Sejse xiuitl, miakej toikniuaj katli ayokmo kitekipanouaj Jehová mosentiliaj kema moilnamiki Cristo imikilis. Maske inijuantij pejkej kitekipanouaj Jehová, teipa ayokmo kichijkej, uelis pampa kinpanok miak tlamantli tlen kichijki ayokmo ma monechikokaj yon ma tlajtolmoyauakaj. Kinpanok kej kiijtoua pilamochtsi Sampa xijtekipano Jehová (Heb 12:1). Jehová nojua kinpatiita toikniuaj katli ayokmo kitekipanouaj, pampa yaya kinkojki ika Jesucristo ieso (Hch 20:28; 1Pe 1:18, 19). ¿Kenijkatsa uelis tikinpaleuisej sampa ma monechikokaj touaya?

Ueuejtlakamej kichiuaj kampeka monojnotsasej ininuaya nopa toikniuaj uan kinekij kinpaleuisej. Kichiuaj kej se tlapialmokuitlauijketl katli kitemoua se pilborregojtsi katli mokuapolojtok (Lu 15:4-7). Nopa kinextia Jehová tlauel kiniknelia uan kineki kinpaleuis (Jer 23:3, 4). Tojuantij nojkia uelis tikinyolchikauasej ni toikniuaj uan amo san ueuejtlakamej. Tlaj tijchiuaj kampeka tikinpaleuisej uan tikinnextilisej tikinikneliaj, Jehová tlauel yolpakis uan amo san tlapik tlen tijchiuasej (Pr 19:17; Hch 20:35). Uajka, ximoiljui ipan se toikni katli uelis tijyolchikauas uan xijchiua kampeka nima tijpaleuis.

ACHTOUI XIKITA NOPA VIDEO MA TIKINYOLCHIKAUAKAJ KATLI AYOKMO KITEKIPANOUAJ JEHOVÁ, UAN TEIPA XIJNANKILI NI TLAJTLANILI:

• ¿Tlake kichijki Abbey kema kiixmatki se toikni katli ayokmo kitekipanouayaya Jehová?

• ¿Kenke kinamiki tikiniljuisej ueuejtlakamej tlaj timoiljuijtokej tijpaleuisej se toikni katli ayokmo kitekipanoua Jehová?

• ¿Tlake kichijki Abbey kema ika ompa yaskia kipaxaloti Laura?

• ¿Kenijkatsa kinextik Abbey kiikneliyaya Laura, kipixtoya iyolo uan nelia kinekiyaya kipaleuis?

• ¿Tlake techmachtia nopa neskayotl tlen Jesús kiijtok ipan Lucas 15:8-10?

• ¿Tlake kuali tlamantli panok pampa nochi kichijkej kampeka kipaleuisej Laura?