Ipan 2018 nochi pilamochtsitsij tlen kistiajki tlen ika titlajtolmoyauaj, pejki kiualika san se tlamachtili. Nochi nopa pilamochtsitsij nojkia eli tlen tlauel tijtekiuiaj, yeka uelis tijtekiuisej ipan tlajtolmoyaualistli. Uelis tijuikasej kema tiasej titlakouatij o kema tiasej kanajya. Maske amo titlamachtiaj ika nopa pilamochtsitsij, kena uelis kichiuas maseualmej ma kinekikaj kiixmatisej toTeotsij.

Kema tikamanaltis iuaya se akajya, xijpouili se texto uan xijnextili se tlamachtili tlen uelis kipaktis tlen uala ipan se pilamochtsi. Tlaj nopa maseuali kipia ichampoyouaj, mokuesoua o kitetsopa se tekipacholi, ueliskia tikiljuis: “Namanok nijpojki se tlamachtili tlen uelis mitspaleuis. ¿Uelis nimitsnextilis?”. Tlaj nopa maseuali kipaktis, uelis tijmakas se pilamochtsi o tijtitlanilis ipan icelular o ipan itableta. Uelis kiampa tijchiuas kema achtoui tijnojnotsas se akajya. Maske amo san tijnekij titemajmakasej pilamochtsitsij, kena uelis techpaleuis ma tikinpantikaj maseualmej katli kinekij kineltokasej toTeotsij (Hch 13:48).