Biblia kiijtojtoya Satanás techtlaijiyouiltiskia pampa amo kineki ma titlajtolmoyauakaj (Jn 15:20; Rev 12:17). ¿Kenijkatsa uelis tikinpaleuisej toikniuaj katli kintlaijiyouiltiaj uan kintlatsakuiltiaj? Uelis tikiljuisej Jehová ma kinpaleui. Biblia kiijtoua kema se katli kichiua tlen xitlauak kitlajtlania toTeotsij se tlamantli, Jehová kichiua tlen kitlajtlania (Snt 5:16).

¿Tlake uelis tikiljuisej Jehová kema timomaijtosej? Uelis tikiljuisej ma kinmaka toikniuaj chikaualistli uan ma kinpaleui amo majmauisej (Isa 41:10-13). Nojkia uelis tikiljuisej ma kichiua tekichiuanij ma techkauakaj titlajtolmoyauasej, kiampa “tiitstosej ika kuali uan ika tlaseuilistli” (1Ti 2:1, 2).

Kema Pablo uan Pedro kintlatsakuiltijtoyaj, toikniuaj momaijtojkej uan kintokaxtijkej kema kiiljuijkej Jehová ma kinpaleui (Hch 12:5; Ro 15:30, 31). Tlaj tojuantij amo tijmatij inintoka toikniuaj katli tlaijiyouiaj pampa kintlatsakuiltiaj, uelis tikiljuisej toTeotsij ipan tlake tlanechikoli o altepetl itstokej toikniuaj katli tijneki ma kinpaleui.