Nopa carta tlen kintitlanilijkej Cristo itokilijkauaj tlen Roma 8:1-39
-
Ichikaualis Dios temaka nemilistli uan temakixtia (1-11)
-
Ichikaualis Dios kichiua xijmatikaj Dios inmechselia kej ikoneuaj (12-17)
-
Nochi katli Dios kinchijchijtok kichiaj kema nesis ininueyitilis ikoneuaj Dios (18-25)
-
“Ichikaualis Dios tlajtlani por tojuantij” (26, 27)
-
Katli Dios ipa kintlapejpenijtoya (28-30)
-
Titlatlanij ipan nochi tlamantli pampa Dios techiknelia (31-39)
8 Uajka, katli itstokej iuaya Cristo Jesús amo kintlatsakuiltiaj.
2 Pampa nopa tlanauatili tlen iaxka ichikaualis Dios* tlen temaka nemilistli iuaya Cristo Jesús, mitsmakixtik tlen nopa tlanauatili tlen tlajtlakoli uan mikilistli.
3 Dios* kichijki tlen nopa Tlanauatili amo ueliyaya kichiua, pampa nopa Tlanauatili amo ueliyaya kikixtia tlajtlakoli pampa nochi titlajtlakolejkej. Yeka Dios kititlanki iKone ma tlakatiki kej tlakatij maseualmej katli tlajtlakolejkej para kiixpolos tlajtlakoli. Kiampa kitsontlamiltik nopa tlajtlakoli tlen eltok ipan totlakayo,
4 para ma tijchiuakaj tlamantli tlen xitlauak kej kiijtoua iTlanauatil Moisés, pampa nama timoyakanaj ika ichikaualis Dios uan amo ika tlen totlakayo kineki.
5 Pampa katli moyakanaj ika tlen inintlakayo kineki, san mosentlaliaj ipan tlen kineki inintlakayo, pero katli moyakanaj ika ichikaualis Dios, mosentlaliaj ipan tlen ichikaualis* kineki ma kichiuakaj.
6 Katli moseniljuia ipan tlen itlakayo kineki, kipantia mikilistli, pero katli moseniljuia ipan tlen ichikaualis Dios kineki, kipaleuia ma kipanti nemilistli uan tlaseuilistli;
7 katli san moiljuia ipan tlen itlakayo kineki, ayokmo kuali mouika iuaya Dios, pampa totlakayo amo moyakana ika itlanauatil Dios uan amo ueli kichiua tlen kiijtoua nopa tlanauatili.
8 Yeka katli moyakanaj ika tlen inintlakayo kineki, amo uelis kiyolpakiltisej Dios.
9 Pero, tlaj nelnelia inkipiaj ichikaualis Dios, uajka ayokmo inkichiuaj tlen inmotlakayo kineki, nama inmechyakana ichikaualis Dios. Pero tlaj se akajya amo kipia itlalnamikilis Cristo, uajka nopa maseuali amo eli iaxka.
10 Pero tlaj Cristo itstok inmouaya, maske inmotlakayo miktok pampa tlajtlakole, ichikaualis Dios inmechmaka nemilistli pampa inelij inxitlauakej iixpa Dios.
11 Tlaj inkipiaj ichikaualis Dios tlen kichijki Jesús ma moyolkui, uajka Dios kitekiuis ichikaualis* para kichiuas inmotlakayo tlen nempoliui nojkia ma kipia nemilistli.
12 Uajka noikniuaj, moneki amo ma tijkauakaj totlakayo ma technauati yon ma tijchiuakaj tlen totlakayo kineki.
13 Tlaj inmojuantij inkikauaj ma inmechyakana tlen inmotlakayo kineki, temachtli inmikisej. Pero tlaj ika ichikaualis Dios inkimiktiaj nopa amo kuali tlamantli tlen inmotlakayo kineki, uajka inkipiasej nemilistli.
14 Pampa nochi katli kikauaj ma kinyakana ichikaualis Dios, inijuantij kena elij ikoneuaj Dios.
15 Pampa ichikaualis Dios amo kichiua xielikaj tlatekipanouanij katli kinkojtokej yon kichiua sampa ximajmauikaj. Pero ika nopa chikaualistli,* Dios inmechselia kej ikoneuaj, uan nojkia nopa chikaualistli kichiua ma tikijtokaj: “¡Abba,* Pa!”.
16 Ichikaualis Dios kichiua ma tijmatikaj* tielij tiikoneuaj Dios.
17 Yeka, tlaj tielij tiikoneuaj Dios, nojkia tijselisej tlen yaya techaxkatis, uan tlen kiaxkatis Cristo nojkia elis toaxka. Pero achtoui moneki titlaijiyouisej iuaya Cristo, kiampa nojkia techuejkapantlalisej iuaya.
18 Yeka nimoiljuia para nopa tlaijiyouilistli tlen nama tijpiaj amo tleno eli ika nopa tonali kema Dios technextilis nopa ueyi regalo tlen tijselisej.
19 Pampa nochi katli Dios kinchijchijtok,* kichiaj ika nochi ininyolo nopa tonali kema nesis ininueyitilis ikoneuaj Dios.
20 Pampa nochi katli Dios kinchijchijki, ya kintsakuilik para amo ma uelikaj kichiuasej yon se tlamantli, amo pampa inijuantij kinejkej, elki pampa Dios kiampa kinejki. Pero kema ya kiampa kichijki, nojkia kitenkajki ni:
21 nochi katli kinchijchijtok, ayokmo kitekipanosej tlajtlakoli yon inintlakayo tlen nempoliui. Kiampa elisej kej ikoneuaj Dios katli ayokmo elij tlatekipanouanij. ¡Ni elis tlauel yejyektsi!
22 Tijmatij hasta nama, nochi katli Dios kinchijchijtok, sansejko ayijtitokej* uan tlaijiyouijtokej.
23 Amo san nopa, tojuantij nojkia, kena, tojuantij katli tijpiaj ichikaualis Dios, tlen eli kej nopa achtoui pixkistli, tiayijtij ipan toyolo kema nojua tlauel tijchiaj Dios ma techseli kej tiikoneuaj. Ya ueli kichiua nopa pampa Cristo tlaxtlajki para techmakixtis tlen totlakayo katli tlajtlakole uan miki.
24 Pampa kema techmakixtijkej, pejkej tijchiaj tijselisej ni tlamantli. Pero kema tikitaj tlen tijchiaj tijselisej, uajka ayokmo moneki tijchiasej, pampa se akajya ayokmo kichia kiselis se tlamantli tlen ya kiitstok.
25 Pero kema tijchiaj tlen amo tikitaj, nojua tikijiyouiaj uan tijchiaj ika nochi toyolo.
26 Nojkia, ichikaualis Dios techpaleuia kema ayokmo tiyajatij.* Pampa kemantika uelis amo tijmatij tlake moneki titlajtlanisej kema timomaijtouaj,* pero ichikaualis Dios tlajtlani por tojuantij, kema tiayijtij uan amo ueli tijtenkixtiaj yon tleno.
27 Pero Dios katli kiita tlen eltok ipan toyolo, kimati tlen ichikaualis tlajtlani, pampa ichikaualis kitlajtlania Dios tlen ya kipaktia uan kiampa kichiua para kinpaleuis katli kiniyokatlalijtokej para kitekipanosej.
28 Tijmatij para Dios kichiua ma tekitikaj sansejko nochi tlamantli tlen kichijchijtok para ma kinpaleui katli kiikneliaj Dios, katli kinnotski sanse kej ipa mosentlalijtoya.
29 Pampa katli achtoui kinitak, ipa kintlapejpenijtoya para ma elikaj kej iKone, kiampa iKone elis nopa achtouiejketl tlen nopa sekinok iikniuaj katli teipa ejkej.
30 Nojkia, katli ipa kintlapejpenijtoya, nojkia kinnotski; katli kinnotski, nojkia kinitak xitlauakej. Uan katli kinitak xitlauakej, nojkia kinuejkapantlalik.
31 Uajka, ¿tlake tikijtosej tlen ni tlamantli? Tlaj Dios itstok touaya, ¿ajkia uelis moteuis touaya?
32 Tlaj yaya yon kentsi kitlasojmatki iKone para ma miki uan kiampa techmakixtik, ¿inmoiljuiaj amo techmakas ika nochi iyolo nochi sekinok tlamantli sanse kej techmakatok iKone?
33 ¿Ajkia uelis kintlateljuis katli Dios kintlapejpenijtok? Amo aka, pampa Dios yaya katli kinita xitlauakej.
34 ¿Ajkia uelis kintlatsakuiltis? Amo aka, pampa Cristo Jesús yaya katli mijki para kinpaleuis, uan amo san ya nopa, nojkia moyolkuik,* uan nama itstok ika imanejmak Dios uan nojkia kitlajtlania por tojuantij kej se totlatempaleuijka.
35 ¿Tlake uelis kichiuas ayokmo ma techikneli Cristo? ¿Tlaouijkayotl? ¿Tekipacholi? ¿Kema techtlaijiyouiltiaj? ¿Mayantli? ¿Kema amo tijpiaj tlen timokentisej? ¿Kema tiitstokej ipan mauilili? ¿Kema kinekij techmiktisej?
36 Kiampa ijkuilijtok: “Nochipa kinekij techmiktisej pampa nochipa timitstekipanouaj. Techitaj kej tipilborregojtsitsij tlen kinuikaj kampa kinmiktiaj”.
37 Pero titlatlanij ipan nochi ni tlamantli pampa techpaleuia katli techiknelia.
38 Pampa temachtli nijneltoka para yon mikilistli yon nemilistli, yon ángeles yon tekichiuanij, yon tlamantli tlen nama onka yon tlen teipa onkas, yon chikaualistli,
39 yon tlamantli tlen eltok uejkapa yon tlen eltok tlatsintla, uan yon se tlamantli tlen Dios kichijchijtok amo uelis kichiuas Dios ayokmo ma techikneli kej technextilijtok ika toTeko Cristo Jesús.
Tlen ijkuilijtok tlatsintla
^ O “espíritu santo”.
^ Kanajya kiijtouaj “toTeotsij”.
^ O “iespíritu”.
^ O “iespíritu”.
^ O “espíritu”.
^ Se tlajtoli ika hebreo o arameo tlen konemej kitekiuiyayaj para kinnojnotsasej inintatauaj ika tlaiknelili uan tlatlepanitakayotl.
^ O “techyolmelaua”.
^ Kiijtosneki maseualmej.
^ O “mochokilijtokej”.
^ O “amo tleno ueli tijchiuaj”.
^ Kanajya kiijtouaj “timotlatlajtiaj”.
^ Ika griego “motlananki”.
