¿Kenke tlauel techpaktia tiasej ipan uejueyi tlanechikolistli tlen eyi tonali? Pampa nopaya uelis tijueyichiuasej Jehová ininuaya tlauel miakej toikniuaj, kej kichiuayayaj uejkajkia ipan Israel. Nopaya amo san tijkakij miak tlamachtili, nojkia ueli tiitstokej ininuaya touampoyouaj uan tochampoyouaj. Tlauel tijpatiitaj nopa uejueyi tlanechikolistli, yeka tijchiuaj kampeka tiasej ipan nopa eyi tonali.

Kema tiauij ipan uejueyi tlanechikolistli amo moneki san timoiljuisej ipan tlen tojuantij tijselisej, nojkia moneki tijtemolisej kenijkatsa tijnextisej tikinikneliaj sekinok (Gál 6:10; Heb 10:24, 25). Tijnextiaj tikinikneliaj sekinok kema san tijtlapejpeniaj kampa timoseuisej uan kema tikinpaleuiaj toikniuaj katli kalaktiauij (Flp 2:3, 4). Ipan uejueyi tlanechikolistli nojkia uelis timouampojchiuasej ininuaya sekinok. Ma timosentlalikaj tikinkamanaljuisej katli amo tikinixmatij. Uelis tikinkamanaljuisej kema ayamo peua o kema ya tlantos ueyi tlanechikolistli, o kema titlakuaj (2Co 6:13). Nochipa uelis timouampojchijtosej ininuaya toikniuaj katli tikinixmatkej. Kema sekinok kiitasej tlauel timoikneliaj, uelis nojkia kinekisej kitekipanosej Jehová (Jn 13:35).

ACHTOUI XIKITA NOPA VIDEO UEJUEYI TLANECHIKOLISTLI KAMPA YAUIJ TLEN MIAK ALTEPEMEJ ¡TLAIKNELILI AXKEMA TLAMIS!, UAN TEIPA XIJNANKILI NI TLAJTLANILI:

• ¿Tlake kichijkej toikniuaj uan kiampa kinextijkej kinikneliyayaj toikniuaj katli yajkej ipan Uejueyi tlanechikolistli kampa yauij tlen miak altepemej 2019?

• ¿Kenke maseualmej mosentlachiliaj kema kiitaj toTeotsij itekipanojkauaj mosentikapaleuiaj uan moikneliaj?

• ¿Tlake kipankixtijkej tlen tlaiknelili Katli kinyakanaj Jehová itlajtoltemakauaj?

• ¿Kenijkatsa kejuak tlatlanki tlaiknelili ipan Alemania uan Corea del Sur?

• ¿Tlake moneki timosentlalisej tijchiuasej?