Tlen kiijkuilok Mateo 6:1-34
-
KEMA TLAMACHTIK IPAN SE TEPETL (1-34)
-
Amo xijchiuakaj tlen kuali san pampa inkinekij ma inmechitakaj (1-4)
-
Kenijkatsa timomaijtosej (5-15)
-
Nopa padrenuestro: Jesús kinmachtia kenijkatsa momaijtosej (9-13)
-
-
Timosauasej (16-18)
-
Tlamantli tlen pajpatiyo ipan Tlaltipaktli uan ipan iluikaktli (19-24)
-
“Amo ma inmechtekipacho inmonemilis” (25-34)
-
“Achtoui xijtemokaj iTlanauatijkayo Dios” (33)
-
-
6 ”Ximomokuitlauikaj para amo inkichiuasej tlen kuali ininixpa sekinok san pampa inkinekij ma inmechitakaj. Tlaj kiampa inkichiuaj, inmoTata katli itstok iluikak amo inmechteochiuas.
2 Kema tijpaleuia se akajya katli amo tleno kipia, amo xikijtojtinemi* kej kichiuaj katli kipiaj ome ininxayak kema itstokej kampa tlaueyichiuaj judíos uan ojtipa, pampa kinekij sekinok ma kinuejkapantlalikaj. Temachtli niinmechiljuia inijuantij ya kiselijtokej nochi tlen kinamikiyaya kiselisej.
3 Más kuali, tlaj tijpaleuia se akajya katli amo tleno kipia, amo ma kimati momaarraves* tlake kichiua momanejmak;
4 kiampa amo aka kimatis kema tijpaleuia se akajya katli amo tleno kipia. Uan moTata katli mitsita maske ta amo tikita, mitsteochiuas.
5 ”Nojkia, kema inmomaijtosej* amo xijchiuakaj kej katli kipiaj ome ininxayak. Inijuantij kinpaktia ijkatosej kema momaijtouaj kampa tlaueyichiuaj judíos uan kampa monamiki ueyi ojtli, pampa kinekij sekinok ma kinitakaj. Temachtli niinmechiljuia, inijuantij ya kiselijtokej nochi tlen kinamikiyaya kiselisej.
6 Pero ta kema timomaijtos, xikalaki kalijtik kampa amo aka itstok, uan kema ya tikaltsakuas, ximomaijto ika moTata katli amo aka kiita. Uan moTata katli mitsita maske ta amo tikita, mitsteochiuas.
7 Kema timomaijtos, amo san xikojompauijto tlen tijtsontekontlalijtok, kej kichiuaj maseualmej katli kampa ueli euaj.* Inijuantij moiljuiaj Dios kintlakakilis pampa kitekiuiaj miak tlajtoli.
8 Amo xijchiuakaj kej inijuantij. InmoTata ya kimati tlake inmechpoloua maske ayamo inkitlajtlaniaj.
9 ”Inmojuantij kinamiki inmomaijtosej kej ni:
”‘ToTata katli tiitstok iluikak, ma kiuejkapantlalikaj* motoka.
10 Tijnekij moTlanauatijkayo ma uala tlanauatiki. Ma mochiua tlen ta tijneki ipan Tlaltipaktli kej mochiua ipan iluikak.
11 Xitechmaka tlen tijkuasej* ipan ni tonali;
12 xitechtlapojpoljui tlen titlauikaj sanse kej tojuantij tikintlapojpoljuijtokej katli techtlauikiliaj.
13 Xitechpaleui amo ma tiuetsikaj ipan tlajtlakoli uan xitechmanaui tlen Axkualtlakatl’.
14 ”Pampa tlaj inkintlapojpoljuiaj sekinok kema inmechixpanoj, inmoTata katli itstok iluikak nojkia inmechtlapojpoljuis.
15 Uan tlaj amo inkintlapojpoljuiaj sekinok kema inmechixpanoj, inmoTata nojkia amo inmechtlapojpoljuis kema intlaixpanoj.
16 ”Kema inmosauaj,* amo xijnextikaj ipan inmoxayak inmokuesouaj, kej kichiuaj katli kipiaj ome ininxayak. Inijuantij kipatlaj kej ixnesij pampa kinekij sekinok ma kinitakaj kema mosauaj. Temachtli niinmechiljuia, inijuantij ya kiselijtokej nochi tlen kinamikiyaya kiselisej.
17 Pero ta, kema timosauas, ximotsonajalo* aceite tlen ajuiyak mijyotia uan ximixami.
18 Kiampa maseualmej amo mitsitasej tlaj timosaua, san mitsitas moTata katli amo aka kiita. Uan moTata katli mitsita maske ta amo tikita, mitsteochiuas.
19 ”Ayokmo xijnekikaj inkipiasej miak tlamantli tlen pajpatiyo ipan Tlaltipaktli, kampa kisaj pilokuiltsitsij* uan kipalanaltiaj, kampa uelis moxixas uan kampa kalakij tlachtekinij uan kiichtekij.
20 Más kuali, xikajokuikaj tlamantli tlen pajpatiyo ne iluikak, kampa amo kisaj pilokuiltsitsij uan kipalanaltiaj, kampa amo moxixa uan kampa tlachtekinij amo kalakij yon kiichtekij.
21 Pampa kampa eltos tlen tijpatiita, nopaya nojkia eltos moyolo.
22 ”Moixteyol eli kej se tlauili tlen kitlauilia motlakayo. Tlaj moixteyol san mosentlalia kiitas se tlamantli, nochi motlakayo tlauijtos.
23 Pero tlaj moixteyol tekokolia,* nochi motlakayo eltos ipan tsintlayouilotl. Tlaj nopa tlauili tlen tijpia mochiua tsintlayouilotl, uajka tiitstok kampa tlauel tsintlayoua.
24 ”Amo aka uelis kintekipanos omej itekojuaj, pampa kikualankaitas uan kitlauelkauas se, uan nopa seyok kiiknelis uan amo kitlauelkauas. Amo uelis inkitekipanosej Dios uan nojkia Tomij.
25 ”Yeka niinmechiljuia: amo ma inmechtekipacho* inmonemilis, ika tlen inkikuasej uan tlen inkiisej;* o inmotlakayo, ika tlen inmokentisej. ¿Amo más ipati tonemilis que tlen tijkuasej uan totlakayo que tlen timokentisej?
26 Kuali xikintlachilikaj totomej. Inijuantij amo tokaj, amo pixkaj yon kiajokuij inintlakualis, pero inmoTata katli itstok iluikak kintlamaka. ¿Amo más inmopati que ne totomej?
27 ¿Ajkia tlen inmojuantij, tlaj motekipachoua uelis kichiuas nojua ma uejkaua se kentsi* inemilis?
28 Nojkia, ¿kenke inmechtekipachoua tlen inmokentisej? Kuali xijtlachilikaj kenijkatsa moskaltia xochitl tlen ixua kuatitla. Amo tekitij chikauak yon tlajtsomaj,
29 pero niinmechiljuia, maske tlanauatijketl Salomón kipixtoya miak tlamantli yejyektsitsij, amo kema moyoyontik kej inijuantij.
30 Uajka, tlaj Dios* kinyejyekchiua pilxiuitsitsij tlen ixua kuatitla maske nima pilini uan teipa kitlatiaj, ¿amo inmechmakas inmoyoyo tlen inmokentisej inmojuantij katli kentsi intlaneltokaj?
31 Yeka, amo kema ximotekipachokaj yon xikijtokaj: ‘¿Tlake tijkuasej?’, ‘¿tlake tikisej?’ o ‘¿tlake timokentisej?’.
32 Pampa nochi ni tlamantli tlauel kintekipachoua maseualmej katli amo kitekipanouaj Dios. InmoTata katli itstok iluikak kuali kimati inmojuantij moneki inkipiasej nochi ni tlamantli.
33 ”Yeka, achtoui xijtemokaj iTlanauatijkayo Dios uan tlen ya kuali kiita, uan teipa nojkia inkiselisej nochi ni tlamantli.
34 Uajka amo kema ximotekipachokaj ika tlen panos mostla, pampa ika ualmostla* nojkia onkas tekipacholi. Yeka, san ximoiljuikaj ipan kuesoli tlen inkipiaj ipan ni tonali.
Tlen ijkuilijtok tlatsintla
^ Ika griego “amo xijpitsa trompeta”.
^ Kanajya kiijtouaj “momaopoch”.
^ Kanajya kiijtouaj “inmotlatlajtisej”.
^ Kanajya kiijtouaj “katli ualauij ejeliuis”.
^ O “tlauel ma kitlepanitakaj”, “ma kiitakaj tlatsejtseloltik”.
^ O “totlakualis”. Ika griego “pantsi”.
^ Kanajya kiijtouaj “amo intlakuaj”.
^ O “ximotlalili ipan motsonteko”.
^ Ika griego kiampa kiiljuiaj se piltlapialtsi katli nesi kej se pilpapalotsi tlen kikuajkua yoyomitl.
^ Kiijtosneki kitemoua miak tlamantli. Ika griego “tlaj moixteyol kiita tlen amo kuali”.
^ O “ma inmechkueso”.
^ Kanajya kiijtouaj “inkiijisej”.
^ O “uelis kipiuilis ome mistitl (o se codo)”.
^ Kanajya kiijtouaj “toTeotsij”.
^ Kanajya kiijtouaj “mostlaijki”, “kema tonilis”.
