Tlaj ta senkistok titlatekipanoua uan tijpia 23 xiuitl o nojua tijpia 65 xiuitl, amo tlauel timokokoua, uan tijneki tias sejkanok titlatekipanoti, ¿ueliskia tijtemitis se solicitud uan kiampa tias Kampa kinmachtiaj tlajtolmoyauanij? Kema pejkej kinmachtiaj tlajtolmoyauanij, miakej toikniuaj katli mosenkajtokej, ichpokamej uan telpokamej tlajtlantokej yasej momachtitij nopaya. Uan nojua tlauel moneki ma yakaj telpokamej. Xikiljui Jehová ma mitspaleui tijnekis nojua tlauel titlatekipanos uan tijchiuas kej iKone (Sl 40:8; Mt 20:28; Heb 10:7). Teipa ximoiljui kenijkatsa tijpatlas se keski tlamantli ipan monemilis uan kiampa uelis tias timomachtiti Kampa kinmachtiaj tlajtolmoyauanij.

¿Tlake kichijtokej toikniuaj katli yajkej momachtitoj? Sekij kintitlantokej ma tlatekipanotij kampa kamanaltij sekinok tlajtoli o ma tlajtolmoyauakaj kampa nemij miakej maseualmej. Teipa, sekij kintlaneuij ma kinpaxalokaj toikniuaj kema toikni katli tepaxaloua chijchikuasej metstli amo ueli, ma tlatekipanokaj kej katli tepaxalouaj chijchikuasej metstli o kej misioneros. Xikita kenijkatsa nojua tlauel tijtekipanos Jehová uan nojkia ximoiljui kej tlajtolpanextijketl Isaías, ya kiijtok: “Na nias. Na xinechtitlani” (Is 6:8).

ACHTOUI XIKITA NOPA VIDEO MISIONEROS KATLI KAMPA UELI TLAJTOLMOYAUAJ, UAN TEIPA XIJNANKILI NI TLAJTLANILI:

• ¿Kenijkatsa kintlapejpeniaj misioneros katli tlatekipanouaj ipan se altepetl?

• ¿Kenijkatsa tlapaleuiaj misioneros?

• ¿Tlake tlateochiualistli kiseliaj misioneros?