Tlen kiijkuilok Santiago 2:1-26
2 Noikniuaj, inmojuantij amo intlaneltokaj ipan toTeko Jesucristo katli kiuejkapantlalijtokej uan nojkia intechikoikneliaj, ¿axke?
2 Tlaj se tlakatl yaui kampa inmonechikouaj uan motlalilijtok ipan imakpil anillos tlachijchiuali ika oro uan yoyomitl tlen tlauel yejyektsi, uan nojkia yaui se katli amo tleno kipia ika iyoyo sokiyo,
3 ¿kuali inkiseliaj katli kiuika iyoyo tlen yejyektsi uan inkiiljuiaj “Ximoseui nikaj kampa más kuali”, pero katli amo tleno kipia inkiiljuiaj “Nikaj ximoketsto” o “Ximoseuiti kampa nijtlalia noikxi”?
4 Tlaj kiampa inkichiuaj, inkinextiaj se keskij más inkinpatiitaj que sekinok, uan inmochijtokej kej jueces katli amo kuali tetlajtolsenkauaj, ¿axke?
5 Xitlakakikaj, noikniuaj katli niinmechiknelia. Dios* kintlapejpenik katli maseualmej kinitaj amo tleno kipiaj para tlauel ma tlaneltokakaj uan ma kiselikaj nopa Tlanauatijkayotl tlen ya kintenkauilik katli kiikneliaj, ¿axke?
6 Pero inmojuantij inkinuejkamajkajtokej katli amo tleno kipiaj. Katli tlatominpiaj inmechtlaijiyouiltiaj uan inmechuauatatsaj hasta ininixpa tekichiuanij, ¿axke?
7 Inijuantij kiixpanoj ika tlen kiijtouaj nopa kuali tokajyotl tlen inmechmakatokej, ¿axke?
8 Yeka, tlaj inmojuantij inkineltokaj itlanauatil nopa tlanauatijketl sanse kej iTlajkuilol Dios kiijtoua “Xikinikneli sekinok kej ta timoiknelia”, uajka kuali tlen inkichiuaj.
9 Pero tlaj nojua intechikoikneliaj, uajka intlajtlakolchiuaj uan nopa tlanauatili kinextia intlaixpanoj.
10 Pampa tlaj se akajya kineltoka nochi nopa Tlanauatili pero mokuapoloua san ipan se tlamantli, uajka kiuika tlajtlakoli pampa kiixpano nochi nopa Tlanauatili.
11 Pampa katli kiijtok “Amo ximomekati”, nojkia kiijtok “Amo xitemikti”. Uajka, tlaj amo timomekatia pero kena titemiktia, tijuika tlajtlakoli pampa tikixpano nopa tlanauatili.
12 Nojua xikamanaltitokaj uan ximonejnemiltijtokaj kej katli kintlajtolsenkauasej ika nopa tlanauatili tlen ika moyakanaj maseualmej katli majkajtokej.*
13 Pampa katli amo tetlasojtla, nojkia amo kitlasojtlasej kema kitlajtolsenkauasej. Se katli tetlasojtla tlatlanis kema kitlajtolsenkauasej.
14 Noikniuaj, san tlapik kema se akajya kiijtoua tlaneltoka pero amo kinextia ika tlen kichiua. Nopa tlaneltokili amo uelis kimakixtis,* ¿axke?
15 Tlaj se toikni o se tosiuaikni amo kipia iyoyo uan amo kipia miak tlakualistli tlen kikuas ipan nopa tonali,
16 uan maske kiampa itstok, se tlen inmojuantij kiiljuia “Xia ika kuali, ximopiki uan kuali xitlakua”, pero amo kimaka tlen moneki para itlakayo, ¿kenijkatsa tlapaleuia nopa?
17 Nojkia kiampa pano ika totlaneltokilis, tlaj amo tijchiuaj tlamantli tlen kuali, totlaneltokilis miktok.
18 Pero se akajya uelis kiijtos: “Ta titlaneltoka uan na nijchiua tlamantli tlen kuali. ¿Kenijkatsa uelis tinechnextilis titlaneltoka tlaj amo tijchiua tlamantli tlen kuali? Na nimitsnextilis nitlaneltoka ika tlamantli kuali tlen nijchiua”.
19 Ta tijneltoka itstok san setsi Dios, ¿axke? Kuali tlen tijchiua. Pero hasta amo kuali ajakamej* kineltokaj uan uiuipikaj pampa kimakasij.
20 Ta tlakatl katli tiuiuitik, ¿amo tikita san tlapik tlaj tikijtoua titlaneltoka pero amo tijchiua tlen kuali?
21 Dios kiitak totata Abrahán eliyaya xitlauak ika tlen kichijki kema ya temaktilijtoya ikone Isaac ipan nopa tlaixpamitl, ¿axke?
22 Ya tikita, ika nopa tlamantli tlen kichijki neski para tlaneltokayaya uan itlaneltokilis elki asitok* ika tlen kichijki.
23 Kiampa moaxitik tlen kiijtoua iTlajkuilol Dios: “Abrahán tlaneltokak ipan Jehová* uan ya kiitak eliyaya xitlauak”. Uan kiixmatkej kej Jehová* iuampox.*
24 Ya inkimatij, Dios kiita se akajya eli xitlauak ika tlamantli kuali tlen kichiua uan amo san pampa tlaneltoka.
25 Nojkia kiampa panok ika Rahab, nopa siuatl katli monamakayaya,* Dios kiitak eliyaya xitlauak kema kuali kinselijtoya katli yajtoyaj tlachiatoj uan kintitlanki ipan seyok ojtli, ¿axke?
26 Kena, sanse kej totlakayo miktok tlaj amo titlaijiyokuiliaj,* nojkia totlaneltokilis miktok tlaj amo tijchiuaj tlamantli tlen kuali.
Tlen ijkuilijtok tlatsintla
^ Kanajya kiijtouaj “toTeotsij”.
^ Kanajya kiijtouaj “malakantokej”.
^ O “kimanauis”.
^ O “demonios”.
^ O “senkistok”, “nejmaxtik”.
^ O “iamigo”.
^ O “auilnenkasiuatl”.
^ Kanajya kiijtouaj “titlaijiyotilanaj”.
