Nopa carta tlen kintitlanilijkej Cristo itokilijkauaj tlen Roma 6:1-23
6 Uajka, ¿tlake tikijtosej? ¿Moneki nojua titlajtlakolchiuasej para Dios* nojua más ma kinexti ueyi iyolo ika tojuantij?*
2 ¡Amo! Tlaj kejuak ya timijkej ipan tlajtlakoli, ¿kenijkatsa nojua tiitstosej para titlajtlakolchiuasej?
3 ¿O amo inkimatij nochi katli timoatsonpoliuiltijkej ipan Cristo Jesús nojkia timoatsonpoliuiltijkej ipan imikilis?
4 Uajka, kejuak techtlalpachojkej iuaya kema timoatsonpoliuiltijkej ipan imikilis, uan kiampa, sanse kej Cristo moyolkuik ika iueyitilis iTata, tojuantij nojkia ma tijpiakaj se nemilistli tlen yankuik.
5 Tlaj tiitstokej sansejko iuaya pampa timikij sanse kej ya mijki, uajka nojkia tiitstosej sansejko iuaya kema timoyolkuisej sanse kej ya moyolkuik.
6 Pampa tijmatij tonemilis tlen achtouia tijpiayayaj nojkia kejuak kilavosminkej ipan kuauitl iuaya Jesús, para nopa tlajtlakoli ayokmo ma kipia chikaualistli ipan totlakayo uan kiampa ayokmo tielisej tiitekipanojkauaj tlajtlakoli.
7 Pampa katli miki, kitlapojpoljuiaj* itlajtlakoljuaj.
8 Nojkia, tlaj ya timiktokej iuaya Cristo, tijneltokaj tiitstosej iuaya.
9 Pampa tijmatij Cristo katli nama ya moyolkuik, ayokmo kema mikis; mikilistli ayokmo tleno ueli kichiuilia.*
10 Pampa kema mijki, san sempatsi mijki para kikixtis tlajtlakoli uan ayokmo kema sampa mikis, pero nama itstok para kichiuas tlen Dios kineki.
11 Nojkia inmojuantij, ximoitakaj kejuak ya inmijkej kema tlajtlakoli inmechyoltilana, pero xikilnamikikaj inyoltokej para inkichiuasej tlen Dios kineki pampa inelij itokilijkauaj Cristo Jesús.
12 Yeka, amo xijkauakaj tlajtlakoli ma inmechnauati kej se tlanauatijketl ipan inmotlakayo tlen uelis mikis uan kiampa inkichiuasej san tlen inmotlakayo kinektok.
13 Nojkia, ayokmo xijmaktilikaj inmotlakayo* ika tlajtlakoli para inkichiuasej tlen amo kuali. Más kuali, ximotemaktilikaj ika Dios kej katli ya miktoyaj uan nama ya moyolkuikej, uan xijmaktilikaj Dios inmotlakayo* para inkichiuasej tlen kuali.
14 Nopa tlajtlakoli amo moneki inmechnauatis kej eliskia inmoteko, pampa ayokmo inmoyakanaj ika Tlanauatili, nama inmechyakana Dios katli kinextia ueyi iyolo.*
15 Uajka, tlaj Dios kinextia ueyi iyolo ika tojuantij,* ¿kinamiki tijchiuasej se tlajtlakoli pampa amo timoyakanaj ika Tlanauatili? ¡Amo!
16 ¿Amo inkimatij tlaj inmotemaktiliaj ika se akajya para inkitekipanosej uan inkineltokasej, uajka nelia inmochiuaj itekipanojkauaj? Yeka, tlaj inmochiuaj itekipanojkauaj tlajtlakoli, inmikisej; pero tlaj inmochiuasej itekipanojkauaj Dios uan inkineltokasej, inelisej xitlauakej iixpa.
17 Pero tijtlaskamatiliaj Dios pampa maske inmojuantij ineliyayaj itekipanojkauaj tlajtlakoli, nama inkineltokaj ika nochi inmoyolo nopa tlamachtilistli tlen inmechmakakej.
18 Kena, inmojuantij inmechmakixtijkej tlen tlajtlakoli, yeka nama inkitekipanouaj Dios uan inkichiuaj nochi tlen xitlauak.
19 Niinmechkamanaljuia ika tlajtoli tlen maseualmej amo ouij kikuamachiliaj pampa intlajtlakolejkej. Sanse kej intemaktilijkej sejse tlamantli tlen inmotlakayo para inkitekipanosej tlen sokiyo uan tlen tlauel amo kuali, nama xitemaktilikaj sejse tlamantli tlen inmotlakayo para inkitekipanosej tlen xitlauak, uan kiampa inkichiuasej tlen tlapajpaktik.
20 Pampa kema ineliyayaj itekipanojkauaj tlajtlakoli, inmojuantij amo monekiyaya inkichiuasej tlen xitlauak.
21 Uajka, ¿kenijkatsa inmechpaleuik tlen inkichiuayayaj ipan nopa tonali? Inmojuantij inkichiuayayaj tlamantli tlen nama kichiua xipinauakaj, pampa nopa tlamantli kichiua ximikikaj.
22 Pero nama inmechmakixtijtokej tlen tlajtlakoli uan inmochijtokej itekipanojkauaj Dios, yeka inkichiuaj tlen tlapajpaktik. Uan nopa kichiua xijpiakaj nemilistli tlen amo kema tlamis.*
23 Pampa nopa tlajtlakoli techtlaxtlauia ika mikilistli, pero Dios techmaka kej se regalo nopa nemilistli tlen amo kema tlamis ika tlen kichijki toTeko Cristo Jesús.
Tlen ijkuilijtok tlatsintla
^ Kanajya kiijtouaj “toTeotsij”.
^ O “ma techmaka tlateochiualistli tlen amo kinamiki tijselisej”.
^ O “kimakixtiaj tlen”.
^ O “ayokmo kipia tlanauatili ika ya”.
^ Ika griego “sejse tlamantli tlen inmotlakayo”.
^ Ika griego “sejse tlamantli tlen inmotlakayo”.
^ O “katli techmaka tlateochiualistli tlen amo kinamiki tijselisej”.
^ O “techmaka tlateochiualistli tlen amo kinamiki tijselisej”.
^ O “xiitstokaj para nochipa”.
