Tlen kiijkuilok Mateo 28:1-20
28 Kema ya panotoya sábado, kema tlanestiualayaya ipan nopa achtoui tonali kema peua semana, María Magdalena uan nopa seyok María yajkej kitlachilitoj nopa mijkaostotl.
2 Uan chikauak mojmolinijtoya tlali, pampa iángel Jehová* ualtemotoya tlen iluikak, monechkauijtoya kampa mijkaostotl uan kimimilojtoya nopa tetl; uan moseuijtoya ipani.
3 Nopa ángel petlaniyaya kej kema tlapetlani uan iyoyo eliyaya tlauel chipauak.
4 Katli tlamokuitlauiyayaj tlauel momajmatijkej uan pejkej uiuipikaj, yeka mokajkej kej miktokej.
5 Nopa ángel kiniljuik nopa siuamej: “Amo ximomajmatikaj; na nijmati inkitemouaj Jesús katli kimiktijkej ipan se kuauitl.
6 Amo itstok nikaj, pampa ya moyolkuik* kej kiijtok. Xiualakaj, xikitakaj kampa kitejkej itlakayo.
7 Uan nama xiajtiuetsikaj* uan xikiniljuitij itokilijkauaj: ‘Ya moyolkuik, uan xikitakaj, tlayakantia Galilea uan nepa inmechchiati; nopaya inkiitasej’. Ya ni tlen niinmechiljuiko”.
8 Uajka, maske momajmatijtoyaj tlauel yolpakiyayaj, uan nimantsi kistejkej kampa mijkaostotl uan motlalojtejkej kiniljuitoj itokilijkauaj.
9 Uan kema yauiyayaj ojtipa, Jesús kinnamijki uan kiniljuik: “Yaui”.* Inijuantij kinechkauijkej, motlankuaketskej iixpa uan kiikxinajnauajkej.*
10 Uajka Jesús kiniljuik: “Amo ximomajmatikaj. Xiakaj, xikinmatiltikaj noikniuaj ma yakaj Galilea; nopaya nechitasej”.
11 Kema nopa siuamej nejnentiauiyayaj, se keskij tlamokuitlauianij yajkej ipan altepetl uan kinpouilitoj sacerdotes katli kipiayayaj tlanauatili nochi tlen panotoya.
12 Uajka, kema inijuantij ya mosentilijtoyaj ininuaya katli kinyakanayayaj judíos para kiitasej tlake kichiuaskiaj, kinmakakej soldados miak platatomij
13 uan kiniljuijkej: “Inmojuantij xikijtokaj: ‘Itokilijkauaj ualajkej ika tlayoua uan kiichtejkej itlakayo kema tikochtoyaj’.
14 Uan tlaj Pilato kimatis, tojuantij timokamanaljuisej iuaya.* Inmojuantij amo ximotekipachokaj”.
15 Uajka inijuantij kiselijkej nopa platatomij, uan kichijkej tlen kinnauatijtoyaj. Uan hasta ipan ni tonali, ni istlakatili momoyajtok kampa judíos.
16 Uan nopa 11 itokilijkauaj yajkej Galilea, ipan nopa tepetl kampa Jesús kiniljuijtoya mopantiskiaj.
17 Kema kiitakej, motlankuaketskej iixpa. Pero se keskij kimatkej ouij kineltokasej tlaj ya eliyaya.
18 Jesús monechkauik uan kiniljuik: “Nechmakatokej nochi tlanauatili ipan iluikaktli uan ipan Tlaltipaktli.
19 Uajka, xiakaj uan xikinmachtikaj maseualmej tlen nochi altepemej ma elikaj notokilijkauaj. Xikinatsonpoliuiltikaj ika itoka toTata, ika iKone uan ika ichikaualis Dios.*
20 Xikinmachtikaj ma kineltokakaj nochi tlen niinmechnauatijtok. Uan xikilnamikikaj, nochipa niitstos inmouaya hasta kema tlamis* tlen mochijtok ipan Tlaltipaktli”.*
Tlen ijkuilijtok tlatsintla
^ Ika griego “motlananki”.
^ O “nimantsi xiakaj”.
^ Kanajya kiijtouaj “Piali”.
^ Kanajya kiijtouaj “kimetsnajnauajkej”.
^ O “tikixtomilisej”.
^ O “espíritu santo”.
^ O “itlamia”.
