Tlaj katli itstokej ipan se kali moikneliaj, kinpaleuia kuali ma itstokaj. Uan tlaj amo moikneliaj ouij kimatisej itstosej sansejko uan amo mopaleuisej. ¿Kenijkatsa katli mosenkajtokej uan tetajmej uelis kinextisej kinikneliaj ininchampoyouaj?

Se tlakatl katli kiiknelia isiua kiita tlake kipoloua, tlake moiljuia uan tlake kiyolmati (Ef 5:28, 29). Nopa tlakatl moneki kinpaleuis ichampoyouaj ma kipiakaj tlen ika mopanoltisej, nojkia moneki momachtis ininuaya, kiampa kinpaleuis kuali ma tlaneltokakaj (1Ti 5:8). Se siuatl moneki kikauas ma kiyakana iueue uan moneki kitlepanitas (Ef 5:22, 33; 1Pe 3:1-6). Katli mosenkajtokej moneki motlapojpoljuisej (Ef 4:32). Tetajmej moneki kuali kinmokuitlauisej nochi ininkoneuaj uan kinpaleuisej ma kiiknelikaj Jehová (Dt 6:6, 7; Ef 6:4). ¿Tlake tlaouijkayotl kiixnamikij inmokoneuaj ipan escuela? ¿Kenijkatsa kiijiyouiaj kema kintetsopaj katli ininuaya momachtiaj? Tlaj katli itstokej ipan se kali moikneliaj, nochi kuali itstosej.

ACHTOUI XIKITA NOPA VIDEO MA TIKINNEXTILIKAJ TOCHAMPOYOUAJ SE TLAIKNELILI TLEN AXKEMA TLAMIS, UAN TEIPA XIJNANKILI NI TLAJTLANILI:

• ¿Kenijkatsa se tlakatl kimokuitlauia isiua ika tlaiknelili?

• ¿Kenijkatsa se siuatl kinextia tlauel kitlepanita iueue?

• ¿Kenijkatsa tetajmej kichiuaj kampeka kinmachtisej ininkoneuaj tlen toTeotsij?