Nopa carta tlen kintitlanilijkej Cristo itokilijkauaj tlen Roma 16:1-27
16 Nijneki xikixmatikaj tosiuaikni Febe, katli tlatekipanoua ipan nopa tlanechikoli tlen eltok ipan altepetl Cencreas,
2 para xijselikaj ika pakilistli kej se inmoikni katli tlaneltoka ipan toTeko, kej kinamiki kinselisej katli Dios* kiniyokatlalijtok,* uan para inkipaleuisej ika tlen kipoloua pampa ya nojkia kinmanauik miakej toikniuaj, uan hasta na nojkia nechmanauik.
3 Xikintlajpalokaj Prisca uan Áquila, katli tekitij nouaya ipan iteki Cristo Jesús.
4 Inijuantij motemakakej para nechmanauisej maske ueltoskia kinmiktisej, uan na uan nochi toikniuaj katli itstokej ipan tlanechikoli kampa amo elij judíos tikintlaskamatiliaj.
5 Nojkia xikintlajpalokaj toikniuaj katli mosentiliaj ininchaj. Xijtlajpalokaj toikni Epéneto katli tlauel nikiknelia, ya elki se tlen katli achtoui mochijkej Cristo itokilijkauaj ipan tlali Asia.
6 Xijtlajpalokaj María, katli chikauak tekititok para inmechpaleuis.
7 Xikintlajpalokaj Andrónico uan Junias, katli elij nouikaljuaj* uan nojkia tsaktoyaj nouaya. Apóstoles kuali kinixmatij uan mochijkej Cristo itokilijkauaj más achtoui que na.
8 Xijtlajpalokaj Ampliato, nouampox* katli nikiknelia uan nojkia eli toTeko itokilijka.
9 Xijtlajpalokaj Urbano, katli tekiti nouaya ipan iteki Cristo Jesús, uan Estaquis katli nikiknelia.
10 Xijtlajpalokaj Apeles, katli Cristo kuali kiita.* Xikintlajpalokaj katli itstokej ichaj Aristóbulo.
11 Xijtlajpalokaj nouikal Herodión. Xikintlajpalokaj katli itstokej ichaj Narciso uan nojkia kitekipanouaj toTeko.
12 Xikintlajpalokaj Trifena uan Trifosa, tosiuaikniuaj katli kitekipanouaj toTeko ika nochi ininyolo. Xijtlajpalokaj tosiuaikni Pérsida katli tlauel tikikneliaj, pampa ya chikauak kitekipanojtok toTeko.
13 Xijtlajpalokaj Rufo, katli toTeko kitlapejpenijtok, nojkia xijtlajpalokaj inana, katli eli kej nonana.
14 Xikintlajpalokaj Asíncrito, Flegonte, Hermes, Patrobas, Hermas uan toikniuaj katli itstokej ininuaya.
15 Xikintlajpalokaj Filólogo uan Julia, nojkia Nereo uan isiuaikni,* Olimpas uan nochi toikniuaj* katli itstokej ininuaya.
16 Ximotlajpalokaj se ika seyok uan ximotsoponikaj kej iniknimej. Nochi toikniuaj katli kitokiliaj Cristo, inmechontlajpalouaj.
17 Noikniuaj, xitlauak niinmechtlajtlania xikintlachilikaj katli kinxelouaj toikniuaj uan kichiuaj ayokmo kuali ma tlaneltokakaj, pampa tlen tlamachtiaj amo eli sanse ika tlen inmechmachtijkej, uan amo ximouikakaj ininuaya.
18 Tlakamej kej nopa amo kitekipanouaj toTeko Cristo, inijuantij kichiuaj san tlen kinekij uan kamanaltij yejyektsi uan kinuejkapantlaliaj katli nima kineltokaj tlen kiniljuiaj para kinkajkayauasej.
19 Nochi maseualmej kikaktokej kenijkatsa inmojuantij kuali intlaneltokaj, uan nopa kichiua tlauel ma niyolpaki. Pero nijneki xielikaj intlalnamikinij para inkichiuasej tlen kuali, uan kejuak amo tleno inkimatij para amo inkichiuasej tlen amo kuali.
20 Nechka, Dios katli temaka tlaseuilistli kixamanis Satanás inmoikxitsintla. ToTeko Jesús ma kinexti ueyi iyolo ika inmojuantij.*
21 Timoteo, katli nouaya tlatekipanoua, inmechontlajpaloua. Nojkia inmechontlajpalouaj nouikaljuaj Lucio, Jasón uan Sosípatro.
22 Na niTercio, katli nikijkuilok ni amatl, niinmechtlajpaloua kej se inmoikni katli nojkia tlaneltoka ipan toTeko.
23 Inmechontlajpaloua Gayo, katli nechkauilia ma nimokaua ichaj uan nojkia kinkaua toikniuaj ma mosentilikaj nopaya. Erasto, katli kisentilia tomij ipan altepetl, uan iikni Cuarto, inmechontlajpalouaj.
24 *
25 Dios uelis inmechchiuas intetikej ika nopa kuali tlamachtili tlen na nijmoyaua uan ika tlen tematiltiaj tlen Jesucristo. Ni tlamachtili mouika ika tlen Dios ayamo tematiltijtoya* uan kitlatijtoya* miak xiuitl,
26 pero nama ya technextilijtokej uan kimoyajtokej ipan nochi altepemej ika tlen kiijkuilojkej teokamanalouanij.* Dios katli nochipa itstok, ya nopa tlanauatijtok pampa kineki nochi ma tlaneltokakaj ipan ya uan ma kichiuakaj tlen ya kineki.
27 Dios, katli san ya nelia tlalnamiki, kinamiki nochipa ma kiuejkapantlalikaj ika Jesucristo. Amén.*
Tlen ijkuilijtok tlatsintla
^ Kanajya kiijtouaj “toTeotsij”.
^ O “kinita tlatsejtseloltikej”.
^ Kanajya kiijtouaj “noteixmatkauaj”.
^ O “noamigo”.
^ O “katli kiyolpaktia Cristo”.
^ Kanajya kiijtouaj “iuelti”.
^ O “katli Dios kiniyokatlalijtok”.
^ O “ma inmechmaka tlateochiualistli tlen amo kinamiki tijselisej”.
^ Ni texto san eltok ipan se keski biblias, pero amo eltok ipan amatlajkuiloli tlen uejkajkia moijkuilok ika griego.
^ Xikita tlen Dios ayamo tematiltia.
^ Kanajya kiijtouaj “kiiyantoya”.
^ O “profetas”.
^ O “kiampa ma eli”.
