Nopa carta tlen kintitlanilijkej Cristo itokilijkauaj tlen Roma 12:1-21
12 Uajka noikniuaj, pampa Dios* inmechtlasojtlatok xijmaktilikaj inmotlakayo kej se ofrenda* tlen yoltok, tlen tlatsejtseloltik uan tlen kipaktis; kiampa inkitekipanosej Dios ika nochi inmotlalnamikilis.
2 Uan ayokmo xijchiuakaj tlen maseualmej momajtokej kichiuaj ipan ni tonali;* más kuali xijpatlatiakaj kej inelij uan xijyankuilijtiakaj inmotlalnamikilis, kiampa kuali inkimatisej tlake kineki Dios: tlen kuali, tlen kiyolpaktia uan tlen senkistok xitlauak.
3 Dios kinextijtok ueyi iyolo ika na,* yeka niinmechiljuia sejse tlen inmojuantij para amo ximoiljuikaj tlauel inmopati, san ximoiljuikaj tlen kinextis kuali intlalnamikij, sanse kej Dios inmechpaleuijtok xitlaneltokakaj ipan ya.
4 Pampa sanse kej totlakayo kipia miak tlamantli pero amo nochi kichiua sanse tekitl,
5 nojkia tojuantij, maske timiakej, tielij kejuak san se totlakayo iuaya Cristo, pero sejse tlen tojuantij kejuak timosalojtokej* ika sekinok.
6 Pampa Dios kinextijtok ueyi iyolo ika tojuantij, yeka techmakatok miak tlamantli yajatili* para uelis tijchiuasej se tekitl tlen tlauel ipati. Tlaj tijpiaj yajatili para titematiltisej kej kichiuaj teokamanalouanij,* uajka ma titematiltikaj sanse kej Dios techpaleuijtok ma titlaneltokakaj;
7 tlaj tijpiaj nopa yajatili para tikintekipanosej sekinok, ma tijchiuakaj se ueyi kampeka para kuali tijchiuasej nopa tekitl; tlaj se akajya kipia yajatili para tlamachtis, uajka ma tlamachti;
8 katli teyolchikaua, uajka ma teyolchikaua; katli temaka se tlamantli, ma temaka ika nochi iyolo; katli tlayakana, kuali ma tlayakana; katli tetlasojtla, ma kichiua ika pakilistli.
9 Nelnelia xiteiknelikaj, amo san xitlachiuakaj. Xijkualankaitakaj tlen amo kuali; uan xikiknelikaj* tlen kuali.
10 Tlauel ximoiknelikaj kej ineliskiaj iniknimej. Achtoui inmojuantij xijnextikaj inkintlepanitaj sekinok.
11 Nochipa chikauak xitekitikaj, amo ximotlatsiuiltikaj. Xijkauakaj ichikaualis Dios* ma kichiua tlauel xijnekikaj inkichiuasej tlen kuali. Xijtekipanokaj Jehová* ika nochi inmoyolo.
12 Xiyolpakikaj ika tlen inkichiaj inkiselisej. Xikijiyouikaj kema inkiixnamikij tlaouijkayotl. Nochipa ximomaijtojtokaj.*
13 Xikinmakakaj tlen inkipiaj toikniuaj* katli kinpoloua se tlenijki. Nochipa kuali xiteselikaj.
14 Nochipa xijtlajtlanikaj Dios ma kinteochiua katli inmechtlaijiyouiltiaj; kena, xikiljuikaj Dios ma kinteochiua uan amo xikintelchiuakaj.
15 Xiyolpakikaj ininuaya katli yolpakij; xichokakaj ininuaya katli chokaj.
16 Ximotekipachokaj ika tlen kinpano sekinok sanse kej inmechtekipachoua tlen inmechpano; amo ximoueyimatikaj, más kuali ximoiljuikaj ipan tlamantli tlen kichiuas ximoechkapanokaj.* Amo ximoiljuikaj más intlalnamikij que sekinok.
17 Amo ximomakuepakaj kema inmechchiuiliaj tlen amo kuali. Xijchiuakaj tlamantli tlen nochi maseualmej kuali kiitaj.
18 Hasta kampa inuelij, xijtemolikaj kenijkatsa kuali inmouikasej ininuaya nochi maseualmej.
19 Noikniuaj katli niinmechiknelia, amo ximomakuepakaj, más kuali xijkauilikaj Dios ma kinexti ikualankayo. Pampa ijkuilijtok: “Jehová* kiijtoua: ‘Na nimomakuepas; na nikinkuepilis tlen kinamiki kiselisej’”.
20 Más kuali, “tlaj katli mitskualankaita mayana, xijtlamaka; tlaj amiki,* xijmaka tlen kiis;* pampa tlaj tijchiuas nopa, uajka tijchiuas ma moyolyamanili”.*
21 Amo xijkaua ma mitstlani tlen amo kuali, pero nojua xijchijto tlen kuali para tijtlanis tlen amo kuali.
Tlen ijkuilijtok tlatsintla
^ Kanajya kiijtouaj “toTeotsij”.
^ Kanajya kiijtouaj “tlakajkaualistli”.
^ O “nechmakatok tlateochiualistli tlen amo kinamiki nijselis”.
^ O “titlatskitokej”.
^ O “regalos”, “tekitl”.
^ O “profetas”.
^ Ika griego “xitlatskitokaj ipan”.
^ O “espíritu santo”.
^ Kanajya kiijtouaj “ximotlatlajtijtokaj”.
^ O “katli Dios kintlapejpenijtok”.
^ O “amo ximoueyimatikaj”.
^ Kanajya kiijtouaj “ateuaki”.
^ Kanajya kiijtouaj “kiijis”.
^ Ika griego “tijmontonos tlikoli ipan itsonteko”.
