlaltipaktli hasta nama, amo onkatok se tlaijiyouilistli kej nopa, uan ayokmo kema sampa onkas.
22 Tlaj nopa tonali amo mochiuaskia kototsi, amo aka momanauiskia; pero mochiuas kototsi, kiampa kinpaleuis katli kintlapejpenijtokej.
23 ”Uajka, tlaj se akajya inmechiljuis ‘Xikitakaj, nikaj itstok Cristo’ o ‘Nepa itstok’, amo xijneltokakaj.
24 Pampa monextisej istlakatikacristos* uan katli amo nelnelia elisej teokamanalouanij,* kichiuasej uejueyi milagros uan uejueyi tlamantli para tlakajkayauasej, uan hasta uelis kinkajkayauasej katli kintlapejpenijtokej.
25 Xikitakaj, ya niinmechmatiltijtok tlen panos.
26 Yeka, tlaj inmechiljuisej ‘¡Xikitakaj, itstok ipan uaktok tlali!’, amo xiakaj; tlaj inmechiljuisej ‘¡Xikitakaj, itstok kalijtik!’, amo xijneltokakaj.
27 Pampa sanse kej kema tlapetlani kampa kisa Tonati uan nesi hasta kampa onkalaki, nojkia kiampa elis kema tlakuepilis* katli eli iKone se Maseuali.*
28 Kampa eltos itlakayo se mijkatsi,* nopona mosentilisej kuajmej.*
29 ”Nimantsi kema panotos nopa tlaijiyouilistli tlen mochiuas ipan nopa tonali, Tonati amo tlauis, uan metstli amo tlaminas,* sitlalimej tepeuisej tlen iluikak uan nochi tlamantli tlen eltok iluikak, kitsejtselosej.
30 Uajka nesis ipan iluikak tlen kinextis ya uala katli eli iKone se Maseuali* uan nochi altepemej ipan Tlaltipaktli moyolixtejtetsonasej* pampa moyolkokosej uan kiitasej katli eli iKone se Maseuali ualajtiuala ipan mixtli tlen iluikak ika tlanauatili uan iueyitilis.
31 Kema chikauak kakistis nopa trompeta, kintitlanis iángeles ma kinsentilikaj katli kintlapejpenijtok, ipan naui inakastla Tlaltipaktli, kampa peua iluikak hasta kampa ontlami.
32 ”Xikitakaj tlake inmechmachtia nopa higokuauitl. Kema moseliltia imakuayo uan xiuiyokisa,* inkimatij ya nechka tlatotonias.*
33 Inmojuantij nojkia, kema inkiitasej nochi ni tlamantli, xijmatikaj yaya* itstok nechka, puertajteno.
34 Temachtli niinmechiljuia, ni maseualmej amo ixpoliuisej hasta kema panos nochi ni tlamantli.
35 Iluikaktli uan Tlaltipaktli ixpoliuisej, pero notlajtol* amo kema ixpoliuis.
36 ”Nopa tonali uan nopa hora amo aka kimati, yon ángeles katli itstokej iluikak, yon iKone Dios;* san toTata.
37 Pampa sanse kej kema Noé itstoya, nojkia kiampa elis kema tlakuepilis* katli eli iKone se Maseuali.*
38 Pampa ipan nopa tonali kema ayamo uetsiyaya miak atl, maseualmej tlakuayayaj uan tlaiyayaj, tlakamej mosiuajtiyayaj uan ichpokamej monamiktiyayaj... hasta nopa tonali kema Noé kalajki ipan arca;
39 uan amo kitlakakilijkej hasta kema uetski miak atl uan nochi kintsontlamiltik. Kiampa panos kema tlakuepilis katli eli iKone se Maseuali.
40 Omej tlakamej itstosej mila: se kiuikasej uan se kikajteuasej.*
41 Omej siuamej kitistosej trigo: se kiuikasej uan se kikajteuasej.*
42 Uajka, nochipa kuali xitlachixtokaj, pampa amo inkimatij tlake tonali uala inmoTeko.
43 ”Xijmajtokaj se tlamantli: tlaj katli iaxka se kali kimatiskia tlake hora ika tlayoua ualaskia nopa tlachtejketl, amo kochiskia uan amo kikauaskia ma kalaki ichaj.
44 Yeka, inmojuantij nojkia kuali xitlachixtokaj, pampa katli eli iKone se Maseuali* uala ipan se hora kema amo inkichiaj.
45 ”¿Ajkia nelnelia eli nopa tlatekipanojketl katli temachtli uan tlalnamiki, katli iteko kitekitlalik ipan ichaj ma kinyakana nopa sekinok itekipanojkauaj uan ma kintlamaka kema kinamiki?
46 ¡Yolpakis nopa tlatekipanojketl tlaj kema asiki iteko, kipantiki kichijtok nopa!
47 Temachtli niinmechiljuia, kitekimakas ma kiyakana* nochi tlen iaxka.
48 ”Pero tlaj nopa tlatekipanojketl kichiuas tlen amo kuali uan peuas moiljuis ipan iyolo ‘Ya uejkajki noteko’
49 uan peua kinmakilia* nopa sekinok tlatekipanouanij uan tlakua uan tlai ininuaya katli seniuintitokej,*
50 iteko nopa tlatekipanojketl ualas ipan se tonali kema ya amo kichia uan ipan se hora kema amo kimati,
51 uan tlauel chikauak kitlatsakuiltis uan kitlalis kampa itstokej katli kipiaj ome ininxayak. Nopaya mochokilis uan tlankochueuechokas.*
Tlen ijkuilijtok tlatsintla
^ O “kixoleuasej”.
^ Ika griego parusía. Xikita kema Cristo tlakuepilis.
^ O “inmechkuapolo”.
^ O “kampa tekichiua se tlanauatijketl”.
^ Kanajya kiijtouaj “kampa ueli”.
^ Kanajya kiijtouaj “mouisos”.
^ O “ipejya”.
^ Ika griego “tlakuajkualokayotl kema se siuatl konepia”.
^ O “motemaktilisej se ika seyok”.
^ O “istlakatikaprofetas”.
^ Ika griego “kiixpanosej tlanauatili”. Nopa kiijtosneki ayokmo kipatiitasej itlanauatiljuaj Dios.
^ O “momakixtis”.
^ O “tlauel fiero”.
^ O “tlasosoloua”.
^ O “profeta”.
^ Ni kiijtosneki katli kipoua nopa profecía tlen kiijkuilok Daniel.
^ Kanajya kiijtouaj “kalpani”.
^ Xikita tlen ika moajkoluijkomayayaj.
^ Kanajya kiijtouaj “konekuitosej”.
^ Kanajya kiijtouaj “ximotlatlajtikaj”.
^ Kanajya kiijtouaj “seseuas”.
^ O “se ueyi kuesoli”.
^ O “istlakatikaprofetas”.
^ O “katli amo nelnelia elij cristos”.
^ Xikita kema Cristo tlakuepilis.
^ Xikita katli eli iKone se Maseuali.
^ Ika griego ni kiijtosneki itlakayo se maseuali o se tlapiali.
^ Kanajya kiijtouaj “águilas”.
^ O “tlauis”.
^ Xikita katli eli iKone se Maseuali.
^ Kanajya kiijtouaj “moyolixkapanisej”.
^ O “chamani”.
^ Ipan Israel ni eli kema moskaltia uan xochiyoua kuauitl uan tlen kitoktokej.
^ Kineki kiijtos katli eli iKone se Maseuali.
^ Kanajya kiijtouaj “nokamanal”.
^ Kanajya kiijtouaj “toTeotsij”.
^ Xikita kema Cristo tlakuepilis.
^ Xikita katli eli iKone se Maseuali.
^ O “kitlauelkauasej”.
^ O “kitlauelkauasej”.
^ Xikita katli eli iKone se Maseuali.
^ O “ma kimokuitlaui”.
^ O “kinteuia”.
^ Kanajya kiijtouaj “sentlaitokej”.
^ Kiampa kichiuas pampa tlauel kualantos uan amo kimatis tlake kichiuas.
