Nopa carta tlen kintitlanilijkej Cristo itokilijkauaj tlen Roma 5:1-21
5 Uajka, pampa nama Dios* techitstok tixitlauakej pampa titlaneltokaj, kuali ma timouikakaj* iuaya ika tlen kichijtok toTeko Jesucristo.
2 Uan pampa titlaneltokatokej ipan Jesús, nojkia techpaleuia ma tijnechkauikaj Dios uan ma kinexti Dios ueyi iyolo ika tojuantij.* Uan ma tiyolpakikaj* pampa timotemachiaj Dios techuejkapantlalis.
3 Uan amo san ya nopa, nojkia ma tiyolpakikaj* kema tikixnamikij tlaouijkayotl, pampa tijmatij nopa tlaouijkayotl kichiua ma tikijiyouikaj nochi;
4 kema tikijiyouiaj se tlamantli, kichiua Dios kuali ma techita; kema Dios kuali techita, tijchiaj tijselisej tlen kuali,
5 uan tlen tijchiaj tijselisej, timotemachiaj nelnelia panos; pampa Dios kitekiuia ichikaualis* tlen techmaka para kinextis tlauel techiknelia.
6 Kema ayamo tleno ueliyaya tijchiuaj para timomakixtisej, Cristo mijki para kinpaleuis katli tlajtlakolejkej ipan nopa tonali tlen Dios kiixtlalijtoya.
7 Tlauel ouij ma miki se akajya para kipaleuis se tlakatl katli xitlauak, pero uelis se akajya kena kinekis mikis para kipaleuis se kuali tlakatl.
8 Pero Dios technextilik tlauel techiknelia, uan kej ni kinextik: kema nojua tieliyayaj titlajtlakolejkej, Cristo mijki para techmakixtis nochi tojuantij.
9 Uan nama Dios techita tixitlauakej ika Jesús ieso, yeka achi más timotemachiaj timomakixtisej ika ya kema Dios kinextis ikualankayo.
10 Pampa maske tieliyayaj tiikualankaitakauaj Dios, timoyoltlalijkej iuaya ika imikilis iKone, uan nopa kichiua achi más ma timotemachikaj timomakixtisej ika inemilis Jesús pampa nama ya timoyoltlalijkej iuaya Dios.
11 Uan amo san ya nopa, nojkia tiyolpakij ika tlen Dios kichijtok ika toTeko Jesucristo, katli nama kichiua ma timoyoltlalikaj iuaya Dios.
12 Yeka, san ika se tlakatl nopa tlajtlakoli pejki ipan Tlaltipaktli, uan tlajtlakoli kichijki ma onka mikilistli, uan kiampa nochi maseualmej pejkej mikij pampa nochi tlajtlakolchijtoyaj...
13 Pampa tlajtlakoli ipa onkayaya ipan Tlaltipaktli kema ayamo eltoya iTlanauatil Moisés, pero kema amo onka tlanauatili amo aka uelis kitlateljuisej kichijtok se tlajtlakoli.
14 Pero mikilistli tlanauatik kej se tlanauatijketl desde kema Adán itstoya hasta kema Moisés itstoya, uan hasta kinnauatik katli amo tlajtlakolchijtoyaj kej tlajtlakolchijki Adán, katli eliyaya kej katli ualaskia teipa.
15 Pero nopa regalo tlen Dios temaka amo eli kej itlajtlakol Adán. Miakej mikij pampa tlajtlakolchijki setsi tlakatl, pero miakej maseualmej tlauel kinpaleuia pampa Dios kinextik ueyi iyolo ika inijuantij* uan kinmakak se regalo uan nojkia pampa Jesucristo kinextik ueyi iyolo.
16 Nojkia, nopa regalo tlen Dios temaka amo eli sanse ika nopa tlajtlakoli tlen kichijki se tlakatl: ika se tlajtlakoli kiijtojkej nochi kinamikiyaya ma kintlatsakuiltikaj, pero nopa regalo tlen Dios temakak kema miakej ya kichijtoyaj miak tlajtlakoli, kichijki Dios ma kinita xitlauakej.
17 Pampa tlaj itlajtlakol se tlakatl kichijki mikilistli ma tlanauati kej se tlanauatijketl, uajka nojkia uelis timotemachisej maseualmej itstosej uan tlanauatisej kej tlanauatianij ika tlen kichijki se tlakatl, Jesucristo. Kiampa panos pampa Dios kinextia ueyi iyolo uan kinmaka se regalo tlen kichiua ma kinita xitlauakej.
18 Uajka, sanse kej se tlajtlakoli kichijki nochi maseualmej ma kintlatsakuiltikaj, nojkia san setsi tlamantli tlen kuali ueli kichiua Dios ma kinita xitlauakej maseualmej tlen kampa ueli euaj uan ma kipiakaj nemilistli.
19 Pampa sanse kej miakej mochijkej tlajtlakolejkej pampa se tlakatl amo kineltokak Dios, nojkia miakej elisej xitlauakej pampa se tlakatl kena kineltokak Dios.
20 Uan iTlanauatil Moisés pejki tekiti para kinextis maseualmej eliyayaj tlauel tlajtlakolejkej. Pero kampa más onkayaya tlajtlakoli, Dios nojua más kinextik ueyi iyolo ika inijuantij.*
21 ¿Kenke kiampa panok? Pampa sanse kej tlajtlakoli uan mikilistli tlanauatijkej kej tlanauatianij, nojkia nopa tlateochiualistli tlen amo kinamiki tijselisej* ma tlayakana kej se tlanauatijketl, kiampa Dios techitas tixitlauakej para uelis tijpiasej nemilistli tlen amo kema tlamis* ika tlen kichijki toTeko Jesucristo.
Tlen ijkuilijtok tlatsintla
^ Kanajya kiijtouaj “toTeotsij”.
^ O uelis “tijpiaj tlaseuilistli”.
^ O “ma techmaka tlateochiualistli tlen amo kinamiki tijselisej”.
^ O uelis “tiyolpakij”.
^ O uelis “tiyolpakij”.
^ O “iespíritu santo”.
^ O “kinmakak tlateochiualistli tlen amo kinamiki kiselisej”.
^ O “temakak tlateochiualistli tlen amo kinamiki tijselisej”.
^ O “ueyi iyolo Dios”.
^ O “tiitstosej nochipa”.
