Kema timosentlaliaj nojua kuali titlatekipanosej, techpaleuia kuali ma tijtekiuikaj tonali uan tochikaualis ipan ni itlamia tonali (1Co 9:26; Ef 5:15, 16). Kema inmomachtisej ininuaya inmochampoyouaj, ueliskia inkiitasej tlake inmosentlalisej inkichiuasej ipan septiembre 2022–agosto 2023. Ipan ni pilamochtsi Tlen tijchiuasej ipan tlanechikoli, uelis inkipantisej se keski tlamachtili tlen inmechpaleuis. Achtoui ximomaijtokaj, uan teipa xikitakaj tlen uelis inkichiuasej (Snt 1:5).

Se neskayotl, ¿uelis inkipaleuisej se tlen inmochampoyouaj ma tlatekipano kej precursor regular? Uan tlaj timoiljuia amo tikaxitis horas, xikamanalti ininuaya se keskij precursores katli nojkia kiixnamiktokej sanse tlamantli kej ta (Pr 15:22). Uelis tijtlaneuis uan tijtlatsintokis se precursor kema timomachtis ininuaya mochampoyouaj, uan teipa tikijkuilos tlake tonali titlajtolmoyauas. Uan tlaj achtouia titlatekipanojtoya kej precursor, ¿ueliskia sampa kiampa tijchiuas? Uelis ya mopatlatok se keski tlamantli uan nama kena tiuelis.

¿Ueliskia se tlen mochampoyouaj tlatekipanos kej precursor auxiliar se o se keski metstli? Tlaj amo tijpia miak chikaualistli uelis titlajtolmoyauas san se kentsi mojmostla. Uan tlaj titekiti o tia escuela, uelis titlatekipanos kej precursor auxiliar ipan nopa metstli kema amo tekitij o amo momachtiaj se keski tonali, o ipan metstli tlen kipia makuili sábados uan domingos. Xikijkuilo ipan se calendario ipan tlake metstli tijneki titlatekipanos, uan ipan se amatl xikijkuilo tlake tonali titlajtolmoyauas (Pr 21:5).

ACHTOUI XIKITA NOPA VIDEO AMO XIMAJMAUIKAJ, PRECURSORES, UAN TEIPA XIJNANKILI NI TLAJTLANILI:

• ¿Kenijkatsa Jehová kimokuitlauik tosiuaikni Aamand? ¿Tlake techmachtia?