Nopa san iyojtsi Pascua tlen Jesús kichiuaskia eliskia tlauel ipati. Jesús nechka mikiskia, yeka kinejki kichiuas nopa Pascua ininuaya itokilijkauaj, uan nojkia ipan nopa tonali kinnauatik ma kichiuakaj toTeko iTlakualis. Yeka kiniljuik Pedro uan Juan ma kikualtlalikaj kampa kichiuaskiaj nopa Pascua (Lu 22:7-13; xikita tlaixkopinkayotl ipan ipantsajka). Tlen Jesús kichijki techilnamikilia moneki timokualchijchiuasej uan kiampa tiitstosej kema moilnamikis Cristo imikilis ipan marzo 27. Ueuejtlakamej ya kitlapejpenijtosej ajkia tlamachtis, ajkia kiuikas pantsi uan vino, uan sekinok tlamantli. Uan, ¿tlake moneki tijchiuasej sejse tlen tojuantij uan kiampa timokualchijchijtosej ipan nopa tonali?

Ma tijkualchijchiuakaj toyolo. Ma tijpouakaj uan ma timoyoliljuikaj ipan nopa tlapoualistli tlen mopouas kema nechka moilnamikis Cristo imikilis. Ipan nopa pilamochtsi Mojmostla timomachtiaj toTeotsij iTlajtol tijpantisej tlake textos uelis tijpouasej. Nojkia tijpantisej sekinok tlamachtili ipan apéndice B12-A, apéndice B12-B tlen La Biblia. Traducción del Nuevo Mundo uan ipan pilamatsi Tlen tijchiuasej ipan tlanechikoli abril 2020. Tlaj tijneki timomachtis ininuaya mochampoyouaj kenke tlauel ipati Jesús imikilis, xijtemo ipan Índice de las publicaciones Watch Tower uan ipan Tlen ika momachtiaj Jehová itlajtoltemakauaj.

Ma tikintlaneuikaj sekinok. Ma tijchiuakaj kampeka tikintlaneuisej sekinok ma monechikokaj touaya kema moilnamikis Cristo imikilis. ¿Ajkia inijuantij ueliskia tikintlaneuisej? Uelis tikintlaneuisej katli tikinpaxalouaj, katli uejkajkia tikinmachtiyayaj Biblia, toteixmatkauaj uan katli tikinixmatij. Ueuejtlakamej moneki kintlaneuisej katli mouejkatlalijtokej. Tlaj se akajya amo itstok kampa tojuantij tiitstokej, ipan jw.org uelis tijtemosej kanke uan tlake hora moilnamikis Cristo imikilis nechka kampa ya itstok. Xijtsonpechili kampa kiijtoua TLEN TIJCHIUAJ uan teipa kampa kiijtoua “Cristo imikilis”.

¿Tlake nojua moneki nijchiuas uan kiampa nimokualchijchijtos ipan nopa tonali?