Tlen kiijkuilok Mateo 25:1-46
25 ”Uajka, nopa Tlanauatijkayotl tlen eltok iluikak eli kej matlaktli ichpokamej katli kikuikej inintlauil uan kinamikitoj katli mosiuajtis.
2 Makuiltij eliyayaj uiuitikej uan makuiltij tlalnamikiyayaj.
3 Nopa ichpokamej katli uiuitikej kiuikakej inintlauil pero amo kiuikakej aceite,
4 uan katli tlalnamikiyayaj kiuikakej inintlauil uan seyok kentsi aceite.
5 Katli mosiuajtiskia amo asiyaya, yeka nochi kochisnejkej uan kochkej.
6 Pero tlajkoyoual kakistik se akajya chikauak kiijtouayaya: ‘¡Ya asiko katli mosiuajtis! ¡Xiualakaj xijselikij!’.
7 Uajka nochi nopa ichpokamej moketskej uan kikualtlalijkej inintlauil.
8 Uan katli uiuitikej kiniljuijkej katli tlalnamikij: ‘Xitechmakakaj se kentsi inmoaceite pampa totlauil ya nechka seuis’.
9 Katli tlalnamikij kinnankilijkej: ‘Uelis amo techaxilis para tinochi. Más kuali xiakaj kampa kinamakaj uan xijkouatij’.
10 Pero, kema yajkej kikouatoj, asiko katli mosiuajtiskia. Uan nopa ichpokamej katli kikualtlalijtoyaj inintlauil kalajkej iuaya ipan iljuitl, uan motsajki nopa puerta.
11 Teipa ualajkej nopa sekinok ichpokamej uan kiijtojkej: ‘¡Toteko, toteko, xitechkaltlapo!’.
12 Uan ya kinnankilik: ‘Temachtli niinmechiljuia, na amo niinmechixmati’.
13 ”Yeka nochipa kuali xitlachixtokaj pampa amo inkimatij tlake tonali yon tlake hora niualas.
14 Nopa Tlanauatijkayotl nojkia eli kej se tlakatl, katli kema nechka yaskia seyok altepetl, kinnotski itlatekipanojkauaj uan kinkauilijtejki tlen kipixtoya.
15 Se itlatekipanojka kimakak makuili talentos,* seyok kimakak ome uan nopa seyok kimakak se. Sejse kimakak kej yajatiskia kitekiuis, uan teipa yajki seyok altepetl.
16 Uan katli kiselik makuili talentos, nimantsi yajki uan kitekiuik* uan kitlanki seyok makuili.
17 Nojkia, katli kiselik ome, kitlanki seyok ome.
18 Pero katli kiselik san setsi, yajki, tlaxajki uan kitlalpachok nopa tomij* tlen iteko kimakatoya.
19 ”Kema panok miak tonali, ininteko nopa tlatekipanouanij ualajki uan kiitako tlake kichijtoyaj ika itomij.
20 Katli kiselijtoya makuili talentos* ualajki ika seyok makuili talentos, uan kiiljuik: ‘Noteko, tinechkauilijtejki makuili talentos, xikita, nijtlanki seyok makuili’.
21 Iteko kinankilik: ‘¡Kuali tlen tijchijki, notlatekipanojka katli kuali uan titemachtli! Tijnextik titemachtli kema tijmokuitlauik se keski tlamantli, yeka nimitstlalis xijmokuitlaui nojua más miak. Xiuala uan xiyolpaki iuaya moteko’.
22 Teipa ualajki katli kiselijtoya ome talentos uan kiiljuik: ‘Noteko, tinechkauilijtejki ome talentos, xikita, nijtlanki seyok ome’.
23 Iteko kinankilik: ‘¡Kuali tlen tijchijki, notlatekipanojka katli kuali uan titemachtli! Tijnextik titemachtli kema tijmokuitlauik se keski tlamantli, yeka nimitstlalis xijmokuitlaui nojua más miak. Xiuala uan xiyolpaki iuaya moteko’.
24 Uan teipa ualajki katli kiselijtoya se talento* uan kiiljuik: ‘Noteko, na nijmatiyaya ta chikauak titlanauatia, tipixka kampa amo tijtoktok uan tijsentilia kampa amo titekititok.
25 Yeka nimajmajki uan nijtlalpachoto motalento. Xikita, nikaj eltok tlen moaxka’.
26 Iteko kinankilik: ‘Tlatekipanojketl katli amo kuali uan tlatsiui. Tlaj tijmatiyaya nipixka kampa amo nitojki uan nijsentilia kampa amo nitekititok,
27 uajka, ¿kenke amo tijuikak notomij ipan banco uan kema niualaskia, nijselijtoskia ika itlanka?’.
28 ”Teipa kiijtok: ‘Xijkixtilikaj nopa talento* uan xijmakakaj katli kipia matlaktli talentos.
29 Pampa katli kipia, nojua más kimakasej, uan kipias tlauel miak; pero katli amo tleno kipia, kikixtilisej hasta tlen kipixtok.
30 Uan nopa tlatekipanojketl katli amo tleno ueli kichiua,* xijmajkauakaj kalixpa kampa tsintlayoua. Nopaya mochokilis uan tlankochueuechokas’.*
31 ”Kema katli eli iKone se Maseuali* ualas ika iueyitilis,* uan nochi ángeles ualasej iuaya, uajka moseuis ipan iueyi silla tlen yejyektsi.
32 Kinsentilisej nochi altepemej iixpa uan ya kinxelos nopa maseualmej, sanse kej se tlapialmokuitlauijketl kinxeloua pilborregojtsitsij tlen chivojmej.
33 Kintlalis pilborregojtsitsij ika imanejmak uan chivojmej ika imaarraves.*
34 ”Uajka nopa Tlanauatijketl kiniljuis katli itstokej ika imanejmak: ‘Xiualakaj inmojuantij, katli noTata inmechteochijtok, ximoaxkatikaj* nopa Tlanauatijkayotl tlen kisenkajtokej para inmojuantij desde kema pejki Tlaltipaktli.*
35 Pampa nimayanki uan inmojuantij innechtlamakakej. Niamijki* uan inmojuantij innechamakakej. Amo innechixmatiyayaj uan amo nijpiayaya kanke nimokauas, pero inmojuantij kuali innechselijkej ipan inmochaj.
36 Amo nijpiayaya tlen nimokentis uan inmojuantij innechyoyontijkej. Nimokokok* uan inmojuantij innechmokuitlauijkej. Nechtsaktoyaj uan inualajkej innechitakoj’.
37 Uajka, katli kichijkej tlen kuali kinankilisej: ‘ToTeko, ¿kema timitsitakej timayanayaya uan timitstlamakakej, o tiamikiyaya uan timitsamakakej?
38 ¿Kema kuali timitsselijkej maske amo timitsixmatiyayaj? ¿Kema timitsitakej amo tijpiayaya tlen timokentis uan timitsyoyontijkej?
39 ¿Kema timokokok o titsaktoya uan timitsitatoj?’.
40 Uan nopa Tlanauatijketl kinnankilis: ‘Temachtli niinmechiljuia, pampa inkipaleuijkej se tlen ni noikniuaj katli amo tlauel pankisaj,* eliskia kejuak na innechpaleuijkej’.
41 ”Katli itstokej ika imaarraves kiniljuis: ‘Xinechtlalkauikaj, inmojuantij katli inmechtelchijtokej. Xiakaj ipan tlitl tlen amo kema seui tlen kisenkajtokej para Diablo uan amo kuali iajakauaj.*
42 Pampa nimayanki uan inmojuantij amo innechtlamakakej. Niamijki uan inmojuantij amo innechamakakej.
43 Amo innechixmatiyayaj uan amo nijpiayaya kanke nimokauas pero inmojuantij amo innechselijkej ipan inmochaj. Amo nijpiayaya tlen nimokentis uan inmojuantij amo innechyoyontijkej. Nimokokok uan nechtsaktoyaj pero inmojuantij amo innechmokuitlauijkej’.
44 Uajka inijuantij nojkia kinankilisej: ‘ToTeko, ¿kema timitsitakej timayanayaya o tiamikiyaya, o amo timitsixmatiyayaj, o amo tijpiayaya tlen timokentis, o timokokouayaya o titsaktoya uan amo timitspaleuijkej?’.
45 Uan ya kinnankilis: ‘Temachtli niinmechiljuia, pampa amo inkipaleuijkej se tlen ni noikniuaj katli amo tlauel pankisaj, eliskia kejuak na amo innechpaleuijkej’.
46 Inijuantij kintsontlamiltisej para nochipa, pero katli kichiuaj tlen kuali, kipiasej nemilistli tlen amo kema tlamis”.*
Tlen ijkuilijtok tlatsintla
^ O “kitekitiltik nopa tomij”.
^ Ika griego “plata”.
^ Kanajya kiijtouaj “amo ipa”.
^ Kiampa kichiuas pampa tlauel kualantos uan amo kimatis tlake kichiuas.
^ Xikita katli eli iKone se Maseuali.
^ O “itlatlanex”.
^ Kanajya kiijtouaj “imaopoch”.
^ O “xijselikaj”.
^ Ni kiijtosneki kema pejkej tlakatij ininkoneuaj Adán uan Eva.
^ Kanajya kiijtouaj “niateuajki”.
^ Kanajya kiijtouaj “nimokokolismakak”.
^ O “tlen ueltsitsij”.
^ Ika griego “iángeles”.
^ O “itstosej para nochipa”.
