Nopa carta tlen kintitlanilijkej Cristo itokilijkauaj tlen Roma 11:1-36
11 Uajka, na nitlatsintoka: ¿Dios kintlauelkajki israeleuanij? ¡Amo! Pampa na nojkia niisraelejketl, nieli se iteipaixui Abrahán, tlen nopa ueyi familia* tlen Benjamín.
2 Dios amo kintlauelkajki israeleuanij, katli achtoui kintlapejpenik. ¿Amo inkimatij tlen kiijtoua iTlajkuilol Dios kema Elías kintlateljuito israeleuanij iixpa Dios?
3 “Jehová,* kinmiktijtokej moteokamanalojkauaj* uan kiuelonijtokej nopa tlaixpamitl kampa mitsmaktiliaj ofrendas; san na nimokaua uan nama kinekij nechmiktisej”.
4 Pero, ¿tlake kiijtok Dios? “Nojua itstokej 7 mil tlakamej katli amo motlankuaketstokej iixpa Baal”.
5 Nojkia ipan ni tonali, kintlapejpenijtokej se keskij pampa Dios kinextia ueyi iyolo ika inijuantij.*
6 Nopa kiijtosneki Dios kintlapejpenik pampa kinextia ueyi iyolo, uan amo pampa inijuantij kichijkej tlen kuali. Tlaj inijuantij kichijtoskiaj kampeka para ma kintlapejpeni, uajka ayokmo nesiskia Dios kinextia ueyi iyolo.
7 Uajka, ¿tlake tikijtosej? Israeleuanij amo kiselijkej tlen nojua tlauel kinektokej kipiasej, pero katli Dios kintlapejpenik kena kiselijkej. Nopa sekinok mochijkej tochontikej,*
8 kej ijkuilijtok: “Hasta ipan ni tonali, Dios kichijtok kejuak kuali ma kochtokaj, kinmakatok ininixteyol para amo tlachiasej uan ininnakas para amo tlakakisej”.
9 David nojkia kiijtoua: “Iljuitl tlen kichiuaj ma eli kej se lazo, kej se tlamasiltili,* kej se tlamantli tlen ika motepotlamisej uan tlen ika kintlatsakuiltisej.
10 Ma ixmiki* ininixteyol para amo ma tlachiakaj. Uan xijchiua nochipa ma mokuitlapanuijkolokaj”.
11 Yeka nitlatsintoka: kema inijuantij motepotlamijkej uan uetskej, ¿ayokmo uelkej moketsaj? ¡Amo! Pero pampa mokuapolojkej, nama maseualmej katli amo elij judíos uelis momakixtisej,* uan nopa kinkualankamaka judíos.
12 Pero tlaj inijuantij mokuapolojkej uan nopa kichiua nochi maseualmej ma kiselikaj tlateochiualistli, uan tlaj ayokmo elij miakej uan nopa kichiua katli amo elij judíos ma kiselikaj tlateochiualistli, ¡uajka onkas tlauel miak tlateochiualistli kema nochi kintlamisentilisej!
13 Nama niinmechnojnotsa inmojuantij katli amo inelij judíos. Nieli apóstol katli nechtitlantokej kampa amo elij judíos, yeka nijuejkapantlalia nopa tekitl tlen nechmakatokej
14 para nikitas tlaj kiampa uelis nikinkualankamakas katli elij judíos sanse kej na, para ma momakixtikaj se keskij.
15 Pampa tlaj Dios kintlauelkajki judíos uan kiampa nochi maseualmej uelij moyoltlaliaj iuaya Dios, ¿tlake panos kema nojkia kinselisej? Elis kejuak miktoyaj uan moyolkuisej.
16 Nojkia, tlaj nopa kentsi tixtli tlen achtoui kimaktiliaj Dios eli tlatsejtseloltik, nojkia kiampa eli nochi nopa tixtli. Uan tlaj se kuauitl ineljuayo eli tlatsejtseloltik, nojkia kiampa eli nochi imajmakuayo.
17 Pero tlaj kitsontejkej se keski imakuayo tlen nopa olivokuauitl, uan mitstlatskiltijkej* ipan imakuayo maske tieli se olivokuauitl tlen moskaltia kuatitla, uan tlaj nama nojkia mitspaleuijtok ineljuayo nopa olivokuauitl tlen kuali,
18 uajka amo ximoiljui para más tikuali que nopa sekinok olivokuauitl imakuayo. Uan tlaj timoiljuia más tikuali, xikilnamiki ta amo tijtlanantok ineljuayo nopa kuauitl, eli ineljuayo nopa kuauitl tlen mitstlanantok.
19 Uajka ta tikijtos: “Se keski imakuayo kitsontejkej para na ma nechtlatskiltikaj”.
20 ¡Nopa nelia! Inijuantij kintsontejkej pampa amo tlaneltokakej, pero ta nojua tiijkatok nopaya pampa titlaneltoka. Yeka amo ximoueyimati, más kuali xijmakasi Dios.
21 Pampa tlaj Dios amo kikajki ma elto tlen nelnelia eli imakuayo nopa olivokuauitl, ta nojkia uelis mitstsontekis.
22 Uajka, xikita kenijkatsa ya kinextia kuali iyolo uan nojkia chikauak tetlatsakuiltia. Chikauak kintlatsakuiltik katli uetskej, pero kinextia kuali iyolo ika ta, tlaj nojua tijchijtinemi tlen ya kineki. Tlaj amo, ta nojkia mitstsontekis.
23 Uan nopa judíos nojkia, tlaj peuaj tlaneltokaj, sampa kintlatskiltisej ipan nopa olivokuauitl, pampa Dios sampa uelis kintlatskiltis.
24 Pampa tlaj ta mitstsontejkej ipan se olivokuauitl tlen moskaltia kuatitla uan mitstlatskiltijkej ipan se olivokuauitl tlen kitoktokej maske amo kinamiki kiampa mochiuas, ¡nojua más kinamiki ma kitlatskiltikaj imakuayo nopa kuauitl kampa ipa tlatskitoya!
25 Noikniuaj, nijneki xijmatikaj ni tlamantli tlen Dios ayamo tematiltia* para amo inmoiljuisej tlauel intlalnamikij: se keskij israeleuanij mochijtokej tlauel tochontikej hasta kema kintlamisentilisej katli amo elij judíos,
26 uan kiampa nochi israeleuanij momakixtisej. Kiampa kej ijkuilijtok: “Katli temakixtis ualas tlen Sion uan kichiuas ikoneuaj Jacob ayokmo ma kichiuakaj tlen amo kuali.
27 Uan ya ni nopa tlajtolsenkaualistli tlen nijchiuas ininuaya kema nikixpolos inintlajtlakoljuaj”.
28 Nelia, se keskij judíos mochijkej ikualankaitakauaj Dios pampa amo kiselijkej nopa kuali tlamachtili, uan nopa inmechpaleuijtok inmojuantij. Pero Dios kintlapejpenik se keskij ma elikaj iuampoyouaj* pampa kiampa kintenkauilik inintatauaj katli uejkajkia itstoyaj.
29 Pampa Dios amo moyolkokoua ika nopa regalos tlen temakatok yon moyolkokos kema kinnotsas maseualmej.
30 Achtouia inmojuantij amo inkineltokayayaj Dios, pero nama inmechtlasojtlatok pampa judíos amo tlaneltokakej.
31 Nojkia inijuantij, nama amo tlaneltokaj, uan yeka Dios inmechtlasojtlatok. Pero ya nojkia uelis kintlasojtlas judíos sanse kej inmojuantij.
32 Pampa Dios kichijki nochi kejuak ma tsaktokaj pampa amo tlaneltokaj, uan kiampa nochi uelis kintlasojtlas.
33 ¡Nelnelia onpano ueyi itlateochiualis Dios, itlalnamikilis uan itlaixmatilis! ¡Amo aka kimati kenijkatsa tetlajtolsenkaua uan amo aka ueli kikuamachilia nochi iojui!
34 Pampa “¿ajkia kiixmati itlalnamikilis Jehová?* ¿O ajkia uelis kiiljuis tlake moneki kichiuas?”.
35 O “¿ajkia achtoui kimakatok Dios se tlamantli para teipa yaya monekis kikuepilis?”.
36 Pampa nochi tlamantli uala tlen Dios, ya kichiua ma elto uan nochi tlen onka eli iaxka. Yaya kinamiki nochipa ma tijuejkapantlalikaj. Amén.*
Tlen ijkuilijtok tlatsintla
^ O “tribu”.
^ O “moprofetas”.
^ O “kinmaka tlateochiualistli tlen amo kinamiki kiselisej”.
^ O “yoltetikej”.
^ Kanajya kiijtouaj “tlaketstli”.
^ O “Ma ixtenexiuikaj”.
^ O “momanauisej”.
^ O “mitssalojkej”.
^ Xikita tlen Dios ayamo tematiltia.
^ O “iamigos”.
^ O “kiampa ma eli”.
