KEJ TIMONEJNEMILTIAJ
Ipan nochi Tlaltipaktli titemakasej Tlen Tematiltia ipan septiembre
Kampa ueli ipan Tlaltipaktli maseualmej kinekij ma kinyolchikauakaj (Ec 4:1). Ipan septiembre, tijchiuasej se ueyi kampeka titemakasej pilamochtsi Tlen Tematiltia tlen metstli septiembre. Ma tijchiuakaj kampeka tlauel tijmoyauasej ni pilamochtsi. Uan pampa tijnekij tikinyolchikauasej maseualmej, moneki timonojnotsasej ininuaya. Yeka, amo tijkauasej se pilamochtsi ipan se kali tlaj amo aka itstos.
TLEN UELISKIA TIKIJTOS
“Kemantika, nochi tijnekij se akajya ma techyolchikaua. ¿Ajkia timoiljuia uelis techyolchikauas? [Xijpoua 2 Corintios 1:3, 4]. Ni pilamochtsi Tlen Tematiltia kiixtoma kenijkatsa toTeotsij techyolchikaua”.
Tlaj kuali mitstlakakilis uan kiselia nopa pilamochtsi:
XIJNEXTILI NOPA VIDEO ¿KENKE MONEKI TIMOMACHTIS BIBLIA?
Teipa xikiljui tlaj kinekiskia xijmachti ika Biblia.
XIJCHIUA TLEN MONEKI UAN KIAMPA SAMPA TIJPAXALOTI
Xijchiuili se tlajtlanili tlen uelis tijnankiliti seyok tonali. Uelis tijtlajtlanis: ¿Kenke kikaua toTeotsij ma titlaijiyouikaj?
