¿KENKE TLAUEL MONEKI? Maseualmej moneki kiueyichiuasej Jehová tlaj kinekij momanauisej (Ro 10:13, 14). Yeka maske uelis miakej tikinmachtiaj, amo nochi kinekij kichiuasej tlen Jehová kineki. Tlaj amo tijnekij san timotonalpolosej, moneki tikintemosej maseualmej katli kipiaj kuali ininyolo uan katli kinekij kichiuasej tlen Jehová kipaktia. Yeka tlaj katli tijmachtiaj amo kineki kipatlas kej monejnemiltia maske ya uejkajto tijmachtiaj, uajka ueliskia ayokmo tijmachtisej uan tijchiuasej kampeka tikintemosej maseualmej katli Jehová kinyoltilana ipan itlanechikol (Jn 6:44). Tlaj katli tijmachtiyayaj kipatla inemilis uan eli se tlen ‘toueyiTeko kitlapejpenijtok para itstos para nochipa’, uajka tlauel techpaktiskia sampa tijmachtisej (Hch 13:48).

¿TLAKE UELISKIA TIJCHIUAS?

• Xikiljui tlauel kuali tlen kichiua pampa momachtia Biblia (1Ti 2:4).

• Xikiljui kenke tlauel ipati kichiuas ipan inemilis tlen momachtia (Lu 6:46-49).

• Ika tlaiknelili xikixtomili nopa tlapoualistli kampa kamanalti tlen se tlatojtojketl uan xikiljui ma moiljui tlake tlamantli kitsakuilia amo kichiuas tlen Biblia kiijtoua (Mt 13:18-23).

• Ika tlaiknelili xikiljui kenke ayokmo tijmachtis tlen Biblia.

• Xikiljui san kemantika tijnojnotsas o tijpaxalos, nojkia uelis sampa tijmachtis tlaj kichiua ipan inemilis tlen momachtijtok.

ACHTOUI XIKITA NOPA VIDEO, UAN TEIPA XIJNANKILI NI TLAJTLANILI:

• ¿Tlake tlamantli kinextik katli kimachtiyayaj amo kinekiyaya kipatlas kej monejnemiltia?

• ¿Kenijkatsa kipaleuik toikni katli kimachtia ma moiljui moneki kipatlas se keski tlamantli ipan inemilis?

• ¿Kenijkatsa kiiljuik toikni katli kimachtia sampa ueliskia kimachtis teipa?