Nopa carta tlen kintitlanilijkej Cristo itokilijkauaj tlen Roma 13:1-14
13 Moneki nochi ma kinneltokakaj tekichiuanij katli tlanauatiaj, pampa yon se tekichijketl itstoskia tlaj Dios* amo kikauilijtoskia; nopa tekichiuanij kipiaj tlanauatili pampa Dios kintlalijtok ipan ininteki tlen kipiaj.
2 Yeka, katli kinijixnamiki tekichiuanij, kiijixnamiki tlen Dios kitlalijtok; katli kiijixnamiki tlen Dios kitlalijtok, kitlatsakuiltisej.
3 Katli kichiuaj tlen kuali amo kinmakasij* tekichiuanij, pero katli kichiuaj tlen amo kuali kena kinmakasij. Yeka, tlaj amo tijneki tikinmakasis tekichiuanij, uajka nojua xijchijto tlen kuali uan inijuantij mitsuejkapantlalisej,
4 pampa Dios kintekiuia tekichiuanij para ma mitspaleuikaj. Pero tlaj tijchiua tlen amo kuali, uajka xikinmakasi, pampa tekichiuanij kipiaj tlanauatili* para tetlatsakuiltisej uan amo san tlapik kipiaj nopa tlanauatili. Dios kintekiuia para kitlatsakuiltisej* katli kichiua tlen amo kuali.
5 Yeka, tlauel moneki xikinneltokakaj uan amo san pampa uelis inmechtlatsakuiltisej, xikinneltokakaj para amo ma inmechyolkoko inmotlalnamikilis.
6 Yeka inmojuantij nojkia intlaxtlauaj impuestos, pampa Dios kintekiuia tekichiuanij para mojmostla ma kinpaleuikaj maseualmej.
7 Xikinmakakaj nochi tlen kinamiki kiselisej: katli tlajtlani impuesto, xijmakakaj impuesto; katli tlajtlani tomij, xijmakakaj tomij; katli tlajtlani ma kitlepanitakaj, xijtlepanitakaj; katli tlajtlani ma kiuejkapantlalikaj, xijuejkapantlalikaj.
8 Amo aka xijtlauikilikaj yon se tlamantli, san moneki ximoiknelikaj se ika seyok; pampa katli kiniknelia sekinok kichijtok tlen kiijtoua nopa tlanauatili.
9 Pampa nochi nopa tlanauatili, “amo ximomekati, amo xitemikti, amo xitlachteki, amo xiteistlakaui, amo xikixtoka tlen seyok iaxka”, uan nochi tlanauatili tlen onka, san mochiua setsi tlanauatili: “Xikinikneli sekinok kej ta timoiknelia”.
10 Katli teiknelia amo kinchiuilia sekinok tlen amo kuali. Yeka, katli teiknelia kichiua tlen kiijtoua nopa tlanauatili.
11 Nojkia xijchiuakaj ni tlamantli pampa inkimatij ipan tlake tonali tiitstokej. Inkimatij ya eli hora para inisasej* tlen nopa kochistli, pampa kema pejki titlaneltokaj monechkauijtoya nopa tonali para techmakixtisej, pero nama nojua más monechkauijtok.
12 Youali ya nechka tlamis; ya tlanestiuala. Yeka ayokmo ma tijchiuakaj nopa tlamantli tlen mochiua ipan tsintlayouilotl uan ma timotlalilikaj nopa tepostli tlen ika titlateuiaj* tlen iaxka nopa tlauili.
13 Kuali ma timonejnemiltikaj kej tijchiuaskiaj tonaya; amo ma tinemikaj ipan iljuitl kampa san tlemach tlachiuaj yon ma timoiuintikaj, amo ma tiauilnemikaj yon ma tijchiuakaj kej katli amo pinauaj tlajtlakolchiuasej,* amo ma timoteuikaj yon ma titekokolikaj.*
14 Más kuali, xijchiuakaj kej toTeko Jesucristo uan amo ximoiljuijtokaj kenijkatsa inkichiuasej tlen kiyoltilana inmotlakayo.
Tlen ijkuilijtok tlatsintla
^ Kanajya kiijtouaj “toTeotsij”.
^ Kanajya kiijtouaj “kinmajmauiliaj”.
^ Ika griego “espada”.
^ O “kinextilis ikualankayo”.
^ Kanajya kiijtouaj “inijitasej”.
^ O “nopa armadura”.
^ Ika griego asélgueia. Xikita amo pinauaj tlajtlakolchiuasej.
^ Kanajya kiijtouaj “ma titekualankaitakaj”.
