Tlen kiijkuilok Santiago 4:1-17
4 ¿Tlake kichiua ximoteuikaj uan ximokualanikaj? ¿Amo inkichiuaj nopa pampa inmechyakana nopa amo kuali tlamantli tlen kiyoltilana inmotlakayo tlen moteuia ika inmojuantij ipan inmoyolo?
2 Inmojuantij inkinektokej se tlamantli pero amo inkipiaj. Nojua intemiktiaj uan inkiixtokaj tlen sekinok ininaxka, pero amo ueli inkipiaj tlen inkinekij. Nojua inmokualaniaj uan inmoteuiaj. Amo inkipiaj pampa amo intlajtlanij.
3 Uan kema kena intlajtlanij amo inkiseliaj, pampa intlajtlanij para inkichiuasej tlen amo kuali uan tlen kiyoltilana inmotlakayo.
4 Inmojuantij katli inkitlauelkajkej Dios,* ¿amo inkimatij tlaj inmouampojchiuaj ininuaya katli itstokej ipan Tlaltipaktli inmochiuaj ikualankaitakauaj Dios?* Uajka, katli kineki mouampojchiuas ininuaya katli itstokej ipan Tlaltipaktli, mochiua ikualankaitaka Dios.
5 ¿O inmoiljuiaj san tlapik kema iTlajkuilol Dios kiijtoua: “Toyolo* tlen kichiua ma titekokolikaj,* kichiua tlauel ma tijnekikaj miak tlamantli”?
6 Pero Dios nojua más kinextia ueyi iyolo.* Yeka iTlajkuilol Dios kiijtoua: “Dios amo kuali kinita katli moueyimatij, pero kinextia ueyi iyolo ika maseualmej katli moechkapantlaliaj”.
7 Uajka, xijkauakaj Dios ma inmechyakana, pero xikijixnamikikaj* Diablo uan ya inmechtlalkauis.
8 Ximonechkauikaj ika Dios uan ya monechkauis kampa inmojuantij. Ayokmo xijchiuakaj tlen amo kuali inmojuantij katli intlajtlakolchiuaj, kejuak inmomapajpakaskiaj. Xijpajpakchiuakaj inmoyolo, inmojuantij katli amo inkimatij tlake inkichiuasej.
9 Ximoyolkuesokaj, xitsajtsikaj* uan ximochokilikaj. Ayokmo kinamiki inuetskatosej, nama moneki inchokasej. Amo kinamiki inyolpaktosej, nama moneki inmokuesosej.
10 Ximoechkapantlalikaj iixpa Jehová* uan ya inmechuejkapantlalis.
11 Noikniuaj, ayokmo ximoijilnamikikaj se ika seyok. Tlaj se akajya kiijilnamiki o kitlaijiljuia se toikni, kiijilnamiki uan kitlaijiljuia nopa tlanauatili. Uan tlaj tijtlaijiljuia nopa tlanauatili, amo tijchiua tlen kiijtoua nopa tlanauatili, timochiua se juez.
12 Itstok san setsi Katli kitlalia tlanauatili uan eli Juez, katli ueli temakixtia* uan tetsontlamiltia. Pero, ¿ajkia tieli ta para tikintlaijiljuis sekinok?
13 Nama xitlakakikaj, inmojuantij katli inkiijtouaj “Nama o mostla tiasej ne altepetl uan nopaya timokauasej se xiuitl, titekitisej uan tijtlanisej miak tomij”,
14 pero inmojuantij amo inkimatij tlake inmechpanos mostla. Pampa inelij kej se ayajtli* tlen motlalia se tlalochtli* uan nimantsi ixpoliui.
15 Más kuali monekiskia inkiijtosej “Tlaj Jehová* kineki, tiitstosej uan tijchiuasej ni o ne seyok tlamantli”.
16 Pero nama inmojuantij inmoueyimatij uan san inkamanaltij para inmouejkapantlalisej. Nochi nopa tlamantli tlen inkiijtouaj amo kuali.
17 Yeka, tlaj se akajya kimati kichiuas tlen kuali pero amo kichiua, uajka ya tlajtlakolchijtok.
Tlen ijkuilijtok tlatsintla
^ Ika griego “katli inmomekatiaj”.
^ Kanajya kiijtouaj “toTeotsij”.
^ O “Totlalnamikilis”.
^ O “ma tikixtokakaj tlen sekinok ininaxka”.
^ O “temaka tlateochiualistli tlen amo kinamiki tijselisej”.
^ Ika griego “ximoketsakaj intemachmej iixpa”.
^ O “xiayijtikaj”.
^ O “temanauia”.
^ Kanajya kiijtouaj “ayauitl”.
^ Kanajya kiijtouaj “tlatoktsi”.
