Ximoiljui tiitstok ipan Galilea, kema Jesús itstoya. Uan tiajtok Jerusalén pampa mochiua nopa Iljuitl tlen Pilxajkaltsitsij. Nojkia itstokej nopaya sekinok tlaneltokanij katli kampa ueli euaj. Tlauel miakej maseualmej mosentilijtokej. Ta tijneki tijmakas Jehová se tlakajkaualistli. Ipan ojtli tlauel miakej maseualmej nemij uan ta tijuika se chivo, yeka tijchiua kampeka tiasiti ipan teokali. Kema tionasi, tikita itstokej tlauel miakej katli kinekij temakasej tlakajkaualistli. Uan kema ya titemakas nopa chivo tikilnamiki se moikni, uelis katli itstok nopaya o sejkanok ipan nopa altepetl, kualantok mouaya. Jesús kiijtok tlake moneki tijchiuas (xijpoua Mateo 5:24). ¿Tlake kinamiki inkichiuasej ta uan nopa toikni tlaj inkinekij inkichiuasej tlen Jesús kiijtok uan initstosej ika tlaseuilistli? Ipan sejse recuadro xijtlapejpeni tlake kena kinamiki tijchiuasej.

¿TLAKE KINAMIKI TIJCHIUAS TA?

• San timokamanaljuis iuaya tlaj timoiljuia kena kinamikiyaya kualanis ika tlen tikiljuik o tlen tijchijki.

• Tijchiuas ma kiita amo kinamikiyaya kualanis pampa timoiljuia ya tlauel yolkentsi o nojkia mitsyolkokok.

• Kuali tijtlakakilis kema mitsiljuis tlen kiyolmati, uan maske amo tijkuamachilis kenke kiampa kiyolmati uan amo tijnekiyaya tijyolkokos, tikiljuis ma mitstlapojpoljui.

¿TLAKE KINAMIKI KICHIUAS TOIKNI?

• Kinpouilis sekinok toikniuaj tlen tijchiuilik pampa kineki ma kitenpaleuikaj.

• Mitsilnamikilis nochi tlen tijchiuilik, mitsiljuis amo kuali tlen tijchijki uan kichiuas ximoiljui nojkia motlajtlakol.

• Kiitas amo timoueyimati uan tijchijki ueyi kampeka timokamanaljuis iuaya. Uan nelnelia mitstlapojpoljuis.

Maske ipan ni tonali amo titemakaj tlakajkaualistli, ¿kenke Jesús kiijtok moneki kuali timouikasej ininuaya toikniuaj tlaj tijnekij toTeotsij ma kipakti tlen tijchiuaj kema tijtekipanouaj?