Kema kiijtouaj se akajya kitlalnamiktijkej, kichiua ma timoiljuikaj uelis kimachtijkej, kipaleuijkej kuali ma monejnemilti o kitlatsakuiltijkej. Jehová techtlalnamiktia pampa kineki ma tijueyichiuakaj kej ya kipaktia (Ro 12:1; Heb 12:10, 11). Kemantika uelis timoyolkokosej tlaj techtlalnamiktisej. Maske timoyolkokosej, tlaj tijkauasej ma techtlalnamiktikaj, toTeotsij kuali techitas uan techteochiuas (Pr 10:7). ¿Tlake moneki kiilnamikisej katli tetlalnamiktiaj uan katli kintlalnamiktiaj?

¿Ajkia inijuantij tetlalnamiktiaj? Ueuejtlakamej, tetajmej uan sekinok kichiuaj kampeka tetlalnamiktisej ika tlaiknelili kej Jehová kichiua (Jer 46:28). Kemantika se akajya moneki chikauak ma kitlalnamiktikaj, maske kitlalnamiktiaj, moneki kichiuasej ika tlaiknelili (Tit 1:13).

¿Ajkia inijuantij kintlalnamiktiaj? Kema techtlalnamiktiaj moneki amo tikualanisej uan nimantsi tijchiuasej tlen techiljuiaj (Pr 3:11, 12). Nochi titlajtlakolejkej, yeka moneki ma techtlalnamiktikaj. Tlen tijpouaj ipan Biblia uan tlen tijkakij ipan tlanechikoli uelis techtlalnamiktis o kemantika uelis monekis kichiuasej se comité judicial uan kiampa techtlalnamiktisej. Tlaj tijkauaj ma techtlalnamiktikaj uan tijpatlasej tlen moneki, uelis tijselisej nopa nemilistli tlen axkema tlamis (Pr 10:17).

ACHTOUI XIKITA NOPA VIDEO JEHOVÁ KINTLALNAMIKTIA KATLI KINIKNELIA, UAN TEIPA XIJNANKILI NI TLAJTLANILI:

• ¿Kenijkatsa moskaltik Canon, uan tlake kipanok teipa?

• ¿Kenijkatsa kitlalnamiktik Jehová?

• ¿Tlake techmachtia tlen kipanok Canon?