Kema tikilnamikisej Cristo imikilis uelis timoyoliljuisej ipan nopa miak tlateochiualistli tlen tijselisej pampa Jesús temaktilik inemilis. Kej kema moyolkuisej katli miktokej. Jehová amo kema kinejki ma timikikaj. Yeka tlauel techyolkokoua kema se akajya katli tikikneliaj miki (1Co 15:26). Jesús tlauel mokuesok kema kinitak chokayayaj itokilijkauaj pampa mijki Lázaro (Jn 11:33-35). Jehová nojkia kiyolkokoua kema techita timochokiliaj kema miki se akajya katli tikikneliaj, ni tijmatij pampa Jesús tlauel mokuesok (Jn 14:7). Jehová tlauel kineki ma asi nopa tonali kema kinyolkuis katli kitekipanouaj uan tojuantij nojkia (Job 14:14, 15, TNM).

ToTeotsij kuali kichiua nochi tlamantli, yeka timoiljuiaj kema kinyolkuis mijkatsitsij amo san kej ueli kichiuas (1Co 14:33, 40). Ayokmo tikinchokilisej mijkatsitsij, pampa tikinselisej ika pakilistli kema moyolkuisej. ¿Timoyoliljuia ipan ni tlamantli kema miki se katli tikiknelia? (2Co 4:17, 18.) ¿Tijtlaskamatilia toTeotsij Jehová pampa ipan Biblia kiijtoua sampa kinyolkuis mijkatsitsij? (Col 3:15.)

• ¿Ajkia katli tikiknelia tijnekiskia sampa tikitas?

• ¿Ajkia inijuantij katli inintoka nesi ipan Biblia tijnekiskia tikinixmatis uan timonojnotsas ininuaya?