Tlen kiijkuilok Santiago 1:1-27
-
Tlen ika kintlajpaloua toikniuaj (1)
-
Kema tikijiyouiaj tlaouijkayotl kichiua ma tiyolpakikaj (2-15)
-
Nochi kuajkuali regalos uala tlen uejkapa (16-18)
-
Moneki tijtlakakilisej uan tijchiuasej tlen kiijtoua itlajtol Dios (19-25)
-
“Se tlakatl katli moixtlachilia ipan se espejo” (23, 24)
-
-
“Tijueyichiuasej toTata Dios kej ya kiita tlapajpaktik uan amo sokiyo” (26, 27)
1 Na Santiago, itlatekipanojka Dios* uan itlatekipanojka toTeko Jesucristo, nikintlajkuiljuilia nopa 12 uejueyi familias* katli kampa ueli itstokej:
¡Niinmechontlajpaloua!
2 Noikniuaj, xikitakaj kej se ueyi pakilistli kema inkiixnamikisej tlen ueli tlaouijkayotl,
3 pampa inkimatij kema inmotlaneltokilis moyejyekoua ika nopa tlaouijkayotl, kichiua nojua más xikijiyouikaj nochi.
4 Pero tlaj nojua inkiijiyouijtosej, nopa kichiuas senkistok ximokualchijchijtokaj, uan kiampa amo inkipiasej yon se tlamantli tlen amo kuali uan amo tleno inmechpolos.
5 Uajka, tlaj se tlen inmojuantij amo kipia miak tlalnamikilistli, ajachika* ma kitlajtlani Dios uan kiselis, pampa ya ika nochi iyolo kinmaka nochi katli kitlajtlaniaj uan amo teixkoiljuia.*
6 Pero nojua ma tlajtlanto ika tlaneltokili uan ma motemachi para kena kiselis, pampa katli amo motemachia para kiselis se tlenijki eli kej atl ipan mar tlen ajakatl kikojkoxonia uan ejeliuis* kiuika.
7 Kena, nopa maseuali amo kinamiki moiljuis para Jehová* kimakas se tlenijki.
8 Nopa maseuali amo kimati tlake kichiuas uan san kipajpatla tlen kichiua ipan inemilis.*
9 Pero toikni katli moechkapantlalia ma yolpaki pampa kiuejkapantlalijtokej,
10 uan katli tlatominpia ma yolpaki pampa kiechkapantlalijtokej, pampa katli tlatominpia ixpoliuis kej se xochitl tlen eltok kuatitla.
11 Pampa nopa Tonati kisa uan kichiua ma pilini nopa xiuitl pampa chikauak kiixmaka nopa Tonati; uajka nopa xochitl uetsi uan ayokmo yejyektsi nesi. Nojkia kiampa ixpoliuis se katli tlatominpia kema tlauel kineki kipias tomij.
12 Yolpaki nopa tlakatl katli nojua kiijiyouia kema kiixnamiki se tlaouijkayotl, pampa kema kitlamiijiyouis nopa tlaouijkayotl, kiselis nemilistli kej se corona tlen Jehová* kintenkauilijtok katli nojua kiikneliaj.
13 Kema se akajya kiixnamiki se tlaouijkayotl, amo ma kiijto: “Dios nechyejyekoua”. Pampa amo aka uelis kichiuas Dios ma kichiua tlen amo kuali uan nojkia ya amo kichiua sekinok ma kinpano tlen amo kuali.
14 Pero sejse maseuali kiyejyekoua tlen kiyoltilana uan kimasiltia.
15 Uajka, kema tlauel kineki kichiuas tlen kiyoltilana, kichiua ma tlajtlakolchiua nopa maseuali, uan kema ya kichijtok nopa tlajtlakoli, kichiua ma miki.
16 Noikniuaj katli niinmechiknelia, amo ximokajkayauakaj.
17 Nochi kuajkuali regalos uan nochi tlamantli tlen amo tleno kipoloua* uala tlen uejkapa, ualtemo desde kampa itstok toTata katli kichijchijki nochi tlen tlauia ipan iluikak. Ya amo mopatla kej mopajpatla ekauili.*
18 Ya mosentlalik kichiuas ma tiyoltokaj ika nopa tlajtoli tlen melauak, uan kiampa tielisej katli achtoui kintlapejpenik tlen nochi katli kinchijchijki.
19 Noikniuaj katli niinmechiknelia, nijneki xijmatikaj nochi moneki nimantsi xitetlakakilikaj, pero amo nima xikamanaltikaj uan amo nima xikualanikaj,
20 pampa kema se akajya kualani, amo kichiua tlen Dios kiita xitlauak.
21 Yeka, ximokixtilikaj nochi tlen sokiyo uan nochi tlen amo kuali tlen nojua mokajtok ipan inmojuantij,* uan xielikaj inyolyamanikej para inkikauasej ma moneljuayoti ipan inmojuantij itlajtol Dios tlen uelis inmechmakixtis.*
22 Pero xijchiuakaj tlen kiijtoua itlajtol Dios uan amo san xijkakikaj, para amo inmokajkayauasej inmoseltitsitsij ika se tlalnamikilistli tlen amo melauak.
23 Pampa tlaj se akajya kikaki itlajtol Dios pero amo kichiua, elis kej se tlakatl katli moixtlachilia ipan se espejo:*
24 san motlachilia, uan kema kisteua, nimantsi kiilkaua kenijkatsa nesi.
25 Pero katli kuali kitlachilia nopa tlanauatili tlen senkistok kuali, tlen kichiua ma tiitstokaj timajkajtokej* uan nochipa kineltoka, amo san kitlakakilia uan nimantsi kiilkaua, ya kichiua tlen nopaya kiijtoua; uan yolpakis ipan nochi tlen kichiuas.
26 Tlaj se akajya moiljuia kiueyichiua Dios pero amo kinauatia inenepil, iselti mokajkayaua* uan san tlapik tlaueyichiua.
27 Ya ni tlen kiijtosneki tijueyichiuasej toTata Dios kej ya kiita tlapajpaktik uan amo sokiyo: tikinmokuitlauisej katli iknotsitsij uan katli ya mijki ininueue kema kiixnamikij tlaouijkayotl, uan amo timosokiuisej ika tlen onka ipan ni Tlaltipaktli.
Tlen ijkuilijtok tlatsintla
^ Kanajya kiijtouaj “toTeotsij”.
^ O “tribus”.
^ Kanajya kiijtouaj “ijiksa”.
^ Kanajya kiijtouaj “amo kinteneuilia”.
^ Kanajya kiijtouaj “kampa ueli”.
^ Ika griego “nochi iojui”.
^ O “tlen asitok”, “nejmaxtik”.
^ Kanajya kiijtouaj “akauilotl”.
^ O uelis “nopa miak tlamantli tlen amo kuali”.
^ O “inmechmanauis”.
^ Kanajya kiijtouaj “teskatl”.
^ Kanajya kiijtouaj “timalakantokej”.
^ Ika griego “kikajkayaua iyolo”.
