Maske katli tijtokiliaj Cristo ayokmo tijchiuaj tlen kiijtoua nopa Tlanauatili tlen kimakakej Moisés, Jehová nojua kineki ma tijneltokakaj ome tlen nopa tlanauatili tlen tlauel ipati: tikiknelisej toTeotsij uan maseualmej (Mt 22:37-39). Tlaj amo tijchiuaj kampeka amo uelis tijnextisej nopa tlaiknelijkayotl. Yeka, ¿tlake uelis tijchiuasej? Moneki tijpouasej Biblia mojmostla. Tlaj timoyoliljuisej ipan tlen tijpouasej, tikitasej Jehová kinextia kuajkuali tlamantli uan kipia kuali iyolo (Sl 27:4). Nopa techpaleuis ma tikiknelikaj uan ma timoiljuikaj kej ya. Uan techyololinis ma tijneltokakaj itlanauatiljuaj, kej nopa tlanauatili tlen kiijtoua ma tikiniknelikaj sekinok ika nochi toyolo (Jn 13:34, 35; 1Jn 5:3). Ma tikitakaj eyi tlamantli tlen techpaleuis nojua ma techpakti tijpouasej Biblia.

• Kuali ma tijtekiuikaj totlalnamikilis, tlen tikitaj, tlen tikitskiaj, tlen techpaktia, tlen tikijnekuij uan tlen tijkakij. Ma timoiljuikaj tiitstokej nopaya. Ma tijchiuakaj kampeka kejuak tikitasej uan tijkakisej tlen panoyaya, uan kejuak tikijnekuisej tlen onkayaya. Ma timoiljuikaj tlen kiyolmatiyayaj katli itstoyaj nopaya.

• Ma tijchiuakaj sekinok tlamantli. Kema tijpouasej Biblia uelis chikauak tijpouasej o tijkaktiasej se tlapoualistli tlen mokixtijtok ipan Biblia. Nojkia uelis timomachtisej inemilis se katli kitekipanok Jehová o timomachtisej seyok tlamantli, uan amo san tijpeualtisej ipan Génesis uan titlamisej ipan Apocalipsis o Revelación. Uan kema tijpouasej Jesús inemilis uelis tijtekiuisej nopa tlaxeloli 4 uan 16 tlen pilamochtsi Tlen techpaleuis timomachtisej toTeotsij iTlajtol. Nojkia uelis tijpouasej nochi nopa capítulo kampa mokixtis nopa texto tlen mojmostla tijpouaj o tijpouasej nopa pilamochtsitsij tlen Biblia kej moijkuilojtiajki.

• Ma tijkuamachilikaj tlen tijpouasej. Maske mojmostla san setsi capítulo tijpouaskiaj, tlauel kuali tlaj tijkuamachilisej uan timoyoliljuisej ipan tlen tijpouasej, uan amo tlaj tijpouaskiaj miak capítulos san pampa tijnekij nima titlamisej. Ma timoiljuikaj ipan tlen ijkuilijtok achtoui uan teipa tlen nopa capítulo, ma tikitakaj nochi tlen panok, ma tijtekiuikaj mapas uan referencias marginales, uan ma tijchiuakaj kampeka tijtemosej se tlamantli tlen amo tijkuamachilijkej. Tlaj tiuelisej, tlen tiuejkajkej kema titlapojkej, kiampa ma tiuejkauakaj kema timoyoliljuisej ipan tlen tijpojkej.