Nopa carta tlen kititlanilijkej Tito 3:1-15
3 Nojua xikinilnamikilijto ma kinneltokakaj tlanauatianij uan tekichiuanij uan ma kikauakaj ma kinyakanakaj, ma kinekikaj kichiuasej nochi tlamantli tlen kuali,
2 amo aka ma kiijilnamikikaj, amo ma kichiuakaj kualantli, amo ma kitemolikaj nochipa ma mochiua san tlen inijuantij kinekij uan nochipa ma elikaj yolyamanikej* ika nochi maseualmej.
3 Pampa achtouia tojuantij nojkia amo titlalnamikiyayaj uan amo tijchiuayayaj tlen technauatiyayaj, timokajkayajtoyaj uan san tijtokiliyayaj tlen kiyoltilanayaya totlakayo uan tlen ika timoyolpakiltiyayaj, tlauel amo kuali timonejnemiltiyayaj uan titekokoliyayaj,* tijchiuayayaj tlen tlauel fiero uan timokualankaitayayaj.
4 Pero kema toTlamakixtijka* Dios, kinextik tlauel kuali iyolo uan tlauel kiniknelia maseualmej,
5 ya techmakixtik (amo pampa tijchijtoyaj tlen xitlauak, techmakixtik pampa techtlasojtlak) kema techpajpajki ika ni atl tlen kichiua ma tijselikaj nemilistli uan kema techchijki tiyankuikej ika ichikaualis.*
6 Ya kitekiuik Jesucristo, toTlamakixtijka, para kititlanis tlauel miak ichikaualis ipan tojuantij,
7 kiampa kema techitas tixitlauakej pampa kinextia ueyi iyolo ika tojuantij,* uelis tielisej maseualmej katli timotemachiaj tijselisej nopa nemilistli tlen amo kema tlamis,* tlen yaya kitenkajtok techaxkatis.
8 Ni tlajtoli* eli temachtli uan nijneki nojua xikinilnamikilijto ni tlamachtili, kiampa katli kineltokatokej Dios* mosentlalisej nojua kichijtosej tlen kuali. Ni tlamantli tlauel kuali uan nelia kinpaleuia maseualmej.
9 Pero amo ximokalaki kema monajnankiliaj ika se uiuiyotl yon kema kitemoliaj ajkia inijuantij elkej inintatauaj katli uejkajkia itstoyaj, yon kema mokamaijixnamikij ininuaya sekinok, yon kema moteuiaj ika tlen kiijtoua nopa Tlanauatili, pampa nopa eli san tlapik uan amo tepaleuia.
10 Pero tlaj se tlakatl kimoyaua se tlamachtili tlen amo melauak,* ayokmo ximouika iuaya tlaj ya tijtlakaualtik se uelta uan hasta ompa pero amo tlakaki,
11 pampa tijmati nopa tlakatl chikokistok tlen nopa ojtli uan tlajtlakolchiua, uan iselti motlanilia ma kitlatsakuiltikaj.
12 Kema nijtitlanis Ártemas o Tíquico kampa ta, xijchiua kampeka tinechitati ipan altepetl Nicópolis, pampa nimoiljuijtok nopaya nimokauas kema tlaseseyas.*
13 Xikinmaka Zenas, katli kuali kiixmati nopa Tlanauatili, uan Apolos nochi tlen moneki para amo tleno ma kinpolo kema yasej ipan ojtli.
14 Pero toikniuaj ma kiyekokaj ajachika* kichiuasej tlen kuali para uelis tlapaleuisej kema nimantsi monekis ma tlapaleuikaj, kiampa inijuantij nochipa kichijtosej tlen kuali.*
15 Nochi katli itstokej nouaya mitsontlajpalouaj. Xikinontlajpalo nochi tlaneltokanij katli techikneliaj.
Dios ma kinexti ueyi iyolo ika nochi inmojuantij.*
Tlen ijkuilijtok tlatsintla
^ O “amo ma mosisinikaj”.
^ O “tikixtokayayaj tlen sekinok ininaxka”.
^ O “toTlamanauijka”.
^ O “iespíritu santo”.
^ O “techmaka tlateochiualistli tlen amo kinamiki tijselisej”.
^ O “tiitstosej nochipa”.
^ Kanajya kiijtouaj “kamanali”.
^ Kanajya kiijtouaj “toTeotsij”.
^ O “kichiua ma onka se secta”.
^ Kanajya kiijtouaj “seseuas”.
^ Kanajya kiijtouaj “ijiksa”.
^ O “nochipa temakasej inintlajka”.
^ O “ma inmechmaka tlateochiualistli tlen amo kinamiki tijselisej”.
