Tlaj se kuesoli amo nima tlami, uelis kichiuas tlauel ma timoyolkokokaj. David motemachiyaya asiskia se tonali kema tlamiskia nopa kuesoli tlen kipiayaya iuaya Saúl, uan ya eliskia tlanauatijketl kej Jehová kiijtojtoya (1Sa 16:13). David kuali tlaneltokayaya, nopa kipaleuik ma kipia iyolo uan ma kichia Jehová ma kitlamilti nopa kuesoli.

Kema tikixnamikisej se tlaouijkayotl, tlauel techpaleuis tlaj kuali timoiljuiaj tlake tijchiuasej. Uan tlaj tijchiuaj tlen tijyekojtokej, techpaleuis amo ma moueyili tlen tikixnamikij (1Sa 21:12-14; Pr 1:4). Kemantika se keski kuesoli amo nima tlami, maske tijchiuaj kampeka tijchiuasej tlen Biblia tetlajtolmaka. Kema kiampa panos, moneki tijnextisej tijpiaj toyolo uan timotemachisej Jehová kisenkauas nopa kuesoli. Nechka Jehová kitlamiltis tlen techtlaijiyouiltia uan tlen kichiua ma timochokilikaj (Ap 21:4). Maske tokuesoljuaj tlamis pampa Jehová techpaleuis o pampa panos sekinok tlamantli, uelis timotemachisej asis tonali kema tlamis tlen techtlaijiyouiltia. Tlauel techyolchikaua pampa tijmatij ni tlamantli.

ACHTOUI XIKITA NOPA VIDEO KUALI MOUIKAJ MASKE MASEUALMEJ MOKUALANKAITAJ, UAN TEIPA XIJNANKILI NI TLAJTLANILI:

• ¿Tlake tlaouijkayotl kiixnamijkej toikniuaj katli itstokej ika sur tlen Estados Unidos?

• ¿Kenijkatsa kinextijkej kipiaj ininyolo uan teikneliaj?

• ¿Tlake tlamantli tlauel kipatiitakej toikniuaj? (Flp 1:10).