Tlen kiijkuilok Mateo 5:1-48
-
KEMA TLAMACHTIK IPAN SE TEPETL (1-48)
-
Jesús peua tlamachtia (1, 2)
-
Katli yolpakij (3-12)
-
Istatl uan tlauili (13-16)
-
Jesús ualajki para kichiuas tlen kiijtoua Tlanauatili (17-20)
-
Tlamachtia kenijkatsa kisenkauasej kualantli (21-26), kema momekatiaj (27-30), kema mokauaj (31, 32), kema kitenkauaj se tlamantli (33-37), kema momakuepaj (38-42), kiniknelisej katli kinkualankaitaj (43-48)
-
5 Kema Jesús kinitak miakej mosentilijtoyaj, kentsi ixtlejkok ipan se tepetl uan moseuik. Teipa itokilijkauaj kinechkauijkej.
2 Uajka pejki tlamachtia uan kiijtok:
3 “Yolpakij katli kimatij moneki Dios* ma kinyakana, pampa nopa Tlanauatijkayotl tlen eltok iluikak eli ininaxka.
4 ”Yolpakij katli mokuesouaj, pampa inijuantij kinyolchikauasej.
5 ”Yolpakij katli yolyamanikej,* pampa inijuantij moaxkatisej Tlaltipaktli.
6 ”Yolpakij katli tlauel kinekij* kichiuasej tlen xitlauak, pampa Dios kichiuas nochi tlen inijuantij kinekij.
7 ”Yolpakij katli tetlasojtlaj, pampa nojkia kintlasojtlasej.
8 ”Yolpakij katli yolkualmej, pampa inijuantij kiitasej Dios.
9 ”Yolpakij katli tlapaleuiaj nochi kuali ma mouikakaj, pampa inijuantij elisej ikoneuaj Dios.
10 ”Yolpakij katli kintlatsakuiltiaj pampa kichiuaj tlen kuali, pampa nopa Tlanauatijkayotl tlen eltok iluikak eli ininaxka.
11 ”Xiyolpakikaj kema inmechtlaijiljuisej, inmechtlatsakuiltisej uan inmechistlakauisej kema kiijtosej miak tlamantli tlen amo kuali pampa innechneltokaj.
12 Tlauel xiyolpakikaj pampa inkiselisej se ueyi tlateochiualistli ne iluikak, pampa teokamanalouanij* katli itstoyaj uejkajkia nojkia kiampa kintlatsakuiltijkej.
13 ”Inmojuantij inelij kej istatl ipan Tlaltipaktli. Pero tlaj istatl kipolos ipoyejka, ¿sampa uelis kipoyeltisej? Ayokmo uelis motekiuis, san kitepeuaj uan ipan mokejketsaj.
14 ”Inmojuantij inelij kej tlauili ipan Tlaltipaktli. Se altepetl tlen eltok tepeixko nima nesi.
15 Amo aka kitlatia* se tlauili uan teipa kitsakua ika se chikiuitl.* Ya kitlalia ipan se tlauilketsali, kiampa kintlauilis nochi katli itstokej kalijtik.
16 Nojkia inmojuantij, xijchiuakaj sekinok ma kiitakaj inmotlauil kema inkichiuaj kuajkuali tlamantli, kiampa inijuantij kiueyichiuasej inmoTata katli itstok iluikak.
17 ”Amo ximoiljuikaj niualajtok para nijchiuas ayokmo ma kitekiuikaj* nopa Tlanauatili o tlen kiijkuilojkej Teokamanalouanij. Amo, na niualajtok para nijchiuas tlen nopaya kiijtoua.
18 Temachtli niinmechiljuia, iluikaktli uan Tlaltipaktli uelis ixpoliuisej pero yon se letra tlen más pilsiltsi* o se rayita tlen kipia se letra tlen eltok ipan nopa Tlanauatili, amo ixpoliuis hasta moaxitis nochi.
19 Yeka, tlaj se akajya amo kineltoka se tlanauatili, maske amo tlauel ueyi, uan kinmachtia sekinok nojkia kiampa ma kichiuakaj, amo uelis kalakis ipan nopa Tlanauatijkayotl tlen eltok iluikak. Uan katli kichiua tlen kiijtoua nopa Tlanauatili uan kinmachtia sekinok, kalakis ipan nopa Tlanauatijkayotl tlen eltok iluikak.
20 Niinmechiljuia, tlaj inmojuantij amo inkichiuaj tlen kuali ika nochi inmoyolo, uajka inelij kej escribas* uan fariseos* uan amo kema uelis inkalakisej ipan nopa Tlanauatijkayotl tlen eltok iluikak.
21 ”Ya inkimatij katli itstoyaj uejkajkia kiniljuijkej: ‘Amo xitemikti, pampa katli temiktia kiuikasej kampa tekichiuanij’.
22 Pero na niinmechiljuia tlaj se akajya nojua kualantok ika se iikni, kiuikasej kampa tekichiuanij. Uan katli san tlemach kiiljuia iikni, kiuikasej kampa Tekichiuanij katli kipiaj más Tlanauatili.* Pero tlaj se akajya kiiljuis ‘¡tiuiuitik, axtitlalnamiki!’, uelis tlamiti ipan Gehena* kampa tlalelemekatok.
23 ”Yeka, tlaj tijuika se ofrenda* ipan tlaixpamitl, uan nopaya tikilnamiki moikni kualantok mouaya,
24 xijkajteua moofrenda kampa tlaixpamitl, uan xia. Achtoui ximoyoltlaliti ika moikni uan teipa xitlakuepili uan xitemaka tlen tijuika.
25 ”Tlaj se akajya katli iuaya timokualanijtok mitstlateljuia, xijchiua kampeka nima tijsenkauas nopa kuesoli kema ayamo inasij kampa tekichiuanij. Tlaj amo kiampa tijchiuas, uelis mitstemaktiliti ika se tekichijketl uan nopa tekichijketl mitstemaktilis ika tetsajketl uan mitstsakuasej.
26 Temachtli nimitsiljuia amo tikisas hasta kema titlamitlaxtlauas nochi tomij.*
27 ”Inmojuantij inkimatij tlen kiijtojkej: ‘Amo xijkajkayaua monamik’.*
28 Pero na niinmechiljuia tlaj se akajya kitlachilia se siuatl katli amo eli isiua, uan peua moiljuia tlen amo kinamiki, ipan iyolo eliskia kejuak ya motejki iuaya.
29 Yeka, tlaj moixteyol tlen eltok ika momanejmak kichiua xitlajtlakolchiua, ximoixteyolkixti uan uejka xijmajkaua. Más kuali tijpolos se moixteyol uan amo nochi motlakayo kimajkauasej ipan Gehena.*
30 Nojkia, tlaj momanejmak kichiua xitlajtlakolchiua, xijtsonteki uan uejka xijkuatlauiso. Más kuali tijpolos se momax, uan amo nochi motlakayo kimajkauasej ipan Gehena.
31 ”Nojkia moijtok: ‘Se tlakatl katli kikaua isiua moneki kimakas se amatl kampa nesi mokauaj’.*
32 Uan na niinmechiljuia tlaj se tlakatl kikaua isiua uan amo pampa motejki iuaya seyok,* uelis kichiuas isiua ma momekati ika seyok. Uan katli mosiuajtia ika nopa siuatl, nojkia momekatia iuaya.
33 ”Nojkia inkimatij katli itstoyaj uejkajkia kiniljuijkej: ‘Amo xijtenkaua se tlamantli tlaj tijmati amo uelis tijchiuas; xijchiua tlen tijtenkauilijtok* Jehová’.*
34 Pero na niinmechiljuia: amo kema xijtenkauakaj se tlamantli, yon xijtestigojketsakaj iluikak, pampa nopaya moseuia Dios;
35 yon Tlaltipaktli, pampa nopaya kitlalia iikxi; yon ika Jerusalén, pampa eli ialtepe ueyi Tlanauatijketl.
36 Nojkia, amo xijtestigojketsa motsonteko, pampa amo uelis tijchiuas yon se motsonkal ma mochiua chipauak o yayauik.
37 Yeka, tlaj inkiijtosej ‘kena’ inkichiuasej se tlamantli, uajka xijchiuakaj; uan tlaj inkiijtosej ‘amo’, uajka amo xijchiuakaj, pampa kema amo inkichiuaj tlen inkiijtojkej, inkichiuaj kej Axkualtlakatl.
38 ”Inmojuantij inkimatij tlen kiijtojkej: ‘Tlaj se akajya teixteyolpitsinia, nojkia ma kiixteyolpitsinikaj. Uan tlaj se akajya tetlankochtepeua, nojkia ma kitlankochtepeuakaj’.
39 Pero na niinmechiljuia: amo ximoteuikaj ika se katli amo yolkuali. Más kuali, tlaj se akajya mitsixtlatsinis,* xijkaua ma mitsixtlatsini ipan ne seyok mokampa.
40 Uan tlaj se akajya kineki mitsteljuis kampa tekichiuanij pampa kineki moyoyo ueueyak,* nojkia xijmaka tlen ika timoajkoluijkoma.*
41 Uan tlaj se akajya katli kipia tlanauatili mitschiualtia xijtekipano se hora, ta xijtekipano ome hora.
42 Katli mitstlajtlania se tlenijki, xijmaka. Uan tlaj se akajya kineki xijtlanejti se tlamantli,* uajka xijtlanejti.
43 ”Inmojuantij inkimatij tlen kiijtojkej: ‘Xikinikneli sekinok uan xikinkualankaita katli mitskualankaitaj’.
44 Pero na niinmechiljuia, xikiniknelikaj katli inmechkualankaitaj uan ximomaijtokaj* por inijuantij katli inmechtlaijiyouiltiaj.
45 Kiampa inkinextisej inelij ikoneuaj inmoTata katli itstok iluikak, pampa ya kichiua ma kisa Tonati para kualmej uan katli amo kualmej, uan kichiua ma uetsi atl para katli kichiuaj tlen kuali uan katli amo.
46 Tlaj san inkinikneliaj katli inmechikneliaj, ¿tlake tlateochiualistli inkiselisej? ¿Amo kiampa kichiuaj katli tlainamaj impuestos?
47 Uan tlaj san inkintlajpalouaj inmoikniuaj, ¿inkichiuaj más que sekinok? ¿Amo nojkia kiampa kichiuaj katli amo elij judíos?
48 Uajka, moneki inkiniknelisej nochi maseualmej sanse kej kichiua inmoTata katli itstok iluikak.
Tlen ijkuilijtok tlatsintla
^ Kanajya kiijtouaj “toTeotsij”.
^ O “amo mosisiniaj”.
^ Ika griego “mayanaj uan amikij”.
^ O “profetas”.
^ Kanajya kiijtouaj “kitlikuiltia”.
^ Nopa chikiuitl kitekiuiyayaj kema tlatlamachiuayayaj o kiyejyekouayayaj se tlamantli.
^ O “para nikixpolos”.
^ Kanajya kiijtouaj “tsikitetsi”.
^ Kanajya kiijtouaj “tlakajkaualistli”.
^ Ika griego “cuadrante”. Tlen kitlaniyaya se akajya kema tekitiyaya nechka 10 minutos.
^ Ni eli kema se tlakatl katli ya mosiuajtijtok o se siuatl katli ya monamiktijtok moteka iuaya seyok.
^ Ni kiijtosneki kema mokauaj katli mosenkajtokej ininixpa tekichiuanij.
^ Ika griego pornéia. Xikita auilnemilistli.
^ O “tlen tikiljuijtok tijchiuas”.
^ Kanajya kiijtouaj “mitsixkapanis”. Kema se akajya kineki mitskualankamakas.
^ Xikita tlen ika moajkoluijkomayayaj.
^ Kiijtosneki tetlanejtia tomij uan amo tlainama itlanka.
^ Kanajya kiijtouaj “ximotlatlajtikaj”.
