¿KENKE TLAUEL MONEKI? Miakej maseualmej katli amo tlachiaj amo kinekij kamanaltisej ininuaya katli amo kinixmatij. Yeka, moneki tijchiuasej kampeka tijtejtemolisej kenijkatsa tikinpouilisej toTeotsij iTlajtol. Jehová kiniknelia maseualmej katli amo tlachiaj uan kitekipachoua tlen kinpano (Le 19:14). Ma tijchiuakaj kej Jehová uan ma tikinpaleuikaj ma kiixmatikaj.

¿TLAKE UELISKIA TIJCHIUAS?

• Xikintemo (Mt 10:11). ¿Tikixmati se akajya katli kipia se iteixmatka katli amo tlachia? ¿Kampa titlajtolmoyaua onka se kali kampa itstokej maseualmej katli amo tlachiaj o se escuela kampa kinpaktiskia kipiasej amatlajkuiloli tlen ika kinpaleuisej katli amo tlachiaj?

• Xijnexti mitstekipachoua tlen kinpano. Tlaj kuali tikinnojnotsas uan tijnextis mitstekipachoua tlen kinpano, inijuantij kuali kiyolmatisej kema kamanaltisej mouaya. Xikiniljui se tlamantli tlen panotok kampa itstokej.

• Xikinpaleui ma kiixmatikaj Jehová. Jehová itlanechikol kichijchijtok miak tlamantli tlen ika uelis tikinpaleuisej maseualmej katli amo tlachiaj ma kiixmatikaj Jehová. Xijtlajtlani nopa maseuali kenijkatsa kineki kipouas se amatlajkuiloli. Katli kinyakana tlajtolmoyauanij ipan tlanechikoli moneki kiiljuis toikni katli temaka amatlajkuiloli ma tlajtlani amatlajkuiloli tlen kineki kitekiuis se maseuali katli amo tlachia.